ماسەلەلەرى تۋرالى زاڭ جوباسى قارالدى
پارلامەنت سەناتى الەۋمەتتىك مادەني-دامۋ جانە عىلىم كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مىندەتتى الەۋمەتتىك مەديتسينالىق ساقتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى, دەپ حابارلادى سەناتتىڭ ءباسپاسوز قىزمەتى.
زاڭ جوباسىمەن مىندەتتى الەۋمەتتىك مەديتسينالىق ساقتاندىرۋ جۇيەسى جۇمىسىنىڭ باستالۋىن 2017 جىلدىڭ 1 ءشىلدەسىنەن 2018 جىلدىڭ 1 قاڭتارىنا اۋىستىرۋ ماقساتىندا «مىندەتتى الەۋمەتتىك مەديتسينالىق ساقتاندىرۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مىندەتتى الەۋمەتتىك مەديتسينالىق ساقتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدارعا تۇزەتۋلەر ەنگىزىلەدى.
وسىعان بايلانىستى الەۋمەتتىك مەديتسينالىق ساقتاندىرۋ قورىنا مەملەكەتتىڭ جارنالارىن اۋدارۋدى 2017 جىلدىڭ 1 شىلدەسىنەن 2018 جىلدىڭ 1 قاڭتارىنا اۋىستىرۋ ۇسىنىلادى. جۇمىس بەرۋشىلەردىڭ اۋدارىمدارى مەن دارا كاسىپكەرلەردىڭ, جەكە نوتاريۋستاردىڭ, جەكە سوت ورىنداۋشىلارىنىڭ, ادۆوكاتتاردىڭ, كاسىبي مەدياتورلاردىڭ, ازاماتتىق-قۇقىقتىق سيپاتتاعى شارتتار بويىنشا كىرىس الاتىن جەكە تۇلعالاردىڭ جارنالارىن قورعا اۋدارۋ 2017 جىلدىڭ 1 قاڭتارىنان 2017 جىلدىڭ 1 شىلدەسىنە اۋىستىرىلادى.
زاڭ جوباسىمەن, سونداي-اق بيۋدجەت كودەكسىنە, «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە جانە «ءبىلىم تۋرالى» زاڭعا ينتەرناتتىق ۇيىمداردى قوسپاعاندا, ورتا ءبىلىم بەرۋ ۇيىمدارىنىڭ ءبىلىم الۋشىلارى مەن تاربيەلەنۋشىلەرىنە مەديتسينالىق قىزمەت كورسەتۋلەردى ءبىلىم بەرۋ جۇيەسىنەن دەنساۋلىق ساقتاۋ جۇيەسىنە بەرۋ بولىگىندە تۇزەتۋ ەنگىزۋ كوزدەلەدى.
وتىرىستا دەنساۋلىق ساقتاۋ جانە الەۋمەتتىك دامۋ ءمينيسترىنىڭ ورىنباسارى ا.تسويدىڭ بايانداماسىندا جوبا تۋرالى جان-جاقتى ايتىلدى. الەۋمەتتىك-مادەني دامۋ جانە عىلىم كوميتەتىنىڭ مۇشەسى ءا.بەكتاەۆ قوسىمشا بايانداما جاسادى. وتىرىس بارىسىندا زاڭ جوباسى بويىنشا دەپۋتاتتار ب.ءايتىموۆا, س.بەكتۇرعانوۆ, ءا.بەكتاەۆ, ج.ەرعاليەۆتىڭ قويعان ساۋالدارىنا مينيستردىڭ ورىنباسارى ا.تسوي جاۋاپ بەردى.
كوميتەت توراعاسى ب.ءايتىموۆا ەلىمىزدىڭ تۇرعىندارى ءۇشىن مىندەتتى الەۋمەتتىك ساقتاندىرۋدىڭ ماڭىزىن اتاپ وتە كەلىپ, ونى پارلامەنت سەناتىنىڭ وتىرىسىندا ءبىرىنشى وقىلىمدا تالقىلاۋعا شىعارۋدى ۇسىندى.
زاڭ جوباسى پالاتانىڭ قاراۋىنا جىبەرىلدى.