شىمكەنتتە ساباق ۇلگەرىمىن جاقسارتقىسى كەلگەن ستۋدەنتتەر الاياقتارعا الدانىپ قالعان. ەكى كۇدىكتى 2025 جىلدىڭ قازان ايىنان باستاپ TikTok الەۋمەتتىك جەلىسى ارقىلى ستۋدەنتتەردىڭ پاراقشالارىن تاۋىپ, ارنايى بوتتاردىڭ كومەگىمەن ولاردىڭ ۇيالى تەلەفون ءنومىرى مەن جەكە مالىمەتتەرىن جيناعان, دەپ حابارلايدى Egemen.kz.
كەيىن وقۋ ورنىنىڭ پورتال جۇيەسى ارقىلى ستۋدەنتتەردىڭ ۇلگەرىمىن تەكسەرىپ, كەيبىرىنىڭ سىناقتاردان جەتكىلىكسىز بالل جيناعانىن انىقتاعان.
استانادا TikTok جەلىسىندەگى جالعان «ەمشىگە» سوت ۇكىمى شىقتى
كۇدىكتىلەر ستۋدەنتتەرگە ۋاقىتشا نومىرلەر ارقىلى مەسسەندجەردە حابارلاسىپ, ءوزىن ۋنيۆەرسيتەت قىزمەتكەرى رەتىندە تانىستىرعان. ولار ستۋدەنتتەرگە سىناقتان ءوتۋ ءۇشىن ءبىر بالل جەتىسپەيتىنىن, اكادەميالىق قارىز نەمەسە ەمتيحانعا جىبەرىلمەۋ قاۋپى بار ەكەنىن ايتىپ, ماسەلەنى شەشىپ بەرۋگە جانە باعالاردى تۇزەتۋگە ۇسىنىس جاساعان.
«كۇدىكتىلەر ءار ستۋدەنتتەن بۇل جالعان قىزمەت ءۇشىن 70-80 مىڭ تەڭگە الىپ, كەيىن حابارسىز كەتكەن. قازىرگى تاڭدا الاياقتاردىڭ التى ەپيزودقا قاتىسى بار ەكەنى انىقتالىپ, تەرگەۋ امالدارى جۇرگىزىلىپ جاتىر», دەلىنگەن شىمكەنت قالاسىنىڭ پد ءباسپاسوز قىزمەتىنىڭ مالىمدەمەسىندە.
ارام اقشاعا قۇنىققان الاياق التى جىلعا سوتتالدى