قىمىزمۇرىندىق – قىستان امان-ەسەن شىققان, جازعا سالىم بيە بايلاپ, العاشقى قىمىز ىشەتىن كۇن. كوپكە بۇيىرسىن دەگەن تىلەكپەن اۋىل قىمىزمۇرىندىققا شاقىرادى. جەرگىلىكتى اسسامبلەيانىڭ ۇيىمداستىرۋىمەن وتكەن مەرەكەدە اينالا كيىز ۇيلەر تىگىلىپ, شاشۋ شاشىلىپ,جينالعان جاستار جاعى التىباقاندا تەربەلدى. «ەكسپو-2017» كورمەسىنە وراي حالىقارالىق دەڭگەيدە ۇيىمداستىرىلعان شاراعا «قىمىزمۇرىندىق» فولكلورلىق-ەتنوگرافيالىق ء سان-سالتاناتتى مەرەكەگە رەسەي, قىرعىزستاننان الماتى, قاراعاندى, اقمولا وبلىستارىنان قوناقتار كەلىپ, قازاق قىمىزىنان ءدام تاتتى. ومبىلىق قازاق ۇلتتىق اۆتونومياسىنىڭ وكىلدەرى دە ومبى قازاقتارىنىڭ قىمىزىن الا كەلىپتى. اۋدان اۋىلداردان كەلگەن ونەرپازدار اننەن شاشۋ شاشتى. قولونەر شەبەرلەرى وزدەرى جاساعان ويۋ-ورنەككە تولى ءتۇرلى ۇلتتىق بۇيىمدارىنىڭ كورمەسىن وتكىزدى.
مەرەكەگە كەلگەن قازاقستان حالقى اسسامبلەياسىنىڭ مۇشەسى ءاپريزا قۇسايىنوۆانىڭ ايتۋىنشا, قىمىزمۇرىندىق العاش رەت 1992 جىلى اقمولادا وتكىزىلىپتى.
«سوڭعى كەزدەرى ەلىمىزدە ءوتىپ جاتقان تويلاردا قىمىز ىشەدى. بۇگىنگى توي مەرەكەسىنە كاسىپكەرلەر جاڭاارقانىڭ قىمىزىن الا كەلىپتى. بۇل مەرەكە ناۋرىز مەيرامى سياقتى مارتەبەگە يە بولسىن», دەيدى.
قىمىزمۇرىندىقتا پرەزيدەنت اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى لەونيد پروكوپەنكو پاۆلودارلىقتاردى ايتۋلى مەرەكەمەن قۇتتىقتاپ, ءوزى دە قىمىزدان ءدام تاتتى.
«قىمىزدىڭ دەرتكە ءدارى ەكەنىن, ناعىز شيپالى سۋسىن ەكەنىن كورسەتۋگە ءتيىسپىز», دەيدى لەونيد پروكوپەنكو.
مەرەكەدە جينالعان جۇرتشىلىق بيە ساۋمەن جانە قىمىزدىڭ جاسالۋ جولدارىمەن تانىستى. وبلىستاعى اتاقتى «ساعىپ» شارۋا قوجالىعى قىمىزمۇرىندىققا 1 توننادان استام قىمىز بەن قۇرت اكەلىپتى.
فاريدا بىقاي, «ەگەمەن قازاقستان»
سۋرەتتەردى تۇسىرگەن: ماقسات ايتباەۆ