كەشە سىرتقى ىستەر مينيسترلىگىندە وسى ۆەدومستۆونىڭ باسپاسوز حاتشىسى ءىلياس وماروۆ جۋرناليستەر ءۇشىن كەزەكتى بريفينگ وتكىزدى.
بريفينگ بارىسىندا ول ەل ءتاۋەلسىزدىگىنىڭ جانە سەمەي يادرولىق سىناق پوليگونىنىڭ جابىلعانىنا 20 جىل تولۋىنا وراي, نورۆەگيالىق «Bike for Peace» قوعامدىق ۇيىمى 2011 جىلدىڭ 6-29 تامىزى ارالىعىندا سەمەي – الماتى – استانا باعىتى بويىنشا ۇيىمداستىرىلاتىن ۆەلوجورىققا توقتالىپ ءوتتى.
«قازاقستان يادرولىق قارۋعا قارسى كۇرەستە كوشباسشى ەلدىڭ ءبىرى بولىپ تابىلادى, ۆەلوجورىق كۇندەرى دە وسىعان بايلانىستى تاڭدالعان. ەل ىشىندەگى اتالمىش ساياحات بىرنەشە ونجىلدىقتار بويى كەڭەس وداعىنىڭ يادرولىق سىناقتارى جۇزەگە اسقان جەردىڭ ماڭىندا – سەمەي قالاسىنان باستاۋ الادى. ۆەلوسيپەد ساياحاتى 6 تامىز – 1945 جىلى حيروسيما قالاسىن بومبالاعان كۇنى باستالماق. سول جىلى ءۇش كۇننەن كەيىن ناگاساكي قالاسى دا وسىنداي سوققىعا دۋشار بولعان. بۇل ەكى قايعىلى وقيعا يادرولىق قارۋدىڭ اسكەري باعىتتا قولدانىسىنىڭ جالعىز كورىنىسى», دەدى ءى. وماروۆ.
قازاقستانداعى 24 كۇندىك ۆەلوساياحات بارىسىندا قاتىسۋشىلار شىعىس قازاقستان, الماتى, جامبىل, قاراعاندى جانە اقمولا وبلىستارىندا, الماتى مەن استانا قالالارىندا بولادى. ال اتالمىش جوبا استانادا, 29 تامىزدا, ياعني سەمەي سىناق پوليگونى جابىلۋىنىڭ 20 جىلدىعى كۇنىندە ءوز مارەسىنە جەتەدى. بۇل كۇن قازاقستان رەسپۋبليكاسى پرەزيدەنتى نۇرسۇلتان نازارباەۆتىڭ ۇسىنىسىمەن جانە بۇۇ باس اسسامبلەياسىنىڭ ءبىراۋىزدان قولداۋىمەن حالىقارالىق يادرولىق سىناققا قارسى كۇن رەتىندە قابىلدانعانى بەلگىلى.
ساياحاتقا قاتىساتىن توپ 10 نورۆەگيالىق جانە 6 قازاقستاندىق ازاماتتان تۇرادى. «Bike for Peace» ۆەلوجورىعى بارىسىندا قاتىسۋشىلار مەكتەپتەرگە, مۇگەدەكتەرگە ارنالعان مەكەمەلەرگە بارادى جانە جەرگىلىكتى حالىقپەن, مەملەكەتتىك ورگاندار وكىلدەرىمەن, قازاقستان ۆەلوسپورت فەدەراتسياسىنىڭ باسشىلىعىمەن كەزدەسەدى. ۆەلوساياحاتتىڭ جەكە كەزەڭدەرىنە «استانا» ۆەلوكومانداسىنىڭ كەيبىر مۇشەلەرى دە قاتىسادى دەپ كوزدەلىپ وتىر. سەمەي – الماتى – استانا ۆەلوساياحاتى حالىقتار اراسىنداعى بەيبىتشىلىككە, دوستىققا, ءوزارا ءتۇسىنىسۋشىلىككە جانە يادرولىق قارۋسىز قوزعالىستى ناسيحاتتاۋعا شاقىرادى.
ءىلياس وماروۆتىڭ حاباردار ەتۋىنشە, 2-3 تامىزدا سىرتقى ىستەر ءمينيسترى ە.قازىحانوۆ ءتۇرىك رەسپۋبليكاسىنا رەسمي ساپارمەن بارادى. ساپار بارىسىندا ەكىجاقتى ىنتىماقتاستىق پەن كوپجاقتى پىشىندەگى ءوزارا ىنتىماقتاستىق ماسەلەلەرى تالقىلانادى. سىرتقى ىستەر ءمينيسترى ە.قازىحانوۆتىڭ تۇركيا باسشىلارىمەن كەزدەسۋلەرى دە كوزدەلىپ وتىر.
ءلايلا ەدىلقىزى.