سەناتتىڭ الەۋمەتتىك-مادەني دامۋ جانە عىلىم كوميتەتىنىڭ ءتورايىمى بىرعانىم ءايتىموۆا شارانى اشا كەلىپ, پرەزيدەنت ن.نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان مىندەتتەردى ءبىلىم بەرۋ جۇيەسىندە ىسكە اسىرۋ تۋرالى اتاپ ءوتتى. سەناتور مەملەكەت باسشىسى العا قويعان رۋحاني جاڭعىرۋ مىندەتتەرى اراسىندا ۇلتتىق بىرەگەيلىكتى ساقتاۋ, ءبىلىمنىڭ سالتانات قۇرۋى مەن سانانىڭ اشىقتىعى ەرەكشە ورىن الاتىنىن ەسكە سالدى. ب.ءايتىموۆا ءبىزدىڭ ەلىمىزدىڭ ينتەللەكتۋالدىق الەۋەتىن دامىتۋ مەن سانالى جاس ۇرپاق تاربيەلەۋدە ء«بىلىم-يننوۆاتسيا» جانە ء«بىلىم-وردا» حالىقارالىق قوعامدىق قورلارىنىڭ ەرەكشە ۇلەسىن اتاپ ءوتتى. كەزدەسۋ بارىسىندا وسى قورلاردىڭ باسشىلارى دارحان وتە, دارحانبەك قوجابەكوۆ جانە ابدۋرراحمان سەل بايانداما جاسادى. پارلامەنتشىلەر جان-جاقتى پىكىر الماسۋ بارىسىندا ءبىزدىڭ ەلىمىزدىڭ ورتا ءبىلىم بەرۋ جۇيەسىنىڭ الدىندا تۇرعان بىرقاتار ماسەلەلەردى كوتەردى. شاراعا سەنات دەپۋتاتتارى ۆلاديمير رەدكوكاشين, ءالي بەكتاەۆ, سەرىك بەكتۇرعانوۆ, اقان بيجانوۆ, نۇرلان قىلىشباەۆ, تولەۋبەك مۇقاشەۆ, سونداي-اق, ءبىلىم جانە عىلىم ءمينيسترىنىڭ ورىنباسارى ەلميرا سۋحانبەرديەۆا قاتىستى. سەناتورلار ءبىلىم جانە عىلىم مينيسترلىگىنە ء«بىلىم-يننوۆاتسيا» ليتسەيلەرىنىڭ الدىڭعى قاتارداعى تاجىريبەسىن بۇكىل ەلىمىزدە كەڭىنەن تاراتۋدى ۇسىندى. تۇلەكتەردىڭ الەمدىك دەڭگەيدە باسەكەگە قابىلەتتى بولۋىنا مۇمكىندىك بەرەتىن وسى زامانعى ءبىلىم بەرۋ ادىستەمەسى مەن ءۇش تىلدە وقىتۋدى ەنگىزۋ, تەحنولوگيالىق جابدىقتاۋدى جاڭعىرتۋ تۋرالى ءبىرىنشى كەزەكتە ايتىلدى. كەزدەسۋدى قورىتىندىلاي كەلىپ, سەناتور ب.ءايتىموۆا شارانىڭ ماڭىزدى ءارى ناتيجەلى بولعانىن اتاپ ءوتتى. ونىڭ پىكىرىنشە, جۇزدەسۋگە قاتىسۋشىلار زاڭ ەرەجەلەرىن ءبىلىم بەرۋ سالاسىندا ىسكە اسىرۋدىڭ ءمان-جايى تۋرالى حاباردار بولدى.
سەنات دەپۋتاتتارى استاناداعى «NURORDA» مەكتەپ-ليتسەيىندە بولدى. مۇندا «ءبىلىم-يننوۆاتسيا» جانە «ءبىلىم-وردا» حالىقارالىق قوعامدىق قورلارىنىڭ ۇستازدارى جانە باسشىلىعىمەن كەزدەسۋ ءوتتى, دەپ حابارلادى سەناتتىڭ ءباسپاسوز قىزمەتى.