سەمەيدەگى ەرتىس ەكولوگيا دەپارتامەنتىنىڭ كونفەرەنتس-زالىندا يادرولىق سىناقتارعا قارسى «نەۆادا-سەمەي» حالىقارالىق قوزعالىسىنىڭ ۇيىمداستىرۋىمەن «ەل تاۋەلسىزدىگى جانە سەمەي يادرولىق سىناق پوليگونىنىڭ جابىلعانىنا 20 جىل» دەگەن تاقىرىپپەن دوڭگەلەك ۇستەل وتكىزىلدى. وعان بيلىك وكىلدەرى, عالىمدار مەن ەكولوگتار, پوليگون ماڭىنداعى اۋدانداردان قوناقتار, ەتنومادەني ورتالىقتار بەلسەندىلەرى مەن جۋرناليستەر كوپتەپ قاتىستى.
مازمۇندى جيىندى اتالعان قوزعالىستىڭ ۆيتسە-پرەزيدەنتى سۇلتان كارتوەۆ اشىپ جۇرگىزىپ وتىردى. جيىندا كۋرچاتوۆ قالاسىنداعى ۇلتتىق يادرولىق ورتالىقتىڭ باس ديرەكتورى, اكادەميك قايرات كادىرجانوۆ, زامانىندا سەمەي ءوڭىرىندەگى گيدروگەولوگيالىق بارلاۋ ەكسپەديتسياسىن ۇزاق جىلدار بويى ابىرويمەن باسقارعان عىلىم كانديداتى بايسۇلتان تىلەكين, رەسپۋبليكامىزدىڭ ەكس-حالىق دەپۋتاتى, عىلىم دوكتورى, پروفەسسور مايرا جانگەلوۆا ءجانە باسقالار ءسوز ءسويلەپ, ەلباسىنىڭ اتوم اجداھاسىن جابۋداعى ەرلىگى مەن كۋرچاتوۆ قالاسىنداعى قازىرگى وڭدى ءوزگەرىستەر ءجانە ونىڭ بولاشاعى تۋرالى كەڭىنەن وي تولعادى. جيىندا, سونداي-اق ەلىمىزدە اتوم ستانساسىن سالۋ كەرەك پە, جوق پا دەگەن ماسەلە دە قوزعالدى.
بۇل كۇندەرى سەمەي وڭىرىندە پوليگوننىڭ جابىلۋىنىڭ 20 جىلدىعىنا ارنالعان جيىندار كوپتەپ وتكىزىلۋدە. ايتالىق, بەيسەنبى, جۇما كۇندەرى ۇلتتىق يادرولىق ورتالىق پەن سەمەي مەملەكەتتىك مەديتسينا ۋنيۆەرسيتەتىندە پوليگون تاقىرىبىن تەرەڭنەن قوزعاعان حالىقارالىق كونفەرەنتسيالار بولىپ ءوتتى. ال پوليگوننىڭ جابىلعان كۇنى – 29 تامىزدا سەمەيدە, ەرتىس وزەنى جاعاسىندا ءتۇرلى مەرەكەلىك شارالار ءوتتى.
داۋلەت سەيسەن ۇلى.
سەمەي.