جۋىردا شاحماتتان ەل ءتاۋەلسىزدىگى مەن ەلباسى جارلىعىمەن سەمەي اتوم پوليگونىنىڭ جابىلعانىنا 20 جىل تولۋىنا ءجانە استانا كۇنىنە ارنالعان سايىس ءوز مارەسىنە كەلىپ جەتتى. تارتىستى وتكەن بۇل سپورت مەرەكەسىنە «نەۆادا – سەمەي» يادرولىق سىناقتارعا قارسى حالىقارالىق قوزعالىسى, سەمەيدەگى ۇكىمەتتىك ەمەس ۇيىمدار قاۋىمداستىعى جانە كۋرچاتوۆ قالاسىنداعى يادرولىق تەحنولوگيالار پاركى اق مۇرىندىق بولدى.
جارىسقا قاتىسۋشىلارعا پرەمەر-ءمينيستردىڭ ورىنباسارى, قازاقستان شاحمات فەدەراتسياسىنىڭ پرەزيدەنتى اسەت يسەكەشەۆ پەن «نەۆادا – سەمەي» يادرولىق سىناقتارعا قارسى حالىقارالىق قوزعالىسىنىڭ پرەزيدەنتى, اقىن ولجاس ءسۇلەيمەنوۆتىڭ اتىنان كەلىپ تۇسكەن قۇتتىقتاۋ حاتىن اتالعان قوزعالىستىڭ ۆيتسە-پرەزيدەنتى سۇلتان كارتوەۆ وقىپ بەردى. شاحماتتان وتكەن بىرىنشىلىكتى العاشقى ءجۇرىستى جاساپ, اشۋ قۇرمەتى «يادرولىق تەحنولوگيالىق پاركى» اكتسيونەرلىك قوعامىنىڭ پرەزيدەنتى ابزال قۇسايىنوۆ پەن ابايدىڭ جيەنى, رەسپۋبليكالىق اباي قورىنىڭ پرەزيدەنتى بالتابەك ەرسالىم ۇلىنا ۇسىنىلدى.
قالاداعى شاحمات كلۋبىندا وتكەن وسىنداي مەرەكەلىك جارىسقا جاستارى 8 بەن 80 ارالىعىنداعى قىرىققا جۋىق بەلدى ويىنشىلار قاتىستى. ولاردىڭ اراسىندا الەم بىرىنشىلىگىنە قاتىسقان سەرگەي سموتروۆ سىندى بەلگىلى شاحماتشى مەن 10 سپورت شەبەرلىگىنە كانديداتتىڭ بولۋى كوپ نارسەنى اڭعارتسا كەرەك. بىرنەشە كۇنگە سوزىلعان تارتىستى ويىن ناتيجەسىندە لايىقتى جەڭىمپازدار انىقتالىپ, سىي-سياپاتقا بولەندى.
قوس جيىرما جىلدىق مەرەكە تاقاي تۇسكەن سايىن سەمەيدە وسىنداي مازمۇنداعى سايىستار مەن جارىستار ءجيى وتكىزىلۋدە.
داۋلەت سەيسەن ۇلى,
سەمەي.