«رفمم» كەاق ۇيىمداستىرۋىمەن تۇڭعىش رەت وتكەن اتالمىش بايقاۋدىڭ باستى ماقساتى – 8-11 سىنىپ وقۋشىلارى اراسىنان ەڭ بەلسەندى ءارى دارىندى بالالاردى انىقتاۋ, ولارعا قولداۋ كورسەتۋ, سونداي-اق, ولاردىڭ عىلىمي-زەرتتەۋ جۇمىستارى مەن يننوۆاتسيالىق تالپىنىستارىنا مۇرىندىق بولۋ.
فيزيكا, حيميا, بيولوگيا, روبوتوتەحنيكا, ينفورماتيكا باعىتتارى بويىنشا وتكىزىلگەن سايىستىڭ باستى ەرەكشەلىگى – وقۋشىلار جەكەلەگەن پاندەر بويىنشا ەمەس, عىلىمنىڭ ءتۇرلى سالاسىنىڭ باسىن قوسقان جوبالارىن ادىلقازىلار القاسىنىڭ سىنىنا ۇسىنىپتى.
الماتى, استانا جانە تاراز قالالارىنىڭ مەكتەپتەرىنەن بايقاۋعا قاتىسقان جاس ونەرتاپقىشتار تولىعىمەن اۆتوماتتى تۇردە جۇمىس ىستەيتىن «اقىلدى ءۇي», ءوندىرىس پەن ادامداردىڭ كۇندەلىكتى قولدانىسىنا قاجەتتى كومپيۋتەرلىك قولدانبالى باعدارلامالار, ەكونوميكانىڭ ءتۇرلى سالاسىنا ارنالعان ءوز جوبالارىن ۇسىندى. بولاشاق يننوۆاتورلار ءتىپتى, «ماڭگىلىك قوزعالتقىشتىڭ» دا (Perpetuum Mobile) كەزەكتى نۇسقاسىن ويلاپ تابۋعا تالپىنعان ەكەن.
جاس دارىندار جۇمىسىن رفمم-مەن ارىپتەستىك ورناتقان اتحۋ, قازۇزتۋ, ءال-فارابي اتىنداعى قازۇۋ, SDU سەكىلدى جوعارى وقۋ ورىندارىنىڭ ۇستازدارىنان تۇراتىن ادىلقازىلار القاسى باعالادى.
ەلەكترلى-نۇكتەلىك دياگنوستيكا جاساپ, سمارتفون قوسىمشاسى ارقىلى ادام اعزاسىنا دياگنوز قويا الاتىن قولعاپ ويلاپ تاپقانى ءۇشىن ن.نازارباەۆ زياتكەرلىك مەكتەبىنىڭ وقۋشىلارى كەڭەسبەكوۆ ءالىمجان مەن اسانقۇل ازامات باس جۇلدەنى ۇتىپ السا, «اقىلدى ءۇي» جوباسىن ۇسىنعان بۋراباەۆا ايدانا مەن بەيسەنوۆ ۇلان, «بالاما قۋات كوزىن» ويلاپ تاپقان گۋرا ماكسيم, ايمىشەۆا ارنا سىندى وقۋشىلار دا جۇلدەلى ورىندار يەلەنىپ, باعالى سىيلىقتارمەن ماراپاتتالدى.
وقۋشىلار ۇسىنعان وتەلدەر جۇمىسىن اۆتوماتتاندىرۋ, بالامالى ەنەرگيا نەگىزىندە توڭازىتقىشتار جاساۋ, اعىن سۋلاردى التىۆالەنتتى حروممەن زارارسىزداندىرۋ سياقتى كوپتەگەن جاڭاشىل ءارى تىڭ يدەيالارعا تولى باستامالاردىڭ ارقايسىسى دا اتاپ وتۋگە لايىق ايرىقشا ەڭبەك ەكەنى انىق.
بولاشاقتا بۇل بايقاۋدىڭ اياسى كەڭەيىپ, بيزنەسمەندەر قىزىعۋشىلىق تانىتىپ, عىلىمي جۇمىستار جارمەڭكەسى ستارتاپ جوبالاردىڭ جولىن اشاتىن ورىنعا اينالادى دەگەن ءۇمىت بار.
ميرا بايبەك, «ەگەمەن قازاقستان»