نۇرسۇلتان نازارباەۆ مىسىر اراب رەسپۋبليكاسىنىڭ پرەزيدەنتى ابدەل فاتتاح اس-سيسيگە كاير قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
مەملەكەت باسشىسى تەررورلىق اكت تۋرالى حاباردى زور كۇيزەلىسپەن قابىلدادى.
«وقيعا قۇرباندارىنىڭ باسىم كوپشىلىگى ايەلدەر مەن بالالار ەكەنى ءبارىمىزدى دە بەيجاي قالدىرعان جوق. قازاقستان قاۋىپسىزدىك پەن بەيبىتشىلىككە قاتەر ءتوندىرىپ وتىرعان حالىقارالىق ەكسترەميزم مەن تەرروريزم اكتىلەرىن قاتاڭ ايىپتايدى. كايردەگى تەررورلىق اكت وركەنيەتتى الەمدە راديكالدى توپتار مەن ولاردىڭ يدەولوگياسىنا ورىن جوق ەكەنىنە تاعى دا كوزىمىزدى جەتكىزدى», – دەلىنگەن جەدەلحاتتا.
نۇرسۇلتان نازارباەۆ قازا بولعانداردىڭ وتباسىلارى مەن جاقىندارىنا, سونداي-اق بارشا مىسىر حالقىنا قازاقستان حالقىنىڭ جانە جەكە ءوزىنىڭ اتىنان كوڭىل ايتىپ, زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك ءبىلدىردى.