ءوز كوزىمىزگە ءوزىمىز سەنبەدىك

قانىڭ قالاي قايناماس؟! «قىز جىبەك» ءفيلمى ەسكە تۇسە بەرەدى. تولەگەن اكەسىنەن قولداۋ تاپپاي, ساربازدارىن باستاپ جاۋعا قارسى تۇرا الماي, ءوزى جالعىز قاي­تىپ كەلە جاتادى عوي. جولدا بەكەجانمەن تابىسادى. سويتكەن كەزدە جوڭعاردىڭ قولى جەر استىنان شىعا كەلگەندەي بولىپ, قىرعىن شايقاس باستالىپ كەتەدى. ەسىرگەن جاۋ سوندا تۋدى الا قاشپاي ما؟ تولەگەن تۇرا قۋماي ما؟ بايراقتى تارتىپ ال­ىپ, ءماز-مەيرام بولىپ كەلە جات­قانىندا وتىرىك ولگەن جوڭ­عار ءتو­لەگەننىڭ اتىن اتىپ قۇ­لاتپاي ما؟ بورپىلداق توپىراققا ات-ماتى­مەن اۋناپ تۇسكەن تولەگەن سوندا تۋدى تىك كوتەرىپ, جانا­رى­نان وت شاشىپ تۇرماي ما؟! بەيبىت كۇن­دە مەملەكەتتىك ءرامىزدى قادىر­لەي الماي جۇرگەن مىنا زاماندا كوز الدىمىزعا وسى كورىنىس قايتا-قايتا كەلە بەرەدى. تۋعا قۇر شۇبەرەك دەپ قا­راي­تىن­داردىڭ قاتارى سيرەمەي تۇر. كەيىنگى كۇندەردىڭ بەدەرىندە قى­ران بۇركىت بەدەرلەنگەن باستى نى­شانعا ەنجار قاراۋ­دىڭ ءتۇرلى كورى­نىس­تەرىن كوزىمىز كو­رىپ-اق ءجۇر. تالدىقورعاندا شىر­شا­نى بە­­زەن­دىرەتىن ويىن­شىق­تار­دى سا­لا­تىن قاپشىق قىل­دى قاي­بىر جى­لى. جام­بىل­دا ءبىر كول­لەدج­­دىڭ ستۋ­دەنت­تەرى تۋىڭىزبەن كوشە­دەگى ءتۇس­كەن جا­پىراقتى تا­سى­دى. سول ايماق­تا­عى كەدەندىك بەكەتتە باي­راق ءتوڭ­كەرىلىپ ءىلىنىپ تۇردى. كىم­نىڭ ميى جەتكەنىن قايدام, فۋت­بول دوبىنا تۋ سالعاندى دا كور­دىك. وسى كۇنى مۇن­داي كەرى ءۇردىس كوپ باي­قالا­­تىن بول­دى. قالاي توق­تاۋ سالامىز؟ سەنبى كۇنى تويعا باردىق. «ال­­تىن ءداستۇر» دەگەن مەيرام­حا­ناعا. اتى جاقسى وسى مەيرام­حا­نانىڭ زاتى دۇرىس بولماي شىق­تى. ءبىر قاۋىم ەل سىرتتا تۇر ەدىك. اناداي جەردە بۇرق-سارق قاي­ناعان قازان­نىڭ قاسىندا كو­گە­رەڭدەپ ءبىر ءنار­سە كورىندى. ال­عاش­قىسىندا ءمان بەر­مەدىك. ار­­تى­نان نە نارسە ەكەن دەپ انىقتاپ قاراعانىمىزدا ءوز كو­زى­مىز­گە ءوزى­مىز سەنبەدىك. گاز بال­لون­نىڭ سىر­تىن تۋمەن وراپ قوي­ىپ­تى؟! و, ماس­قا­را! توبەڭدە تۇرا­تىن تۋ قازان-وشاق قاسىندا... جانىڭ اۋىرا ما, جوق پا؟ «التىن ءداستۇر» دەگەن مەيرامحانا ەشبىر ءداستۇرىڭدى مەنسىنبەيتىنىن, تۋىڭنىڭ ءوزىن قادىر­لە­مەي­تىنىن انىق كورسەتتى. ءارى-بە­رى­دەن سوڭ مەيرامحانانىڭ ءتو­بە­سىن­دە تۋ ءىلىنىپ تۇرۋىنا رۇقسات جوق. ول تەك مەملەكەتتىك مەكە­مە­لەردىڭ ماڭدايىندا جارقىراپ تۇ­رۋى كەرەك. ال ولار گاز بال­لون­دى وراپ تاستاعان. ايتارعا ءسوز جوق. ەلباسىنىڭ ءوزى تىزەسىن بۇگىپ, باسىن ءيىپ ءسۇ­يە­تىن تۋىڭىزدىڭ سىر بويىنداعى سيقى وسىنداي. بىلمەستىكپەن ىستەدى دەگەنگە سەنگىڭ-اق كەلەدى. ءبى­راق نيەتى ءتۇزۋ ادام تۋدى ولاي قور­­لا­ماسا كەرەك ەدى. مىنا كو­رى­نىستى كور­گەندە: «قازاقتىڭ قازاق قانى قايدا كەتكەن؟» دەگەن ءزىل­دەي ساۋال ميدا تۇرىپ الدى. ەرجان بايتىلەس, قىزىلوردا.