حVIII عاسىردا ءومىر سۇرگەن اتاقتى كۇيشى, قوڭىر ءۇندى قوبىزدىڭ قۇلاعىندا ويناعان تىلەپ اسپانتاي ۇلىنىڭ ەسىمى قور قىزىنداي قۇلپىرعان سارىقىز سۇلۋمەن تىكەلەي بايلانىستى. كيەلى قوبىز ءۇنى تابىستىرعان عاشىقتاردىڭ ءبىر-بىرىنە دەگەن شىنايى سەزىمى, ىستىق ىقىلاسى كورەرمەن جۇرەگىن سەلت ەتكىزبەي قويمايدى. مىنا جالعان دۇنيەنىڭ وتكىنشى ەكەنىنە, ءبارى دە وتەر, كەتەر, تەك ماڭگىلىك ماحابباتىڭ ولمەيتىنىنە كوز جەتكىزدىرەدى. ادام بالاسىنا بەرىلگەن ساناۋلى عۇمىردىڭ ءمانىن ۇعىندىرادى, ساناڭدا جۇرگەن سانسىز ويلارعا جاۋاپ ىزدەيدى. شىعارمادا حالقىمىزدىڭ ۇلتتىق سالت ءداستۇرى مەن ساباقتاستىعى ايقىن كورىنىس تاپقان. سونداي اق, ساحنانىڭ ءسانىن دەكوراتسيالىق تۇستارى اشا تۇسكەندەي. قالىڭ نۋ ورمان, سىڭسىعان توعاي, شىقىلىقتاعان قۇستار ءۇنى, قوبىزدىڭ مۇڭلى داۋىسى, دومبىرانىڭ شاناعىنان توگىلگەن ءان سول زاماننىڭ بەينەسىن كوز الدىڭىزعا اكەلەدى. «كەزىندە تورعاي وڭىرىندە تىلەپ دەگەن مىقتى قوبىزشى, باقسى بولعان ەكەن. بىردە سونىڭ جەتىنشى ۇرپاعى استانالىق ساپار ىسقاقوۆ ماعان كەلىپ, ۇسىنىس ايتتى. مەن تەاتردىڭ كوركەمدىك جاعىنا قارجىلىق قولداۋ جاسايىن, وسى شىعارمانى قويىپ كورسەڭىزدەر, دەدى. استانادان «قوبىز سارايىن» سالعىزعان دا وسى ازامات بولاتىن. بۇدان بۇرىن بۇل شىعارما بويىنشا اعىلشىندار بالەت قويعان. ول قويىلىم الماتىدا كورسەتىلگەن بولاتىن. بۇل تۋىندى دا كوڭىلىمىزدەن شىعىپ, حالىققا ۇسىنىپ وتىرمىز, − دەيدى رەجيسسەر, قازاقستاننىڭ ەڭبەك سىڭىرگەن قايراتكەرى نۇرقانات جاقىپباي. ايتا كەتەيىك, شىعارما ن.ايت ۇلىنىڭ «سارىقىز» پوەماسىنىڭ جەلىسى بويىنشا جازىلعان. اۆتورى − سوم جۇرەك نازار. قويۋشى سۋرەتشى − ەرلان تۇياقوۆ. باس كەيىپكەر تىلەپتى – مۇحتارحان ماناپ, تىلەپتىڭ جاس كەزىن – مەيىرعات امانگەلدين, سارىقىزدى – نازەركە سەرىكبولوۆا سومداپ شىقتى. ايمان مۇقىشەۆا, «ەگەمەن قازاقستان».
استاناداعى جاستار تەاترىندا رەجيسسەر ن.جاقىپبايدىڭ «تىلەپ سارىقىز» اتتى تراگەديالىق قويىلىمى ساحنالاندى. وندا قازاق حالقىنىڭ باسىنان كەشكەن تاريحى, جاۋگەرشىلىك زامان, قوس عاشىقتىڭ قوسىلا الماي كەتكەن بايانسىز, كەلتە ماحابباتى سۋرەتتەلەدى.