كەشە ۇكىمەت ۇيىندە قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆ چەحيانىڭ ونەركاسىپ جانە ساۋدا ءمينيسترى يان ملادەكپەن كەزدەستى, دەپ حابارلادى پرەمەر-ءمينيستردىڭ ءباسپاسوز قىزمەتى.
كەزدەسۋ بارىسىندا ەلدەر اراسىنداعى الداعى ساۋدا-ەكونوميكالىق ىنتىماقتاستىقتىڭ كەلەشەگى, سونىمەن قاتار, جاڭعىرمالى ەنەرگەتيكا, ماشينا قۇراستىرۋ, اۋىل شارۋاشىلىعى, مادەني-ءبىلىم بەرۋ سالاسىنداعى ىنتىماقتاستىقتىڭ پەرسپەكتيۆالارى تالقىلاندى.
تابىستى ەكونوميكالىق ىنتىماقتاستىقتىڭ مىسالى رەتىندە قازاقستاندىق «ازيا اۆتو» اق بازاسىنداعى «Skoda» اۆتوكولىگىن قۇراستىرۋ بويىنشا كونۆەيەرلىك جەلى قىزمەتىن ايتۋعا بولادى. 2005 جىلدان باستاپ قازاقستاندا 69 669 ملن تەڭگە سوماسىندا 19 888 «Skoda» اۆتوكولىگى قۇراستىرىلعان.
تاراپتار ەكونوميكانىڭ ءتۇرلى سالالارىندا, سونىڭ ىشىندە مۇناي-گاز, اۋىل شارۋاشىلىعى, كولىك, قۇرىلىس, اۆتوكولىك ونەركاسىبى, تۋريزم, قورشاعان ورتانى قورعاۋ سالالارىنداعى ءوزارا ءتيىمدى ىنتىماقتاستىقتى ءارى قاراي نىعايتۋعا ءازىر ەكەنىن ءبىلدىردى.