قازاقستان تاۋەلسىزدىگىنىڭ 25 جىلدىعى قارساڭىندا تارازدا «اراي» تۇرعىن ءۇي الابىنداعى جاڭا پاتەرلەردىڭ كىلتتەرىن سالتاناتتى تابىستاۋ ءراسىمى ءوتتى, دەپ حابارلايدى قالالىق اكىمدىكتىڭ ءباسپاسوز قىزمەتى.
«اراي» تۇرعىن ءۇي الابىنداعى قۇنى 447,8 ملن تەڭگە بولاتىن 80 پاتەرلى ءۇي «نۇرلى جول» باعدارلاماسىنىڭ اياسىندا سالىندى. قۇرىلىستى «اگروسپەتسستروي» جشس جۇرگىزدى. ءۇي قازاقستان رەسپۋبليكاسىنىڭ «2020 جىلعا دەيىن وڭىرلەردى دامىتۋ» باعدارلاماسىنىڭ اياسىندا سالىندى.
جاڭا الەۋمەتتىك پاتەرلەردىڭ كىلتتەرىنە پاتەر كەزەگىندە تۇرعان 80 وتباسى يە بولدى. ءوزىنىڭ جاڭا پاتەرىندە داستارحانىن جايعان ەڭبەك ارداگەرى ەرەجەپباي جەتىباەۆ ەلباسىنا حالىقتى تۇرعىن ۇيمەن قامتاماسىز ەتۋگە باعىتتالعان باعدارلامالارى ءۇشىن زور العىسىن ءبىلدىردى.
«25 جىلدىڭ ىشىندە ەلىمىزدە قانشاما پاتەر سالىندى. مەن پاتەردى مەملەكەتتەن العانىما رازىمىن»-دەدى ول. «اراي» تۇرعىن ءۇي الابىنداعى كوپپاتەرلى تۇرعىن ءۇي سالۋ جۇمىستارى 2014 جىلى باستالدى.