پاۆلودار وبلىسى ماي اۋدانىندا ومىرتقا اۋرۋلارىن ەمدەيتىن ەلىمىزدەگى العاشقى مەملەكەتتىك ورتالىق اشىلدى, دەپ حابارلايدى pavlodarnews.kz.
ورتالىقتا ءبىر مەزەتتە 30 ادام ەمدەلە الادى. ورتالىق ومىرتقا اۋرۋلارىنا شالدىققان جانە ءتۇرلى جاراقاتتان كەيىن تىرەك-قيمىل اپپاراتى بۇزىلعان ادامداردى وڭالتۋعا باعىتتالعان. بۇل ماقساتتا وبلىستىق بيۋدجەتتەن 50 ميلليون تەڭگە بولىنگەن. ماي اۋدانىندا جۇمىس ساپارىمەن بولعان وبلىس اكىمى بولات باقاۋوۆ ورتالىقتىڭ اشىلۋىنىڭ ارقاسىندا 40 ادام جۇمىسپەن قامتىلعانىن تىلگە تيەك ەتتى.
«ورتالىققا كەلگەن ناۋقاستار وسىندا تاجىريبەسىمەن ءبولىسىپ, ءبىر-بىرىنە كەڭەس بەرە الادى. وبلىس تۇرعىندارىنىڭ 3 پايىزى – مۇمكىندىگى شەكتەۋلى جاندار. ورتالىقتىڭ اشىلۋى جانە مامانداردىڭ كومەگىمەن وڭالتۋ جۇمىستارى وڭ ناتيجە بەرەدى دەگەن ويدامىن», – دەدى وبلىس اكىمى بولات باقاۋوۆ
پاۆلودار وبلىسى مۇگەدەكتەر قوعامىنىڭ توراعاسى گەورگي چەتۆەريكوۆتىڭ ايتۋىنشا, بۇرىن ناۋقاستار تەك قانا 10 كۇندىك وڭالتۋدان تەگىن وتسە, ورتالىقتىڭ پايدا بولۋىمەن بۇل مەرزىم 45 كۇنگە دەيىن سوزىلادى.
ايتا كەتەرلىگى, مۇندا ارنايى رەابيليتولوگ مامان ناۋقاستارعا ءبىرىنشى كەزەكتە وزىنە-ءوزى كومەك كورسەتۋدى, ەكىنشىدەن, وزىنە جانە اينالاسىنداعىلارعا پايداسىن تيگىزۋدى جانە قوعامعا بەيىمدەلۋدى ۇيرەتەدى. سونداي-اق, سۋ استى ماسساج, ترەنەجەر زالى جانە ەمدىك دەنە تاربيەسى قاراستىرىلعان.