بۇۇ قاۋىپسىزدىك كەڭەسىنىڭ ليۆيا بويىنشا قارارى ەل باسشىسى مۋاممار كاددافيدىڭ وزىنە تىكەلەي سوققى جاساۋعا رۇقسات بەرگەن كورىنەدى. بۇل جونىندە ناتو-نىڭ اتى-ءجونىن ايتۋدان جالتارعان جوعارى شەندى وكىلى مالىمدەگەن.
بۇل وسى ماعىناداعى ناتو وكىلىنىڭ العاشقى مالىمدەمەسى بولىپ تابىلادى. بۇعان دەيىن ليۆياداعى اسكەري وپەراتسيالارعا قاتىسۋشىلار وزدەرىنىڭ ماقساتتارى ناقتى ادامدار ەمەس, تەك اسكەري نىساندار دەپ كەلگەن بولاتىن. وسى ارالىقتا ليۆيا جونىندەگى بايلانىس توبىنا مۇشە 22 مەملەكەت كاددافي تاعىنان تايدىرىلعان جاعدايدا وپپوزيتسيانىڭ قانداي ءىس-قيمىل جوسپارى بار ەكەنىن ءبىلۋ ماقساتىندا قۇجات جوباسىن تالاپ ەتتى. ال ولاردا ناقتى جوسپار جوق سەكىلدى.
اسكەريلەر ب ۇلىكشىلەر قالاسىنا بەتتەدى
سيريا ارمياسىنىڭ بولىمشەلەرى دجيسر ءال-شۋگۋر قالاسى مەن ونىڭ توڭىرەگىندەگى اۋدانداردا قاۋىپسىزدىكتى قالپىنا كەلتىرۋ وپەراتسيالارىن باستاپ كەتتى. بۇل ماڭدا, بيلىكتەگىلەردىڭ دەرەگىنشە, وسىعان دەيىن ب ۇلىكشىلەر 120 پوليتسيانى ولتىرگەن ەكەن.
ەلدەگى دۇربەلەڭنىڭ سالدارىنان, اسىرەسە, بەيبىت تۇرعىندار كوپ زارداپ شەگۋدە. كورشىلەس تۇرىك جەرىنە بارىپ, باس ساۋعالاعىسى كەلەتىندەر قاتارى كۇننەن-كۇنگە كوبەيىپ كەلەدى. ولارعا تۇركيا باسشىلىعى شەكاراسىن اشىپ, ۋاقىتشا ورنالاساتىن بەكەتتەر ۇيىمداستىرۋدا. قازىردىڭ وزىندە تۇرىك اۋماعىنا 2 مىڭنان استام بوسقىن اتباسىن تىرەپ ۇلگەرگەنگە ۇقسايدى.
يتاليا ەلشىسىن كەرى شاقىرىپ الدى
يتاليا باسشىلىعى برازيلياداعى ءوزىنىڭ ەلشىسىن كەڭەسۋ ءۇشىن وتانىنا شاقىرىپ الدى. بۇعان برازيليانىڭ ريمگە رەۆوليۋتسيونەر, سىرتتاي ءومىر-باقي تۇرمەدە وتىرۋعا كەسىلگەن چەزارە ءباتتيستيدى قايتارۋدان باس تارتۋى سەبەپ بولدى.
برازيليا باسشىلىعى ءباتتيستيدى كەرى قايتارماق تۇگىلى, وتكەن بەيسەنبى كۇنى ءتىپتى ونى تۇرمەدەن بوساتىپ جىبەرگەن. بۇل شەشىم ريم تاراپىنان ۇلكەن سىنعا ۇشىرادى. ماسەلەن, يتاليا پرەمەر-ءمينيسترى سيلۆيو بەرلۋسكوني ءوزىنىڭ وكىنىشىن ءبىلدىرىپ, گااگاعا شاعىمداناتىنىن مالىمدەدى. باتتيستي برازيلياعا 2002 جىلى قاشىپ ۇلگەرسە, 2007 جىلى يتاليا باسشىلىعىنىڭ ءوتىنىشى بويىنشا قاماۋعا الىنعان-تىن.
ستانسانىڭ اقىسىن كوتەرۋ نيەتىندە
ءازىربايجان رەسەيدەن گابالين راديولوكاتسيالىق ستانساسىنىڭ قىزمەتىن پايدالانعانى ءۇشىن جال اقىسىن كوتەرۋ نيەتى بار ەكەنىن ءبىلدىرىپ وتىر. «رەسەيلىكتەر جالعا الۋ مەرزىمىن ۇزارتۋدى قالايدى. ءبىز بۇل ارىپتەستىكتى وڭ شەشۋگە دايىنبىز», دەپ مالىمدەگەن ءازىربايجان سىرتقى ىستەر مينيسترىنىڭ ورىنباسارى اراز ازيموۆ.
بىراق, دەيدى ول, جالعا بەرۋ شارتى قايتا قارالۋى ءتيىس. رەسەي جاعى جال اقىسىن كوبىرەك تولەۋى كەرەك. رەسەيدىڭ اتالعان ستانسانى پادالانۋ تۋرالى كەلىسىمى 2012 جىلدىڭ جەلتوقسان ايىندا كۇشىن جويادى. ماسكەۋ بۇگىندە جىلىنا 14 ميلليون دوللار اقى تولەپ وتىر. رەسەيدىڭ ازىربايجانداعى ەلشىسى د.ءدوروحيننىڭ ايتۋىنشا, گابالين رلس-ءى 1980 جىلداردىڭ ورتاسىنان بەرى ءۇندى مۇحيتى باسسەينىندەگى بالليستيكالىق زىمىرانداردى باقىلايدى.
شيندلەر ءتىزىمىن جاساۋشى كوز جۇمدى
گەرمانيانىڭ وڭتۇستىگىندەگى اۋگسبۋرگ قالاسىندا 91 جاسىندا اتاقتى شيندلەر ءتىزىمىن ءتۇزۋشى ميتەك (مەچيسلاۆ) پەمپەر قايتىس بولدى. وسى تىزىمگە ەنگىزىلگەن كونتسلاگەرلەردەگى بىرقاتار ەۆرەي ەكىنشى دۇنيەجۇزىلىك سوعىس كەزىندە اجالدان اراشالاپ الىنعان بولاتىن.
پەمپەر 1920 جىلى پولشانىڭ كراكوۆ قالاسىندا ەۆرەي وتباسىندا دۇنيەگە كەلگەن. پولشا باسىپ الىنعاننان كەيىن ول ءويتىپ-ءبۇيتىپ كونتسلاگەردە كومەندانتتىڭ ماشينيست-كومەكشىسى بولىپ جۇمىس ىستەۋگە قول جەتكىزەدى. نەمىس ازاماتى, انتيفاشيست وسكار شيندلەرمەن دە وسىندا تانىسىپ, 1200 تۇتقىننىڭ ءتىزىمىن تۇزەدى. پەمپەر سوعىس جىلدارىندا ءتۇرلى ايلا-شارعىلارمەن, ءتىپتى پارا بەرۋ ارقىلى دا, تۇتقىنداردى قۇتقارىپ قالۋمەن اينالىسقان.
حالىقارالىق ۇيىمنىڭ وكىلدىگىن جويدى
وزبەكستاننىڭ جوعارعى سوتى Human Rights Watch دەپ اتالاتىن حالىقارالىق قۇقىق قورعاۋ ۇيىمىنىڭ وكىلدىگىن جويۋ تۋرالى تالاپتى قاناعاتتاندىردى. مۇنداي تالاپپەن ءوزبەكستاننىڭ ادىلەت مينسترلىگى شىققان بولاتىن.
تاجىريبە جۇزىندە اتالعان ۇيىم وزبەكستانداعى ءوز قىزمەتىن قايتا جاڭعىرتا الادى. بىراق, بۇل ءۇشىن وعان تىركەۋگە ءوتىنىش بەرۋ, وفيس ورنالاساتىن ورىن تابۋ سياقتى ماسەلەلەردى قوسا ەسەپتەگەندە, وسىنداي پروتسەدۋرالاردىڭ بارىنەن قايتادان ءوتۋ قاجەت. وزبەك بيلىگىنىڭ بۇعان ەندى جول بەرمەيتىنى ايتپاسا دا تۇسىنىكتى. جالپى, اتالعان ۇيىمنىڭ وزبەكستانداعى قىزمەتى ءىس جۇزىندە 2007 جىلى-اق توسقاۋىلعا ۇشىراعان بولاتىن.
قىسقا قايىرىپ ايتقاندا:
ەۋروپارلامەنت دەپۋتاتتارى رۋمىنيا مەن بولگاريانى شەنگەن ايماعىنا قابىلداۋعا شەشىم قابىلداعانىمەن, ەو ەلدەرىنىڭ مينيسترلەرى اتالعان ەكى ەلدىڭ ازىرشە دايىن ەمەس ەكەندىكتەرىن كولدەنەڭ تارتىپ, شەشىمدى شەگەرە تۇرۋ تۋرالى قاۋلى الدى.
قىرعىزستان پارلامەنتى بىشكەكتە ناتو-نىڭ بايلانىس وفيتسەرى ءوفيسىن ورنالاستىرۋ تۋرالى ناتو-مەن اراداعى كەلىسىمدى راتيفيكاتسيالادى. بۇل وفيس بۇعان دەيىن قازاقستاندا ورىن تەپكەن ەدى. ونى ءبىشكەككە اۋىستىرۋ تۋرالى ۇسىنىستى اليانستىڭ حالىقارالىق حاتشىلىعى ۇسىنعان بولاتىن.
تاشكەنتتە وزبەكستان جازۋشىلار وداعىنىڭ مۇشەسى, «ينسون ۆا حۋكۋك» (ادام جانە زاڭ) گازەتىنىڭ قىزمەتكەرى شۋكۋر سوديك قاماۋعا الىندى. وعان لاۋازىم يەسىنە پارا بەردى دەگەن ايىپ تاعىلعان كورىنەدى. قۇقىق قورعاۋشىلار بولسا, وعان تاعىلعان ايىپ قولدان جاسالعان دەپ وتىر.
كامچاتكا ولكەسىنىڭ گۋبەرناتورى ۆ.يليۋحين پەتروپاۆلوۆسك-كامچاتسك اۋدانىندا جۇمىس ىستەيتىن ەڭبەك ميگرانتتارى – گاستاربايتەرلەر ءۇشىن جەكە كەنت تۇرعىزىلاتىنىن مالىمدەدى. بۇل, دەيدى ول, كەلۋشىلەر تاراپىنان جاسالاتىن قىلمىس دەڭگەيىن تومەندەتۋگە مۇمكىندىك بەرەدى.
ينتەرنەت ماتەريالدارى نەگىزىندە ازىرلەندى.