مۇناي ەكسپورتتاۋشى ەلدەر ۇيىمىنا كىرمەيتىن مەملەكەتتەر سەنبى كۇنى مۇناي ءوندىرىسىن تاۋلىگىنە 562 مىڭ باررەلگە ازايتۋعا كەلىستى, دەپ حابارلايدى investing سايتى.
ۆەنادا ءوتىپ جاتقان سامميت بارىسىندا مۇناي ەكسپورتتاۋشى ەلدەر ءوندىرىستى ناقتى قانشا باررەلگە ازايتۋ كەرەكتىگى تۋرالى ۇزاق پىكىر تالاستىردى. سامميت باستالماس بۇرىن وپەك ۇيىمى وكىلدەرى ۇيىمعا كىرمەيتىن مەملەكەتتەردىڭ تاۋلىگىنە مۇناي ءوندىرىسىن 600 مىڭ باررەلگە ازايتۋعا مىندەتتەلەتىنىن ايتقان ەدى. ال ۇيىمنىڭ ءوزى 1.2 ملن باررەل ازايتاتىن بولىپ شەشكەن.
وسى ورايدا, ۇيىمعا كىرمەيتىن مەملەكەتتەردىڭ موينىنا جۇكتەلگەن 562 مىڭ باررەلدىڭ تەڭ جارتىسى رەسەيگە تيەسىلى بولماق. ال ءوندىرىس جاعىنان ەكىنشى ورىنداعى مەكسيكا شامامەن 100 مىڭ باررەلگە دەيىن ازايتادى. ال قازاقستان, ەنەرگەتيكا ءمينيسترى قانات بوزىمباەۆتىڭ ايتۋىنشا, قاراشاداعى كورسەتكىشتەن 20 مىڭ باررەلگە ازايتۋعا مىندەتتەلدى.
ءسال ەرتەرەك قانات بوزىمباەۆتىڭ ءوزى مۇناي ءوندىرىسىن قاراشاداعى كورسەتكىشتەن تۇسىرمەيتىنىن مالىمدەگەن ەدى.