2014 جىلدىڭ 27 تامىزىنا دەيىن پارتيانى باسقارىپ كەلگەن رەجەپ تايپ ەردوعان سول كەزدەگى پرەزيدەنتتىك سايلاۋعا بايلانىستى پارتيا باسشىلىعىن احمەت داۋىتوعلۋعا تاپسىرعان ەدى. ا.داۋىتوعلۋ بۇل لاۋازىمدا 2016 جىلدىڭ كوكتەمىنە دەيىن بولىپ, ودان كەيىن پارتيانىڭ تىزگىنىن ەلدىڭ ۇكىمەت باسشىسى بينالى يىلدىرىم ۇستادى.
سەزدە پارتيا كوميتەتتەرىنىڭ باسشىلىعىندا دا اۋىس-تۇيىستەر بولىپ, ساياسي ۇيىم قاتارىنا بىرقاتار جاڭا مۇشەلەر قوسىلدى. وسىلايشا 998 كۇننەن كەيىن پارتيا باسشىلىعىنا قايتا سايلانعان ەل پرەزيدەنتى ءوز سوزىندە سايلاۋشىلار مەن بارلىق پارتيا مۇشەلەرىنە العىس بىلدىرە كەلىپ, بۇگىننەن باستاپ پارتيانىڭ جاڭا داۋىرگە اياق باساتىنىن ايتتى:
«پارتيا قۇرىلعالى بەرگى 16 جىل ىشىندە تۇركيانىڭ تۇراقتى دامۋى مەن ودان ءارى ءوسىپ-وركەندەۋىندە «ادىلەت جانە دامۋ» پارتياسىنىڭ اسەرى وراسان بولدى جانە الداعى ۋاقىتتا دا پارتيامىز مەملەكەتىمىزدىڭ دامۋىندا ءوز ءرولىن ارتتىرا بەرمەك. اسىرەسە, سوڭعى جىلدارداعى تەرروريزمگە قارسى كۇرەس پەن ەلدى دەموكراتيالاندىرۋ جولىنداعى جۇمىستار ءوز ناتيجەسىن بەرۋدە», – دەگەن پارتيا باسشىسى ەلدى ءارى قاراي دامىتۋ ءۇشىن الداعى ۋاقىتتا بىرقاتار رەفورمانىڭ جۇرگىزىلۋى ىقتيمال ەكەنىن دە ايتىپ قالدى.
الدىمەن 2019 جىلعا دەيىنگى, ودان كەيىن 2023 جىلعا دەيىنگى جۇمىس جوسپارىمەن تانىستىرعان تۇركيا پرەزيدەنتى ء وز ءسوزىن بىلاي جالعادى: «بيىل جىل سوڭىنا دەيىن پارتيا ۇكىمەتپەن بىرلەسە وتىرىپ ناقتى دامۋ جوسپارىن دايىندايدى. بۇل پارتيانىڭ جاڭاشا باعىتتا دامۋىنا بەت بۇراتىن تاريحي جىل بولماق. بۇگىنگە دەيىنگى اتقارىلىپ كەلگەن جۇمىستارعا قارقىن بەرە ءتۇسۋىمىز كەرەك», – دەدى پارتيا باسشىسى. سونىمەن قاتار, ول پارتيانىڭ حالىقپەن جۇمىس ىستەۋىنىڭ ماڭىزىنا دا توقتالدى.
«پارتيا مۇشەلەرى ءبىر ءۇيدىڭ بالالارىنداي ءبىر ماقسات ءۇشىن قىزمەت ەتىپ كەلەدى. تاڭداعان باعىتىمىزدىڭ دۇرىس ەكەنى ءسوزسىز. ەگەر پارتيا جۇمىسىنا قانداي دا ءبىر ۇسىنىس-ەسكەرتپەلەرى بار ازاماتتار بولسا, ءبىز ولاردىڭ ءسوزىن تىڭداۋعا ءازىرمىز. بۇل تۇرعىدا ءبىز كەلىپ جاتقان ۇسىنىستاردى قاراستىرىپ تا جاتىرمىز. پارتيانىڭ نەگىزگى ۇستانىمى – حالىقتى بيلەۋ ەمەس, كەرىسىنشە حالىققا قىزمەت ەتۋ», – دەپ جالعادى ءسوزىن ر.ەردوعان.
سونىمەن قاتار, پارتيا باسشىسى تۇركيانىڭ ۇلكەن وزگەرىستەر الدىندا تۇرعانىن ايتا كەلىپ, ەلدىڭ بيلىك جۇيەسىنە ەنگىزىلگەن وزگەرىستەردىڭ (ەلدىڭ پارلامەنتتىك باسقارۋدان پرەزيدەنتتىك باسقارۋعا ءوتۋى – رەد.) دەر كەزىندە جۇرگىزىلگەنىن, 2019 جىلعا دەيىن ەلدە ءىرى ەكونوميكالىق رەفورمالاردىڭ قولعا الىناتىنىن مالىمدەدى. سونىڭ ىشىندە 2019 جىلعا دەيىنگى جۇمىسپەن قامتۋ جانە كاسىپكەرلىكتى دامىتۋ باعىتىنداعى جۇمىستارعا قارقىن بەرىلەتىنىن ايتتى. ونىڭ سوزىنشە, تۇركيا ەكونوميكاسىن كوتەرەتىن نەگىزگى ەكى سالا وسى بولماق.
بۇدان بولەك, رەجەپ تايپ ەردوعان ۇكىمەتتىڭ تەرروريزمگە قارسى كۇرەس جۇمىستارىنا دا توقتالدى.
«ەلدىڭ بىرلىگى مەن تىنىشتىعىنا نۇقسان كەلتىرەتىن توپتار مەن جەكەلەگەن ادامدارعا قارسى قاتاڭ شارالار قولدانىلادى. تاۋەلسىزدىگىمىزگە قاتەر توندىرەتىن ارەكەتتەرگە ەلدە ورىن جوق. ەلدىڭ ەگەمەندىگىن قورعاۋدا بارشا تۇرىك حالقى تىزە قوسىپ جۇمىس ىستەيتىنىن قاستاندىق ويلايتىن ۇيىمدار مەن توپتار ەستەرىندە ساقتاسىن», – دەدى ر.ەردوعان.
وسىلايشا تۇركيادا پارتيا بيلىگىنە سۇيەنگەن پرەزيدەنتتىك كەزەڭ باستالىپ وتىر.
باۋىرجان مۇقانوۆ, «ەگەمەن قازاقستان»