اكىمشىلىككە كونگرەستە رەسپۋبليكاشىلار وپپوزيتسياسى جەتەكشىلەرىمەن كەلىسىمگە كەلۋدىڭ ءساتى ءتۇستى, دەپ مالىمدەدى اقش پرەزيدەنتى باراك وباما.
وسىعان دەيىن ەكى پارتيا وكىلدەرى قولدايتىندىقتارىن مالىمدەگەن ۋاعدالاستىق قۇراما شتاتتاردىڭ مەملەكەتتىك بورىشىنىڭ ءليميتىن ساتىلاپ كوتەرۋدى قاراستىرادى جانە تەحنيكالىق دەفولتتان قۇتىلۋعا مۇمكىندىك بەرەدى. ءتۇپكىلىكتى شەشىم كونگرەسس مۇشەلەرىنە بايلانىستى, دەپ اتاپ كورسەتكەن پرەزيدەنت, ولاردى بىردەن ءبىر مۇمكىن تاڭداۋ جاساۋعا شاقىردى. اق ءۇي زاڭ شىعارۋشىلار جاڭا كەلىسىمدى سەيسەنبىگە دەيىن ماقۇلدايدى دەپ ۇمىتتەنىپ وتىر.
شەكارادا بولعان اتىس
يزرايلدىك جانە ليۆاندىق اسكەري قىزمەتشىلەر 1 تامىز كۇنى ەكى ەلدىڭ شەكاراسى ماڭايىندا ءبىر-بىرلەرىنە وق اتقان.
ليۆاننىڭ The Daily Star گازەتىنىڭ حابارلاۋىنشا, يزرايلدىك بىرنەشە سولدات تاڭەرتەڭگىلىك ەرتە شەكارانى كەسىپ وتكەن, وسىدان كەيىن بارىپ ليۆاندىق اسكەريلەر ولارعا وق اتقان. ال يزرايل جاعى بولسا, ليۆان سولداتى ءوز اۋماعىندا پاترۋلدە جۇرگەن يزرايلدىك شەكاراشىعا وق اتتى دەپ مالىمدەپ وتىر. ليۆان جاعىنا جاۋاپ رەتىندە يزرايلدىكتەر ليۆان شەكاراشىلارىنىڭ باقىلاۋ بەكەتىن اتقىلاعان. ەكى جاقتا دا شىعىن جوق.
تەروررشى بەت ءپىشىنىن وزگەرتكەن ەكەن
كوك كوزدى بلوندين اندەرس برەيۆيك وسىدان ون جىل بۇرىن ناعىز اريلىك كەيىپكە ەنۋ ءۇشىن وزىنە پلاستيكالىق وپەراتسيا جاساتقان كورىنەدى.
بۇل تۋرالى نورۆەگياداعى ەكى بىردەي تەروررلىق اكتىنى ۇيىمداستىردى دەپ ايىپتالعان «نورۆەگ اتقىشىنىڭ» مەكتەپتەس دوسىنا سىلتەمە جاساي وتىرىپ, بريتاننىڭ The Telegraph گازەتى حابارلاعان. ونىڭ جازۋىنشا, برەيۆيك مۇرنى مەن يەگىنىڭ فورماسىن وزگەرتكەن. وپەراتسيانى امەريكاداعى پلاستيكالىق حيرۋرگ جاساعان ەكەن. وسىعان دەيىن برەيۆيكتىڭ اقىل-ەسىنىڭ بۇتىندىگىن جانە ونى قىلمىستىق قۋدالاۋ مۇمكىندىگىن انىقتايتىن پسيحياتريالىق ساراپتاما 1 قاراشاعا دەيىن سوزىلادى دەلىنگەن ەدى. ءبىراق نورۆەگيا سوت مەديتسينا كوميتەتىنىڭ باسشىسى ونىڭ اقىل-ەسىن ءبۇتىن ەمەس دەپ تانۋ مۇمكىندىگى وتە از دەپ اتاپ كورسەتكەن.
اقش سەناتى گرۋزيانىڭ تۇتاستىعىن قولدادى
امەريكا سەناتى رەسەيدىڭ ابحازيا مەن وڭتۇستىك وسەتياداعى باسقىنشىلىق فاكتىسىن راستايتىن قاراردى ءبىراۋىزدان قابىلدادى.
رەسەي-گرۋزين كيكىلجىڭىنىڭ باستالعانىنا ءۇش جىل تولۋىنا ورايلاستىرىلعان قۇجات, ونى ازىرلەۋشىلەردىڭ ءبىرى, سەناتور دجەين ءشاحيننىڭ ايتۋىنشا, رەسەيگە ونىڭ ءبىرقاتار مىندەتتەمەلەردى ورىنداماعانىن, اتاپ ايتقاندا, گرۋزين بوسقىندارىنىڭ كەرى قايتۋىنا جول بەرمەگەنىن ەسكە سالۋى ءتيىس. اقش سەناتى جۇما كۇنى گرۋزيا اۋماعىنىڭ تۇتاستىعىن مويىندايتىن جانە رەسەيدى ءوز اسكەرلەرىن ابحازيا مەن وڭتۇستىك وسەتيا اۋماعىنان الىپ كەتۋگە شاقىراتىن قاراردى ءبىراۋىزدان ماقۇلدادى. سەناتورلار ماسكەۋدى 2008 جىلعى گرۋزيا مەن رەسەي اراسىنداعى كەلىسىمنىڭ بارلىق شارتتارىن ورىنداۋعا قاراي قادام جاساۋعا شاقىرعان.
سيريا ليۆيانىڭ جولىن قۇشپاق
سيرياعا اسكەري باسقىنشىلىق جاساۋ وقيعانىڭ ودان ءارى دامۋىنداعى سونشالىقتى ءبىر الىس جاتقان نۇسقا ەمەس, دەپ ءمالىمدەگەن بريتاندىق سىرتقى ىستەر مينيسترلىگىنىڭ باسشىسى ۋيليام حەيگ.
اقپارات اگەنتتىكتەرى حاما قالاسىندا ۇكىمەتكە قارسى نارازىلىق شەرۋىنە شىققاندارعا قارسى وق اتىلعانىن, وندا ونداعان ادامنىڭ قازا تاپقانىن حابارلاۋدا. جەرگىلىكتى بيلىك بولسا, ءبارىن تەرىسكە شىعارىپ وتىر. بۇۇ قاۋىپسىزدىك كەڭەسى شۇعىل وتىرىس وتكىزۋگە دايىندالۋدا. بيلىك ءوز تاراپىنان اسكەري وپەراتسيالار ءتارتىپسىزدىكتەر ورناتىپ, جەرگىلىكتى حالىقتى ۇرەيلەندىرىپ وتىرعان قارۋلى سودىرلارعا قارسى جۇرگىزىلۋدە دەپ مالىمدەپ وتىر.
قالا ۇستىنە ۇيىرىلگەن قۇيىن
بلاگوۆەششەنسكىدە بولعان, سوڭعى مالىمەتتەر بويىنشا 80 ميلليون رۋبل شىعىن اكەلگەن الاپات قۇيىن رەسەي تاريحىندا كوپ قاباتتى ءۇيلەرى بار ءىرى قالا اۋماعىندا ورىن العان العاشقى تابيعي اپات, دەپ ءمالىمدەگەن رەسەي گيدرومەتورتالىعىنىڭ وكىلى الەكساندر گولۋبەۆ.
جەكسەنبى كۇنى كەشكىلىك 13 مينۋت بويىنا قالا ۇستىندە الاپات قۇيىن ءۇيىرىلىپ تۇرعان. 23 ادامعا مەديتسينالىق جاردەم كورسەتىلىپ, ولاردىڭ تورتەۋى وبلىستىق كلينيكالىق اۋرۋحاناعا جەتكىزىلگەن. ءبىر ادام جاراقات سالدارىنان قازا تاپقان. گولۋبەۆتىڭ ايتۋىنشا, 1984 جىلى يۆانوۆو قالاسىنىڭ اۋماعىندا وسىنداي الاپات قۇيىن ورىن العان, بىراق وندا تەك قالانىڭ شەت ايماقتارى مەن باۋ-باقشا كووپەراتيۆتەرى عانا ازداپ زارداپ شەككەن كورىنەدى.
تۇرمەدەگىلەردىڭ جارتىسىنا جۋىعى بوساتىلماق
ۆەنەسۋەلادا سوتتالعانداردىڭ جالپى سانىنىڭ 40 پايىزىنا دەيىنىن تۇرمەدەن بوساتۋ مۇمكىندىگى قاراستىرىلماقشى.
بۇل جونىندە El Nacional گازەتىنە بەرگەن سۇحباتىندا ۆەنەسۋەلا جازالاردى ورىنداۋ جۇيەسىنىڭ باسشىسى يريس ۆارەلا مالىمدەگەن. تاياۋ ۋاقىتتاردا «بولماشى قىلمىستار» جاساعانى ءۇشىن سوتتالعانداردىڭ 20 مىڭعا جۋىعى شارتتى مەرزىمىنەن بۇرىن بوساتىلۋ مۇمكىندىگىنە يە بولۋى مۇمكىن. ەلدىڭ پەنيتەنتسيارلىق جۇيەسى باسشىسىنىڭ پىكىرىنشە, قوعام ءۇشىن قاۋىپ-قاتەر تۋدىرمايتىنداردى تۇزەۋ مەكەمەلەرىندە ۇستاۋدىڭ ەش ماعىناسى جوق. يريس ۆارەلا ۇرلىق ءۇشىن سوتتالعانداردى دا وسى ساناتقا جاتقىزىپ وتىر. سوتتالعانداردى جاپپاي بوساتۋعا ۆەنەسۋەلا تۇرمەلەرىنىڭ «اۋزى-مۇرنىنا دەيىن» تولىپ تۇرعانى سەبەپكەر بولعان سىڭايلى.
ينتەرنەت ماتەريالدارى نەگىزىندە ازىرلەندى.