«قاراوزەك» كومپرەسسورلىق ستانساسى اقتوبە وبلىسىندا جۋىردا عانا ىسكە قوسىلعان «بوزوي» ستانساسىمەن قاتارلاس جۇمىس ىستەپ, «بەينەۋ-بوزوي-شىمكەنت» ماگيسترالدى گاز قۇبىرىنىڭ وتكىزۋ قابىلەتتىلىگىن 15 ملرد تەكشە مەترگە دەيىن ۇلعايتۋعا مۇمكىندىك بەرەدى.
ەكى ستانسا دا سوڭعى ۇلگىدەگى, جوعارى تەحنولوگيالار نەگىزىندە سالىنعان جانە كۇردەلى رەجىم جاعدايىندا دا ۇزدىكسىز پايدالانۋعا ارنالعان گاز ايداۋشى اگرەگاتتارمەن جانە قوسالقى جابدىقتارمەن جاساقتالعان. ايتا كەتەرلىگى, قۇرىلىستىڭ كۇردەلىلىگىنە قاراماستان, «قازترانسگاز» اق وسى ينۆەستيتسيالىق جوبانى جوسپارلانعان مەرزىمىنەن جارتى جىلعا ەرتە اياقتاپ وتىر.
كومپانيا وكىلدەرىنىڭ پىكىرىنشە, قۇرىلىستى مەرزىمىنەن بۇرىن اياقتاۋعا, «قاراوزەك» كس سالۋ كەزىندە ىشكى رەزەرۆتەگى گاز ايداۋ قوندىرعىلارىن وڭتايلى پايدالانۋ ارقىلى قول جەتكىزىلگەن. بۇل 10 ملرد تەڭگە ۇنەمدەۋگە مۇمكىندىك بەردى.
ترانزيتتىك الەۋەتتى ۇلعايتۋدان بولەك, «قاراوزەك» كومپرەسسورلىق ستانساسى تاعى ءبىر ماڭىزدى مىندەتتى شەشۋگە ارنالعان. ونىڭ قۇرىلىسى قازاقستاننىڭ ەلورداسى استانانى تابيعي گازبەن جابدىقتاۋ, سونداي-اق, ەلدىڭ ورتالىق جانە سولتۇستىك وڭىرلەرىن كوگىلدىر وتىنمەن قامتاماسىز ەتۋ ەسەبىمەن سالىندى.
گاز ماماندارىن قۇرىلىس جوباسىنىڭ ءساتتى اياقتالۋىمەن قۇتتىقتاعان «قازمۇنايگاز» ۇك» اق ۆيتسە-پرەزيدەنتى قايرات شارىپباەۆ, ىرگەلى قۇرىلىس جوبالارىنىڭ بۇكىل ەلدىڭ گاز تاسىمالى سالاسى ءۇشىن ستراتەگيالىق ماڭىزى بار ەكەنىن اتاپ ءوتتى. «بۇگىنگى كۇنى تمد ەلدەرىنىڭ اۋماعىندا «بوزوي» جانە «قاراوزەك» كومپرەسسورلىق ستانسالارىمەن تەڭ كەلەتىن ينفراقۇرىلىمدىق نىسان جوق دەسە دە بولادى. بۇل گاز تاسىمالى سالاسىنىڭ الەۋەتىن ارتتىرۋمەن قاتار, ەلباسى نۇرسۇلتان نازارباەۆتىڭ 2018 جىلعا دەيىن قازاقستاندىق نارىقتىڭ قاجەتتىلىگىن تولىقتاي وتاندىق گازبەن قامتاماسىز ەتۋ جونىندەگى مىندەتتەمەسىن شەشۋدەگى تاعى ءبىر ماڭىزدى قادام», دەگەن پىكىرىن ءبىلدىردى.
ەرتىلەۋ شاحمۇرات ۇلى