بەيسەنبى كۇنى مۇناي باعاسى اپتالىق مينيمۋمنان كوتەرىلىپ, باررەلىنە 53 دوللاردان استى, دەپ حابارلايدى investing باسىلىمى.
ساراپشىلار قازىرگى كەزدە ەرتەڭگى بولاتىن وپەك ەلدەرى مەن ۇيىمعا كىرمەيتىن مۇناي ەكسپورتتاۋشى ەلدەردىڭ جيىنىندا نە ايتاتىنىن تالقىلاۋدا. وسى شارادا ءار ەل ءوزىنىڭ ناقتى قانشا باررەل قىسقارتاتىنىن بەلگىلەمەك.
كەشە استانا ۋاقىتىمەن 20:57-دە برەنت مۇنايى 1,09 پايىز ءوسىپ, 53,58 دوللارعا جەتتى.
دۇيسەنبى كۇنى قارا التىن باعاسى التى اپتالىق كورسەتكىشتە ەڭ تومەنگى دەڭگەيگە دەيىن ءتۇسىپ, ينۆەستورلاردىڭ وپەك كەلىسىمشارتى اياسىندا بەلسەندىلىگى كەسىرىنەن قۇلدىراپ كەتكەن ەدى.
ايتا كەتەيىك, 30 قاراشا كۇنى وپەك كەلەر جىلدان باستاپ ءوندىرىستى تاۋلىگىنە 1,2 ملن باررەلگە ازايتۋعا كەلىسكەن بولاتىن.
ءوز كەزەگىندە ۇيىمعا كىرمەيتىن مەملەكەتتەر وسى كەلىسىمنەن كەيىن تاۋلىگىنە 600 مىڭ باررەل قىسقارتۋعا كەلىسكەن.
وسى ورايدا ۇيىمنان شاقىرتۋ العان قازاقستان دا اتالعان جيىنعا قاتىساتىنىن جانە وپەك باستاماسىن قولدايتىنىن مالىمدەگەن بولاتىن.