2017 جىلدىڭ اياعىنا دەيىن قالادا ماكۋلاتۋرا جيناۋعا ارنالعان ارنايى جاشىكتەر قويۋ جوسپارلانعان.
2012 جىلدان بەرى استانادا قوقىستى قايتا وڭدەيتىن كەشەن جۇمىس ىستەيدى. وندا سۇرىپتالىپ, ەلوردادان جينالعان قوقىستار وڭدەلەدى. قازىر زاۋىتتا قالدىقتى قابىلداۋ كولەمى تاۋلىگىنە 700 توننانى قۇرايدى. قايتا وڭدەۋ تەرەڭدىگى - 8%. ال قالعان 92% پوليگونعا كومۋگە اپارىلادى. ونداي قوقىستار استانا-پاۆلودار تاسجولىنىڭ التىنشى شاقىرىمىندا ورنالاسقان قالدىقتاردى كومۋگە ارنالعان جالعىز ارنايى رۇقسات ەتىلگەن ورىنعا شىعارىلادى.
استانا اۋماعىنان قوقىستاردى شىعارۋعا قوقىس تازالايتىن مەكەمەلەردىڭ مامانداندىرىلعان 70-تەن استام تەحنيكاسى جۇمىلدىرىلعان. كوممۋنالدىق قالدىقتاردىڭ جينالۋ نورماسى اباتتاندىرىلعان سەكتوردىڭ ءبىر تۇرعىنىنا 2,16 م³ قتق (قاتتى تۇرمىستىق قالدىقتار) جىلىنا جانە جەكە سەكتور تۇرعىنىنا - 2,3 م³ قۇرايدى. اي سايىنعى قوقىستى شىعارۋ ءتاريفى ادام باسىنا 260 تەڭگە.
مەملەكەت باسشىسىنىڭ تاپسىرماسى بويىنشا, استانا قالاسىنىڭ اكىمدىگى «PricewaterhouseCoopers» حالىقارالىق كونسالتينگتىك كومپانيامەن بىرلەسىپ, ەلوردادا قالدىقتاردى باسقارۋ بويىنشا باعدارلاما جوباسىن جاسادى. باعدارلامادا «جاسىل ەنەرگيا» وندىرەتىن قالدىقتاردى قايتا وڭدەۋ بويىنشا يننوۆاتسيالىق تەحنولوگيا ەنگىزۋ قاراستىرىلادى جانە ورگانيكالىق قالدىقتاردى مەتانيزاتسيالاۋ بويىنشا تەحنولوگيا ورناتۋ ارقىلى بيوگاز الۋ جانە قالدىقتاردى وڭدەۋ تەرەڭدىگىن 2019-2020 جىلدارى 75%-عا جەتكىزۋ كوزدەلگەن. قالعان 25 پايىز قتق (كۇل, قۇم, ت.ب.) پوليگوندا كومىلەدى.