سوندا ەلباسى «قازاقتىڭ قاي جەرى دە قازاقتىكى. مىنا تۇرعان بۇرىنعى نارىنقول اۋدانى شەكاراعا تاياۋ, كوپ جەرى بوساپ قالدى. تابيعاتى عاجاپ. سولتۇستىكتىڭ كوپ اۋداندارىندا تاريحي وتانىنا كوشكەن حالىقتاردىڭ ەسەبىنەن ادام سانى ازايدى. وتانىنا ورالعىسى كەلگەن اعايىنداردى ەڭ الدىمەن وسى وڭىرلەرگە قونىستاندىرۋعا ىقپال ەتۋ كەرەك», دەگەن بولاتىن.
راسىندا, قازاقتىڭ قاي ءوڭىرىنىڭ دە الاش بالاسىنا بوتەندىگى جوق. ءوز جەرى, ولەڭ توسەگى. ال وڭتۇستىكتىڭ كوپتەگەن اۋداندارىندا ادام سانى كوبەيىپ, شاعىن بولسا دا جەر الىپ, كاسىپكەرلىكپەن اينالىسۋ قيىنداپ كەتتى. سوندىقتان, جۇمىسسىزدىق ماسەلەسى ۋشىعىپ بارادى. وڭتۇستىكتىڭ قازاعىن سولتۇستىككە كوشىرۋ يدەياسىن قولداعان ازاماتتاردىڭ ءبىرى وبلىستىق ءماسليحاتتىڭ دەپۋتاتى جاڭاباي اعابەكوۆ ەكى-ءۇش جىلدان بەرى وسى ماسەلەمەن تۇبەگەيلى اينالىسىپ ءجۇر. ءوز قالتاسىنان قارجى شىعارىپ, جۇزدەگەن وتباسىنى سولتۇستىك قازاقستان وبلىسىنىڭ اۋداندارىنا اپارىپ قايتتى. ونداعى بيلىك باسىنداعى ازاماتتارمەن كەزدەسىپ, جاعدايدى تارازىلاپ ءجۇر.
جاقىندا ەكى اۆتوبۋسپەن جولعا شىققان كوشتىڭ العاشقى توبىن «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى ءالىمجان قۇرتاەۆ پەن وبلىس اكىمىنىڭ ورىنباسارى ەربول سادىر باستاعان جەرگىلىكتى بيلىك وكىلدەرى شىعارىپ سالدى.
– بۇعان دەيىن قونىس اۋدارعان ازاماتتاردىڭ 70 پايىزى جۇمىسپەن قامتىلدى. ولار ءوز ماماندىقتارى بويىنشا جۇمىسقا ورنالاسۋمەن قاتار, اۋىل شارۋاشىلىعى سالاسىندا مال, ەگىن شارۋاشىلىعىمەن اينالىسۋعا 7 مىڭ گەكتاردان استام جەر الىپ, بىرنەشە اۋىل كووپەراتيۆتەرىن قۇرىپ, جەكە كاسىپكەرلىك اشىپ, ىستەرىن دوڭگەلەتىپ وتىر. سوندىقتان, ساپارلارىڭىز ءساتتى بولىپ, سولتۇستىكتىڭ ەلىنە ەل بولىپ قوسىلۋلارىڭىزعا تىلەكتەسپىز, – دەدى وبلىس اكىمىنىڭ ورىنباسارى ەربول سادىر شىعارىپ سالۋ راسىمىندە.
وڭتۇستىك قازاقستان تۇرعىندارىن ەلىمىزدىڭ جۇمىس كوزى كوپ ايماقتارىنا قونىس اۋدارۋ شاراسى اياسىندا اتالعان وتباسىلار سولتۇستىكتىڭ ايىرتاۋ, اقجار, جۇماباەۆ, ەسىل جانە ءۋاليحانوۆ اۋداندارىنا بارىپ قونىستانباق.
بيىل قونىس اۋدارعان وتباسىنىڭ ءار مۇشەسىنە 35 ايلىق ەسەپتىك كورسەتكىش كولەمىندە, ياعني شامامەن 80 مىڭ تەڭگە ءبىر رەتتىك كومەك بەرىلەدى. سونىمەن قاتار, ءبىر جىلعا دەيىن تۇراتىن ءۇيدىڭ جالداۋ اقىسى مەن كوممۋنالدىق تولەمدەرى وتەلەتىن بولادى.
ارينە, بۇرىن جىلى جاقتا تۇرعان حالىقتىڭ سولتۇستىكتىڭ قاتالداۋ اۋا رايىنا بىردەن كوندىگىپ كەتۋى قيىنداۋ سوعادى. سوندىقتان, العاشقى كەزەڭدە ولارعا ءسىڭىcىپ كەتۋ ءۇشىن جاناشىرلىق, قولداۋ كەرەك. وسى يگى ىسكە مۇرىندىق بولىپ جۇرگەن وبلىستىق ءماسليحاتتىڭ دەپۋتاتى جاڭاباي اعابەكوۆ قونىس اۋدارۋشىلار بىردەن شارۋاشىلىقپەن اينالىسۋى ءۇشىن ءار وتباسىنا 130-150 مىڭ تەڭگە كولەمىندە كوكونىس داقىلدارىنىڭ تۇقىمىن الىپ بەرۋگە ۋادە ەتتى. بۇل – سۇيسىنەرلىك, ۇلگى الاتىن جايت.
ءساۋىر ايىندا وڭتۇستىككە سولتۇستىكتەن ارنايى كەلگەن جۇمىس بەرۋشىلەر بوس جۇمىس ورىندارىنا جارمەڭكە وتكىزگەن بولاتىن. ازىرگە, مىڭعا تارتا وتباسى قونىس اۋدارۋعا نيەتتەرىن ءبىلدىردى.
قازاق مۇندايدا «كوش كولىكتى بولسىن!» دەگەن اق تىلەك ايتادى.
باقتيار تايجان, «ەگەمەن قازاقستان»
وڭتۇستىك قازاقستان وبلىسى