«بالداۋرەن» رەسپۋبليكالىق وقۋ-ساۋىقتىرۋ ورتالىعىندا ءبىلىم جانە عىلىم ءمينيسترى باقىتجان جۇماعۇلوۆتىڭ قاتىسۋىمەن كوشپەلى كەڭەس ءوتتى. كەڭەستە ءسوز بولعان نەگىزگى ماسەلە بالالاردىڭ ماۋسىم دەمالىسى جايى بولدى.
جيىندا اعىمداعى جىلى ەلىمىز بويىنشا 1,1 ملن. 1-10 سىنىپ وقۋشىلارىنىڭ قالا سىرتىنداعى 220, 5 406 مەكتەپالدى جانە تاماقتاندىراتىن 961 پروفيلدىك لاگەرلەردە, 74 ساناتوري تيپتەگى, 330 دەباتتىق, 930 سپورتتىق جانە پالاتالىق لاگەرلەردە دەمالعانى ايتىلدى. بۇعان قوسا جوعارى سىنىپ وقۋشىلارىن ەڭبەكپەن قامتۋ ماقساتىندا 12,5 مىڭ مەكتەپ بريگادالارى جۇمىس ىستەگەن بولسا, ونىڭ ىشىندە ساۋلەتتەندىرۋ, جوندەۋ بريگادالارى, وتباسىلىق-جالداۋ, وقۋ-وندىرىستىك جازعى ەڭبەك بريگادالارى, مەكتەپ ورمان شارۋاشىلىقتارى جانە ت.ب. بار.
جيىندا بالالاردى ساۋىقتىرۋ ماسەلەسىمەن اينالىساتىن مەكەمەنىڭ مودەلىن قۇرۋ قاجەتتىلىگى تۋرالى باسا ايتىلدى. «ورلەنوك» (رەسەي), «كامچيا» (بولگاريا), «زۋبرەنوك» (ۋكراينا) سياقتى ساۋىقتىرۋ ورتالىقتارىمەن ىنتىماقتاستىق ءتاجىريبەسى بار «بالداۋرەننىڭ» بۇل ورايدا كوشباسشى بولۋىنا تولىق مۇمكىندىگى بار دەسەك, ونىڭ حالىقارالىق دەڭگەيگە شىعۋىنا مۇمكىندىك بەرەتىن جاعدايدىڭ ءبارى جاسالعان دەۋگە بولادى.
كەڭەستەن كەيىن مينيستر «بالداۋرەن» رەسپۋبليكالىق وقۋ-ساۋىقتىرۋ ورتالىعىنىڭ ۇجىمىمەن تانىسىپ, كىتاپحانادا, ءبىلىم بەرەتىن كەشەندە, تۇرعىن كورپۋسىندا, ونەر گالەرەياسىندا, ءجۇزۋ باسسەينىندە بولىپ, ارالاپ كوردى.
مينيستر وسى كۇندەرى «بالداۋرەندە» اشىلعان قازاقستان تاۋەلسىزدىگىنىڭ 20 جىلدىعىنا ارنالعان ۇلتتار مادەنيەتتەرى رەسپۋبليكالىق فەستيۆالىنىڭ جاس قاتىسۋشىلارىمەن جۇزدەستى. ول جاس جەتكىنشەكتەرگە پرەزيدەنت ن.ءا. نازارباەۆتىڭ بالالاردىڭ باقىتتى جانە سەنىمدى بولىپ وسۋلەرىنە كورسەتىپ وتىرعان قامقورلىعى تۋرالى ايتتى. ەلباسىنىڭ قولداۋىمەن قۇرىلعان وسى عاجايىپ لاگەر سونىڭ دالەلى ەكەنىن تىلگە تيەك ەتتى.
قازىر «بالداۋرەندە» 10-شى اۋىسىم دەمالۋدا. بۇل اۋىسىم كوپ ۇلتتى بولىپ كەلۋىنە وراي «دوستىقتىڭ التىن كوپىرى» دەپ اتالعان ەكەن. ءويتكەنى, جىل سايىن بۇل اۋىسىمدا قازاقستان رەسپۋبليكاسىندا تۇراتىن از حالىقتار مەن ۇلتتىق مادەني ورتالىقتاردىڭ وكىلدەرى, سونىمەن ءبىرگە ۇلىبريتانيا, گەرمانيا, قىتاي, موڭعوليا, رەسەي سياقتى ەلدەردەن كەلگەن بالالار دەمالادى.
«ەگەمەن-اقپارات».