تۇركيا پرەزيدەنتى رەجەپ تايپ ەردوعان ىستامبۇلدا بولعان تەراكتىدەن ادامداردىڭ قايتىس بولعانىن راستادى, - دەپ حابارلايدى Anadolu اگەنتتىگى.
اگەنتتىكتىڭ مالىمەتىنشە, ەردوعان تەرروريستىك اكت قاۋىپسىزدىك قىزمەتىندەگىلەر مەن بەيبىت تۇرعىندارعا قارسى ۇيىمداستىرىلعانىن ايتتى. سونىمەن قاتار, پرەزيدەنت تۇركيانىڭ تەرروريستىك ۇيىمدارمەن ءالى دە كۇرەسىپ جاتقانىن ايتتى. ەردوعان تۇركيانىڭ بۇل لاڭكەستەردى جاۋاپكەرشىلىككە تارتاتىنىن ايتىپ ءوتتى.
ال ريا نوۆوستي باسىلىمىنىڭ مالىمەتىنشە, ەردوعان ىستامبۇلدا بولعان تەراكتىنى ۇيىمداستىرۋشىلاردىڭ بارىنشا كوپ ادامنىڭ كوزىن جويعىسى كەلگەنىن ايتتى.
"بۇگىن تۇندە ءبىز تاعى دا تەرروريستىك ارەكەتتەردىڭ كۋاگەرى بولدىق. ولاردىڭ فۋتبولدان كەيىن بىردەن تەراكت ۇيىمداستىرۋداعى ماقساتى بارىنشا كوپ ادامنىڭ كوزىن جويۋ كەرەك بولعانى تۇسىنىكتى. وكىنىشكە قاراي, تەراكتىدەن زارداپ شەككەندەرمەن قوسا, قازا تاپقاندار دا بار", - دەپ كەلتىرەدى اگەنتتىك تۇركيا پرەزيدەنتىنىڭ سوزدەرىن.
ەسكە سالا كەتەيىك, بۇگىن تۇندە ىستامبۇلدا بىردەن ەكى تەراكت بولىپ, قازا تاپقانداردىڭ سانى 29 ادامعا جەتكەن بولاتىن. وقيعا ورنىنداعى جەرگىلىكتى تەلەارنا مالىمەتىنشە, پوليتسەيلەر وتىرعان اۆتوبۋستىڭ ماڭىندا مينالانعان كولىك جارىلىپ كەتكەن. جارىلىستان زارداپ شەككەندەردىڭ بارلىعى - پوليتسەيلەر.