بەلگىلى بولعانداي, ەۋروپارلامەنت دەپۋتاتى پول مەرفي ءوزىنىڭ ماڭعىستاۋ وبلىسىنا جاساعان ساپارى بارىسىندا قازاقستان ازاماتتارىن جاپپاي اكتسياعا شاقىرىپ, قازاقستاننىڭ اتقارۋشى جانە سوت بيلىگىنە ورىنسىز ءتىل تيگىزۋگە جول بەرگەن. پول مەرفي تاراپىنان ءبىزدىڭ ەلىمىزدىڭ زاڭناماسىنا سايكەس جول بەرىلمەيتىن ىستەر, ياعني سوت جۇمىسىنىڭ قىزمەتىنە ارالاسۋ, سوت پەن ونىڭ شەشىمدەرىنە قىسىم جاساۋعا تىرىسقانى بايقالدى. زاڭ بويىنشا مۇنداي ءىس-ارەكەتكە بارعاندار جاۋاپقا تارتىلادى (قازاقستان رەسپۋبليكاسىنىڭ اتا زاڭى 77-باپ).
قر ءسىم جاعدايدى ەگجەي-تەگجەيلى قاراستىرىپ, ەۋروپارلامەنت وكىلدەرىنىڭ تاۋەلسىز قازاقستان رەسپۋبليكاسىنىڭ ىشكى شارۋاسى بولىپ تابىلاتىن ماسەلەلەرگە ارالاسۋىنا جول بەرىلمەۋ قاجەت دەپ سانايدى. سونىمەن قاتار, ەلدەگى ساياسي تۇراقسىزدىق پەن قوعامدىق قاراما-قايشىلىقتار تۋعىزاتىن كەز كەلگەن اكتسيالار مەملەكەتىمىزدىڭ اتا زاڭىندا بەكىتىلگەن پرينتسيپتەرگە قارسى كەلەدى. سونداي-اق ەۋروپارلامەنت دەپۋتاتىنىڭ كەيبىر ايتقان سوزدەرىنەن الەۋمەتتىك ارازداسۋعا جول بەرىلگەن. بۇل ارەكەتكە دە قىلمىستىق زاڭنامامەن جاۋاپقا تارتىلادى (قازاقستان رەسپۋبليكاسى قىلمىستىق كودەكسىنىڭ 164-بابى).
ەۋروپارلامەنت دەپۋتاتى پول مەرفيدىڭ ارەكەتى مەن سوزدەرى حالىقارالىق قۇقىقتىڭ پرينتسيپتەرى مەن نورمالارىن قاتاڭ بۇزعانى بولىپ سانالادى جانە دە بۇۇ جارعىسىنىڭ نەگىزگى پرينتسيپتەرىنە قايشى كەلەدى (7-تارماق, 2-باپ, مەملەكەتتىڭ ىشكى قۇزىرەتىندەگى ءماسەلەلەرگە ارالاسپاۋ). اتاپ ايتقاندا, 1970 جىلعى حالىقارالىق قۇقىق پرينتسيپتەرىنىڭ دەكلاراتسياسىنا; 1982 جىلى بۇۇ باس اسسامبلەياسىمەن ماقۇلدانعان, مەملەكەتتىڭ ىشكى ماسەلەلەرىنە قاتىستى ينتەرۆەنتسيا مەن قول سۇعۋشىلىققا جول بەرمەۋ جونىندەگى دەكلاراتسياعا; 1975 جىلعى ەۋروپاداعى قاۋىپسىزدىك جانە ىنتىماقتاستىق ءجونىندەگى كەڭەستىڭ قورىتىندى اكت پرينتسيپتەرىنىڭ دەكلاراتسياسى جانە قازاقستان رەسپۋبليكاسى مەن ەۋروپالىق قاۋىمداستىق جانە ونىڭ مۇشە ەلدەرى اراسىنداعى ارىپتەستىك پەن ىنتىماقتاستىق جونىندەگى كەلىسىمنىڭ (1995 جىلدىڭ 23 قاڭتار) نەگىزىنە قايشى كەلەدى.
سىرتقى ساياسات ۆەدومستۆوسىنىڭ ءتيىستى ۇستانىمى ەو وكىلدەرىنە مالىمدەلدى.
جوعارىدا اتالعان لاۋازىمدى تۇلعالاردىڭ زاڭسىز ارەكەتتەرى ەۋروپارلامەنت تاراپىنان ءتيىستى ءتۇردە باعالانىپ, قازاقستاندىق تاراپ ول تۋرالى دەر كەزىندە حاباردار بولادى دەگەن ءۇمىت ارتامىز, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ باسپاسوز قىزمەتى.