قر ۇكىمەتى قازاقستاندىق وتباسىلار ءۇشىن باسپانا ماسەلەسىن شەشۋدىڭ جاڭارعان تەتىكتەر قامتىلعان «نۇرلى جەر» باعدارلاماسىن جاساعان. ۇلتتىق ەكونوميكا ءمينيسترى قۋاندىق بيشىمباەۆ ۇكىمەت وتىرىسىندا باعدارلامانىڭ باسىم باعىتتارى يپوتەكالىق قارىزداردى سۋبسيديالاۋ ارقىلى يپوتەكالىق نەسيە بەرۋدى قولداۋ, قۇرىلىس كومپانيالارى ءۇشىن قارىز مولشەرلەمەسىنىڭ ءبىر بولىگىن جابۋ جولىمەن جەكە قۇرىلىس سالۋشىلاردى ىنتالاندىرۋ, تۇرعىن ءۇي قۇرىلىس جيناق بانكىنىڭ سالىمشىلارى جانە اكىمدىكتەردە كەزەكتە تۇرعان ازاماتتار ءۇشىن نەسيەلىك تۇرعىن ءۇي قۇرىلىسىنىڭ كولەمىن ۇلعايتۋ بولاتىنىن باياندادى. سونداي-اق, باعدارلاما اياسىندا حالىقتىڭ الەۋمەتتىك جاعىنان وسال توپتارى ءۇشىن ساتىپ الۋ قۇقىعىنسىز جالعا بەرىلەتىن تۇرعىن ءۇيدىڭ وڭىرلىك قورىن قۇرۋ, قاجەتتى ينفراقۇرىلىم جۇرگىزۋ ارقىلى جەكە تۇرعىن ءۇي قۇرىلىسىن دامىتۋ جوسپارلانعان.
«نۇرلى جەر» باعدارلاماسىن جۇزەگە اسىرۋدىڭ ناتيجەسىندە 1,5 ملن. شارشى مەتر تۇرعىن ءۇي سالىنادى, ونىڭ ىشىندە 2017-2019 جىلدارى 274 مىڭ شارشى مەتر تۇرعىن ءۇي سالۋ جوسپارلانعان.
ەسكە سالا كەتەيىك, اعىمداعى جىلدىڭ قىركۇيەك ايىندا قر پرەزيدەنتى نۇرسۇلتان نازارباەۆ ۇكىمەتكە جاڭا مىندەتتەر جۇكتەپ, تاياۋ بولاشاقتاعى باسىمدىق بەرىلەتىن جۇمىستاردى ايقىنداپ بەرگەن بولاتىن. ۇكىمەتكە بىرنەشە مەملەكەتتىك باعدارلاما دايىنداۋ تاپسىرىلدى, ونىڭ ىشىندە ناتيجەلى ەڭبەكپەن قامتۋ جانە ءوزىن ءوزى جۇمىسپەن قامتىعان ازاماتتاردى شاعىن جانە ورتا بيزنەسكە تارتۋ باعدارلاماسى, 2017-2021 جىلدارعا ارنالعان اگروونەركاسىپ كەشەنىن دامىتۋ باعدارلاماسى جانە «نۇرلى جەر» تۇرعىن ءۇي سالۋ باعدارلاماسى بار.
ارنۇر اسقار, "ەگەمەن قازاقستان".