پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين قارجى مينيسترلىگىنىڭ كەڭەيتىلگەن القاسىنا قاتىسىپ, بيۋدجەت-سالىق ساياساتىنىڭ باسىمدىقتارىن بەلگىلەدى.
ۆيتسە-پرەمەر ۆەدومستۆونىڭ مەملەكەتتىك قارجىنىڭ تۇراقتىلىعىن قامتاماسىز ەتۋگە قوسقان ۇلەسىن اتاپ ءوتىپ, قىزمەتكەرلەردىڭ جاس بۋىنى ەلدىڭ بيۋدجەت جۇيەسىن ءتيىمدى باسقارۋ جۇمىسىن لايىقتى جالعاستىرىپ كەلە جاتقانىن جەتكىزدى.
ونىڭ ايتۋىنشا, ۇكىمەتتىڭ ەكونوميكالىق بلوگىنىڭ الدىندا اۋقىمدى مىندەت تۇر. ونى جۇزەگە اسىرۋ كوبىنە قارجى مينيسترلىگىنىڭ جۇيەلى ءارى ماقساتتى جۇمىسىنا بايلانىستى.
«وتكەن جىلى مەملەكەتتىك قارجىنى شوعىرلاندىرۋعا ارنالعان بيۋدجەت-سالىق رەفورماسى جۇرگىزىلدى. بۇگىندە ونى جۇزەگە اسىرۋدا قارجى مينيسترلىگى شەشۋشى ءرول اتقارادى. مەملەكەتتىڭ الەۋمەتتىك باعدارىن ساقتاي وتىرىپ, بيۋدجەت شىعىستارىن قاتاڭ تەكسەرىپ وتىرۋىمىز قاجەت», دەدى س.جۇمانعارين.
بيىلعى باسىمدىقتىڭ ءبىرى – ءتيىمسىز شىعىستاردى انىقتاپ, بيۋدجەتتىك باعدارلامالاردى وڭتايلاندىرۋ ماقساتىندا جان-جاقتى قايتا قاراۋ. سالىقتىق اكىمشىلەندىرۋگە ەرەكشە كوڭىل بولىنەدى. بيىل 4 ترلن تەڭگەدەن استام سالىق ءتۇسىرۋ مىندەتى قويىلدى. بۇل رەتتە اكىمشىلەندىرۋ تسيفرلىق قۇرالدارعا نەگىزدەلىپ, ءادىل بولىپ قالۋعا ءارى بيزنەسكە ارتىق قىسىم جاساماۋعا ءتيىس.
سونىمەن قاتار سەرىك جۇمانعارين قارجى بلوگىنىڭ تسيفرلىق ترانسفورماتسياسى جۇيەلىك سيپات العانىن اتاپ ءوتتى. «Smart Data Finance» تالدامالىق بازاسى قۇرىلىپ, سالىق تولەۋشىلەردىڭ قىزمەتىن قاداعالاۋ جۇيەسى ەنگىزىلدى. بۇل رەتتە بارلىق تسيفرلىق شەشىم ۇزدىكسىز جۇمىس ىستەۋگە ءتيىس. سەبەبى سالىقتىق باسقارۋدىڭ جاڭا مودەلى تسيفرلىق قىزمەتتىڭ ساپاسىنا تىكەلەي قاتىستى.
سونداي-اق القا بارىسىندا بيزنەستى جاڭا سالىق كودەكسىنە بىرتىندەپ بەيىمدەۋ ءۇشىن «تازا پاراق» ءبىر رەتتىك اكتسياسى جۇزەگە اسىرىلىپ, سالىق كودەكسىنىڭ جاڭا نورمالارىن يمپلەمەنتاتسيالاۋ ماسەلەسى جوبالىق كەڭسە شەڭبەرىندە اپتا سايىن تالقىلاناتىنى ايتىلدى.
ميكرو جانە شاعىن بيزنەس بيىل 1 ساۋىرگە دەيىن نەگىزگى بورىشىن وتەگەن جاعدايدا, ءوسىمپۇل مەن ايىپپۇلدى ەسەپتەمەي, جەڭىلدەتىلگەن جويۋ ءراسىمىن پايدالانا الادى. ققس بويىنشا ەسەپكە ۋاقتىلى قويىلماعانى ءۇشىن سالىناتىن ايىپپۇل دا جويىلادى.
سالىق قاتىناستارىن قايتا ىسكە قوسۋ شەڭبەرىندە: 2025 جىلعى 17 جەلتوقسانعا دەيىن ۇسىنىلعان ەسەپ بەرۋ بويىنشا, 2026 جىلعى 1 قاڭتارعا دەيىنگى كەزەڭدەگى مىندەتتەمەگە كامەرالدىق باقىلاۋ توقتاتىلدى; 2026 جىلعى 1 قاڭتارعا دەيىن سالىق كەزەڭدەرى بويىنشا سالىقتىق تەكسەرۋلەر مەن اكىمشىلىك جازالار توقتاتىلدى; 2026 جىلعى 1 قاڭتارعا دەيىن جاسالعان مامىلەلەر مەن تىركەۋلەردى جارامسىز دەپ تانۋ تۋرالى تالاپ قويۋ توقتاتىلدى.
بۇل شارالار سالىق تولەۋ ەرىكتىلىگىن ارتتىرىپ, مەملەكەت پەن بيزنەستىڭ جاڭا ءوزارا ءىس-قيمىلى ۇلگىسىن قالىپتاستىرۋعا ارنالعان.
بيىل سالىق جۇيەسىن تسيفرلاندىرۋ جالعاسادى. وڭايلاتىلعان دەكلاراتسيانى اۆتوماتتاندىرۋ, سالىق ەسەپتىلىگى نىساندارىن الدىن الا تولتىرۋ, سالىق تولەۋشىلەرگە ارناپ جي-سەرۆيس ەنگىزۋ, مەملەكەتتىك كىرىستەر كوميتەتىنىڭ دەرەكقورىن باسقا ۆەدومستۆولارمەن ينتەگراتسيالاۋ جوسپارلانعان. زاڭدى تۇلعالارعا تولەمدەردى اۆتوماتتى تۇردە ەسەپتەن شىعاراتىن «سالىق ءاميانى» تەتىگى ەنگىزىلەدى.
«تسيفرلىق ققس» جوباسى شەڭبەرىندە نەگىزگى اقپاراتتىق جۇيەلەردى ينتەگراتسيالاۋ جالعاسادى. مەملەكەتتىك ساتىپ الۋ سالاسىندا تسيفرلىق تەڭگە قولدانىلاتىن قاناتقاقتى جوبانى ىسكە قوسۋ كوزدەلىپ وتىر.
قازىر مەملەكەتتىك كىرىستەر ورگاندارى 42 قىزمەت ءتۇرىن كورسەتەدى. ونىڭ 39-ى (92%) ەلەكتروندىق فورماتقا اۋىستىرىلدى. 13 قىزمەت تولىق اۆتوماتتاندىرىلعان, 37-سىنە eGov.kz پورتالىندا قول جەتكىزۋگە بولادى. بيزنەستى سۇيەمەلدەۋدىڭ پرواكتيۆتى سەرۆيستىك ۇلگىسىنە كوشۋ جۇمىسى ودان ءارى جالعاسادى.