پەتروپاۆلدا ەل تاۋەلسىزدىگىنىڭ 25 جىلدىعى قارساڭىندا 55, 75 جانە 90 پاتەرلى ءۇش ءۇي قولدانىسقا بەرىلدى. قوس مەرەكەمەن قۋانىش يەلەرىن وبلىس اكىمى ەرىك سۇلتانوۆ قۇتتىقتادى, دەپ حابارلادى Baq.kz.
«ءار ادام ءۇشىن جايلى باسپانا – تۇراقتىلىقتىڭ, بەرەكەنىڭ كەپىلى. سوندىقتان, ەلىمىزدە حالىقتى قولجەتىمدى تۇرعىن ۇيمەن قامتاماسىز ەتۋ ماسەلەسىنە ەرەكشە كوڭىل بولىنۋدە. ءبىزدىڭ وبلىستا جىل سايىن تۇرعىن ءۇي قۇرىلىسى ارتىپ كەلەدى. بىلتىر ءوسىم 17%-دى قۇراسا,بيىل 20%-دان استام كورسەتكىشكە جەتىپ وتىر», - دەدى ەرىك سۇلتانوۆ.
«بەرەكە» شاعىن اۋدانىنداعى جاڭا ۇيلەر 2015-2019 جىلدارعا ارنالعان «نۇرلى جول» ينفراقۇرىلىمدى دامىتۋ باعدارلاماسى بويىنشا «قازاقستان تۇرعىن ءۇي قۇرىلىس جيناق بانكى» اق جەلىسىمەن سالىنعان. ءىس-شارا بارىسىندا قونىس يەلەرىن «قازاقستان تۇرعىن ءۇي قۇرىلىس جيناق بانكى» اق باسقارما توراعاسىنىڭ ورىنباسارى ايجان مەدەۋوۆا دا قۇتتىقتادى.
«ءبىزدىڭ وڭىردە باعدارلاما اياسىندا 10 ءۇي سالىنىپ جاتىر. ونىڭ ۇشەۋىن بۇگىن قولدانىسقا بەردىك. ءالى 7 ءۇي بار. سولتۇستىك قازاقستان وبلىسىندا ءبىزدىڭ بانكپەن 24 مىڭ كەلىسىمشارت جاسالعان. سىزدەر بىزگە 10 ميللياردتان استام قاراجاتتى سەنىپ تاپسىردىڭىزدار», - دەدى ايجان مەدەۋوۆا.
«قازاقستان تۇرعىن ءۇي قۇرىلىس جيناق بانكى» اق-نىڭ جەرگىلىكتى اتقارۋشى ورگان سالىمشىلارى اراسىنان 220 وتباسىنا پاتەر كىلتى تابىستالدى.