اقتوبە وبلىسىنىڭ ءىىد ەكسترەميزمگە قارسى كۇرەس باسقارماسىنىڭ قىزمەتكەرى قاپىدا قازا تاپتى. قاسكۇنەمدەر ونى ۇيگە الداپ اكەلىپ, وق اتقان, سوڭى جارىلىسقا ۇلاسقان. قازا بولعان پوليتسيا قىزمەتكەرى نەبارى 28 جاستا ەدى.
مارقۇم رۇستەم كەنجالين ارىپتەستەرىمەن بىرگە اقتوبە قالاسىندا 10 شىلدەدە ورىن العان قىلمىسقا قاتىستى قوزعالعان ءىستى تەرگەگەن ەكەن. قىلمىسكەرلەر تاكسيدە وتىرعان اقتوبەلىك نۇرلان تەمىروۆكە وق اتقان. كولىك جۇرگىزۋشىسى زارداپ شەكپەگەن, ول جولاۋشىسىن ءوزى اۋرۋحاناعا جەتكىزىپ, بولعان وقيعا تۋرالى ايتىپ بەرگەن.
سونان قۇقىق قورعاۋشىلار جەدەل-ىزدەستىرۋ شارالارىن جۇرگىزۋ بارىسىندا اقتوبە قالاسىنداعى «گەليوس» جانار-جاعار ماي قۇيۋ بەكەتىنەن «ۆاز-21014» اۆتوكولىگىندە وتىرعان وسى قىلمىسقا قاتىسى بار توپتىڭ ءۇش مۇشەسىن ۇستادى.
ال ۇيلەردىڭ بىرىندە جاسىرىنىپ ۇلگەرگەن ءتورتىنشى كۇدىكتىنى ۇستاۋ كەزىندە ول ىشكى ىستەر ورگاندارى قىزمەتكەرلەرىنە قارۋلى قارسىلىق كورسەتكەن. كۇدىكتىنىڭ سول جەردە مەرگەندەر قيمىلى ارقىلى كوزى جويىلدى. وقيعا ورنىن تەكسەرۋ بارىسىندا تەگىس ۇڭعىلى اڭشى مىلتىعى تابىلىپ, تاركىلەندى.
وسى وقيعادان كەيىن ولاردىڭ قىلمىستىق بايلانىستارىن تەكسەرۋ ماقساتىندا قىلمىسكەرلەردىڭ سىبايلاستارىن انىقتاۋ ءۇشىن اقتوبە وبلىسىنىڭ ءىىد قىزمەتكەرلەرى جەدەل ءىس-شارالار جۇرگىزگەن بولاتىن. تەرگەۋ جۇمىستارىن جالعاستىرۋ بارىسىندا ءىىد ەقكب قىزمەتكەرلەرى كەلىپ تۇسكەن جەدەل اقپارات بويىنشا «جاڭاجول» ساياجايىنداعى قۇرىلىسى اياقتالماعان ءۇيدى تەكسەرۋگە بارعان. تەكسەرۋ كەزىندە ءبىر ايەل ءوزىن ءۇي يەسى رەتىندە تانىستىرىپ, پوليتسەيلەردى ۇيگە الداپ كىرگىزگەن. ءبىرىنشى بولىپ ۇيگە رۇستەم ەنگەن. ءۇي ىشىندە قانداي جاعداي بولعانى بەيمالىم. ويتكەنى, رۇستەم كىرگەن بويدا اتىلعان وقتىڭ داۋىسى ەستىلىپ, سوڭىنان جارىلىس بولعان. ءۇيدىڭ توبەسى ءبىر ساتتە ورتاسىنا تۇسكەندىكتەن, ءارىپتەستەرى ەشقانداي شارا قولدانا الماي قالعان. ءۇيىندى اراسىنان دەنەسىنە وق تيگەن پوليتسيا قىزمەتكەرىنىڭ جانە قازىرگى ۋاقىتتا كىم ەكەنى انىقتالىپ جاتقان جىگىتتىڭ مايىتتەرى تابىلدى. تاعى ءبىر اۋىر جاراقات العان ادام اۋرۋحاناعا جەتكىزىلدى, الايدا ول كەلەسى كۇنى كوز جۇمدى.
رۇستەم كەنجالين اقتوبە وبلىسى حرومتاۋ اۋدانىندا دۇنيەگە كەلگەن, ىشكى ىستەر ورگاندارىندا بىرنەشە جىل قىزمەت اتقاردى. قىزمەت اتقارۋ كەزىندە ءوزىن جاقسى جاعىنان, جاۋاپكەرشىلىگى مول قىزمەتكەر رەتىندە كورسەتتى جانە ۇجىمدا سىيلى بولدى. ءاربىر ىسكە جاۋاپكەرشىلىكپەن قاراپ, ءوزىنىڭ قىزمەتتىك مىندەتتەرىن ادال اتقارا بىلگەن. وتكەن جىلى وتباسىن قۇرعان ول ءومىرىنىڭ قىسقا بولاتىن ويىنا دا الماعان بولاتىن. ەندى, مىنە, 28 جاسىندا رۇستەمنىڭ ءومىرى قىرشىنىنان قيىلدى, ول قىلمىسكەرلەردىڭ قولىنان وقىستا قازا تاپتى.
الماگۇل بەكجانوۆا.
اقتوبە.