كۇيدىڭ ءتاتتى كۇمبىرى

الماتىداعى عىلىم ورداسىندا پرەزيدەنت ستيپەندياسىنىڭ يەگەرى, حالىقارالىق جانە رەسپۋبليكالىق بايقاۋلاردىڭ لاۋرەاتى, پ.چايكوۆسكي اتىنداعى الماتى مۋزىكالىق كوللەدجى حالىق اسپاپتارى ءبولىمىنىڭ مەڭگەرۋشىسى, ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ اعا وقىتۋشىسى سايات اقباسوۆتىڭ «كۇي – كونەنىڭ كۇمبىرى» اتتى مەرەكەلىك كونتسەرتى ءوتتى. باعدارلامادا باتىس, ارقا, جە­تىسۋ, قاراتاۋ, ماڭعىستاۋ, سىر بويى, التاي-تارباعاتاي ايما­عى­نىڭ كۇيشىلىك داستۇرىندەگى سيرەك ورىندالىپ جۇرگەن تۋىندىلار مەن حالىق كۇيلەرى جانە حالىق كوم­پوزيتورلارىنىڭ شىعارمالارى جۇرتشىلىق نازارىنا ۇسىنىلدى. كەش بارىسىندا كۇيشىنىڭ جارى, حالىقارالىق, رەسپۋبليكالىق باي-قاۋلاردىڭ لاۋرەاتى ۆالەنتينا ەلەۋسىنوۆا «شالقىما» فول­كلور­لىق ءانسامبلىنىڭ سۇيەمەل­دەۋىمەن ءان شىرقاسا, حالىقارالىق بايقاۋلاردا توپ جارىپ جۇرگەن شاكىرتتەرى بەك­بولات ابدىبەرىك ۇلى, ايبەك ءارىم­بەك, ءاليحان پايىز, ەسىم­حان تولەم­باي كۇمبىرلەتە كۇي توكتى. – الماتىنىڭ 1000 جىلدىعى مەن تاۋەلسىزدىكتىڭ 25 جىلدىق مە­رەكەسىنە ەل ازاماتتارى تاي­لى-تاياعىمەن ۇلەس قوسىپ جاتىر. وسىنداي ۇلىق مەيرامدار قاتار كەلىپ, «اق تۇيەنىڭ قارىنى جا­رىلعان» تۇستا, اتقا قامشى سالماساق, ونەردە جۇرگەنىمىز بەكەر بولماي ما؟ نۇرسۇلتان نازارباەۆتىڭ جارلىعىمەن پرەزي­دەنت ستيپەنديانتى رەتىندە كەزىندە كونسەرۆاتورياعا ەمتيحانسىز قا­بىلدانىپ, تەگىن ءبىلىم الدىم. ەلباسىنىڭ دەمەۋىنە العىسىمدى بىلدىرە وتىرىپ, سول جاقسىلىقتىڭ بوسقا كەتپەگەنىن, ۇستاز رەتىندە, دومبىراشى رەتىندە مادەنيەت پەن ءبىلىم سالاسىنا ۇلەس قوسىپ جات­قانىمدى ەل-جۇرتقا كورسەتكىم كەلدى, – دەيدى سايات اقباسوۆ. ايناش ەسالي, «ەگەمەن قازاقستان» الماتى