باكۋدە وتكىزىلگەن تەمىر جول اكىمشىلىكتەرىنىڭ باسشىلارى ق.الپىسباەۆ, د.گۋربانوۆ, م.باحتادزەنىڭ جۇمىس بارىسىنداعى كەزدەسۋىندە قازاقستان, ازەربايجان, گرۋزيا اراسىندا جۇك تاسىمالى كولەمىن ءوسىرۋ تۋرالى ماسەلە تالقىلاندى, دەپ حابارلادى «قازاقستان تەمىر جولى» ۇك» اق-تىڭ ءباسپاسوز قىزمەتى.
كەزدەسۋگە قاتىسۋشىلار ءۇش ەل اراسىنداعى ترانسكاسپي حالىقارالىق دالىزىمەن 2017 جىلى جۇك اعىنىن ۇلعايتۋ ءۇشىن جۇمساق تاريف ساياساتىن ۇستانۋدىڭ قاجەتتىگىن العا تارتتى. 2020 جىلعا قاراي اتالعان باعىتتا كونتەينەرلىك پويىز مىڭ داناعا دەيىن جەتكىزىلمەك.
«قازاقستان تەمىر جولى» ۇك» اق باسشىسى قانات الپىسباەۆ جۇمىس ساپارى اياسىندا «گرۋزيا تەمىر جولى» اق باس ديرەكتورى مامۋكو باحتادزەمەن, «ازەربايجان تەمىر جولدارى» جاق توراعاسى دجاۆيد گۋربانوۆپەن ەكىجاقتى كەلىسسوزدەر وتكىزدى. تاراپتار كولىك جانە لوگيستيكا سالالارىنداعى ءوزارا سەرىكتەستىكتى ودان ءارى دامىتۋ, ونىڭ ىشىندە تەمىر جول كولىگى ماشيناسىن جاساۋ جايىن تالقىلادى.
د.گۋربانوۆپەن كەزدەسۋدە اعىمداعى جىلى ازەربايجانعا «لوكوموتيۆ قۇراستىرۋ زاۋىتى» اق-تىڭ ءونىمى «Evolution» سەرياسىنداعى 10 جۇك تەپلوۆوزى ءجىبەرىلگەندىگى ايتىلدى. كەلەسى جىلدان باستاپ ازەربايجان تەمىرجولىنا «ەلەكتروۆوز قۇراستىرۋ زاۋىتى» جشس وندىرىسىنەن شىققان ەلەكتروۆوزدار جىبەرىلە باستايدى. 2019 جىلعا دەيىن ازەربايجانعا 40 ەلەكتروۆوز جەتكىزۋ جوسپارلانىپ وتىر.
كەزدەسۋ سوڭىندا «قازاقستان تەمىر جولى» ۇك» اق پەن «ازەربايجان تەمىر جولدارى» جاق اراسىندا تەمىر جول كولىگى ماشينالارىن جاساۋ سالاسىنداعى سەرىكتەستىك تۋرالى مەموراندۋمعا قول قويىلدى. تەمىر جول كولىگى ماشيناسىن جاساۋ سالاسىنداعى سەرىكتەستىك تۋرالى مەموراندۋم «گرۋزيا تەمىر جولى» اق-پەن دە جاسالدى.
«قازاقستان تەمىر جولى» ۇك» اق باسشىسى قانات الپىسباەۆ دۋشانبەگە ساپارىندا «روحي وحاني توچيكيستون» مۋك باستىعى كوميل ميرزواليمەن كەلىسسوز جۇرگىزدى. كەزدەسۋدىڭ كۇن تارتىبىنە سايكەس تەمىر جول كولىگى ماشينالارىن جاساۋ سالاسىنداعى سەرىكتەستىكتى دامىتۋ مەن تاجىكستان اۋماعىندا جۇكتەردى شوعىرلاندىرۋ جانە تاسىمالداۋ كولەمىن ارتتىرۋ ماسەلەسى قارالدى. سونداي-اق, 2017-2020 جىلدارى قازاقستاندىق تەمىر جول كولىگى ماشينالارىن تاجىك تەمىر جولىنا جەتكىزۋ تۋرالى كەلىسىم جاسالدى.