جاقىندا رۋمىنيا استاناسى – بۋحارەست قالاسىندا گرەك-ريم كۇرەسىنەن جاستار اراسىنداعى الەم چەمپيوناتى بولىپ ءوتتى. وعان 47 ەلدەن 370 جاس بالۋان قاتىستى.
وسىناۋ ءدۇبىرلى دوداعا ءبىزدىڭ ەلىمىزدەن جاستار كومانداسىنىڭ باس باپكەرى ن. دۇيسەنوۆ باستاعان 50; 55; 60; 66; 74; 84 جانە 120 كگ سالماق دارەجەسىندەگى جەتى سايىپقىران اتتانعان بولاتىن. وكىنىشكە قاراي, جەتى باتىردىڭ بىرەۋى عانا فينالدىق باسەكەگە جولداما الىپ, كۇمىس مەدال يەگەرىنىڭ تۇعىرىنا كوتەرىلدى.
كەلەشەگىنەن كوپ ءۇمىت كۇتتىرىپ جۇرگەن جاس بالۋان جانسەرىك ءسارسەنبيەۆ بوز كىلەم ۇستىندە بەلدەسكەلى بەرى جاقسى ناتيجەلەرگە قول جەتكىزىپ كەلەدى. سوڭعى جەتىستىگىن عانا ايتساق, وتكەن جىلى ول جاستار اراسىنداعى قازاقستان ءجانە ازيا چەمپيوناتتارىنىڭ جەڭىمپازى اتاندى. قازاقستان چەمپيوناتىنىڭ 50 كگ سالماق دارەجەسىندەگى بيىلعى جەڭىمپازى دا ءوزى بولدى. ەندى, مىنە, ول ەل جانكۇيەرلەرىنەن جىراق ەۋروپادا ءوتكەن الەم چەمپيوناتىنان كۇمىس ءجۇلدەمەن ورالىپ وتىر. ەلىمىزدەگى گرەك-ريم كۇرەسى شەبەرلەرىنىڭ سوڭعى جىلدارى بەدەلدى ءباسەكەلەردەن ولجاسىز ورالىپ ءجۇرگەنىن ەسكەرسەك, باعالاي بىلەتىن سپورت باسشىلارى ءۇشىن ونىڭ بۇل جەتىستىگى از سىباعا ەمەس.
تاراز توپىراعىنا تابانى تيە سالىسىمەن جانسەرىكتى كۇمىس مەدالىمەن قۇتتىقتاپ, بۋحارەستە وتكەن باسەكە بارىسىنىڭ جاي-جاپسارىن سۇراعانبىز.
– العاشقى بەلدەسۋدە تۇرىك بالۋانىن جەڭدىم. ودان كەيىن يزرايل ەلىنىڭ بالۋانىن قاپى قالدىردىم. ءۇشىنشى قارسىلاسىم قىرعىز ەكەن, ونىڭ دا جاۋىرىنى جەر يىسكەدى. فينالدىق بەلدەسۋدە تاپ كەلگەن ازەربايجان ەلىنىڭ بالۋانى جەڭىلۋگە تايانعانىن سەزدى مە, كۇرەسۋدىڭ ورنىنا مەنى باسىمەن سوعىپ جىبەردى. ءارينە, جاۋاپ رەتىندە وعان مەنىڭ دە قولىم «ءتيىپ» كەتتى. وسى كەزدە ونىڭ مەنى باسپەن ۇرعانىن «بايقاماي» قالعان تورەشى, مۇرنىن باسىپ, ويبايلاپ وتىرا كەتكەن ازەربايجاندىق بالۋانعا جەڭىستى بەرىپ جىبەردى, – دەدى جانسەرىك اعىنان جارىلىپ.
جانسەرىكتىڭ جەكە باپكەرى نۇرلان ۇدەرباەۆ تا شاكىرتى تاراپىنان سابىرلىلىق جەتىسپەگەنىنە نالىعانداي بولدى.
– جانسەرىك – تالانتتى بالۋان. ەگەر ول بۋحارەست بوز كىلەمىندەگى فينالدىق بەلدەسۋدە قىزبالىققا سالىنباي, سابىر ەتكەندە جاستار اراسىنداعى الەم چەمپيوناتىنىڭ التىن مەدالى قولىندا تۇر ەدى. «ەشتەن, كەش جاقسى» دەمەي مە, بۇل كەمشىلىگىن ول ەندى ەرەسەكتەر كومانداسىندا قايتالامايتىن بولادى دەپ سەنەمىن, – دەدى ول.
كوسەمالى ساتتىباي ۇلى,
جامبىل وبلىسى.