«وزدەرىڭىز بىلەسىزدەر, تاۋەلسىز قازاقستاننىڭ قالىپتاسۋىنان باستاپ مەملەكەتتىڭ وركەندەۋى جولىنداعى بارلىق باستامالار ۇلت كوشباسشىسى, ەلباسىنىڭ ەسىمىمەن تىكەلەي بايلانىستى. بۇگىندە, ەلباسىنىڭ سارابدال ساياساتىنىڭ ارقاسىندا ەلىمىزدىڭ ەكونوميكاسى كەمەلدەنگەن, دامۋدىڭ داڭعىل جولىن ۇستانعان قۋاتتى مەملەكەتكە اينالدى. ءبىزدىڭ ايماعىمىزدا جۇزەگە اسىپ جاتقان يگىلىكتى ىستەردىڭ بارلىعى دا, ەلباسىنىڭ تىكەلەي قولداۋىنىڭ جانە حالىقتىڭ ءال-اۋقاتىن ارتتىرۋعا باعىتتالعان مەملەكەتتىك باعدارلامالاردىڭ ناقتى كورىنىسى», دەدى ايماق باسشىسى.
سول جاعالاۋدا ءبىرىنشى كەزەكتە بولىنگەن 9,8 گا اۋماقتا بۇگىن 18 كوپقاباتتى تۇرعىن ۇيلەردىڭ جانە 320 ورىندىق بالاباقشانىڭ قۇرىلىس جۇمىستارى باستالدى. مۇنداعى نىساندار قۇرىلىس كومپانيالارىنىڭ ءوز قاراجاتتارى ەسەبىنەن جانە مەملەكەتتىك-جەكەشەلىك ادىسىمەن سالىنۋدا.
سونىمەن قاتار, وسى شاعىن اۋداندا جاستار ورتالىعى, نەكە سارايى, «بولاشاق» ۋنيۆەرسيتەتىنىڭ, ونكولوگيالىق ورتالىقتىڭ جانە جاڭاشا سالىنعان قازاق ورتالىق اتقارۋ كوميتەتى عيماراتىندا قالا مۇراجايى بوي كوتەرەتىن بولادى. ولاردىڭ جوباسى دايىن, قارجىلاندىرۋ ماسەلەلەرى نەگىزىنەن شەشىلگەن, 600 ورىندىق مەكتەپ پەن تاعى ءبىر 320 ورىندىق بالاباقشا قۇرىلىسى جوبالانۋدا.
ايتا كەتەيىك, سىرداريا وزەنىنىڭ سول جاعالاۋىن دامىتۋ ماقساتىندا جالپى كولەمى 1 مىڭ 532 گەكتار اۋماققا بۇگىنگى تالاپتارعا ساي زاماناۋي ۇلگىدەگى جاڭا قالا سالۋ جوباسى قولعا الىنىپ, بىلتىر ەل تاۋەلسىزدىگىنىڭ 25 جىلدىعى قارساڭىندا العاشقى نىسان – ۇزىندىعى 1,2 كم اۆتوموبيل كوپىرى پايدالانۋعا بەرىلدى.