كەشە قازاقستان رەسپۋبليكاسىنىڭ سىرتقى ىستەر ءمينيسترى ەرجان قازىحانوۆ ەلىمىزدە ءوتىپ جاتقان 7-ءشى بۇكىلالەمدىك يسلام ەكونوميكالىق فورۋمىنا كەلگەن دجيبۋتي رەسپۋبليكاسىنىڭ سىرتقى ىستەر ءمينيسترى ماحمۋد الي يۋسۋفپەن جانە برازيليا فەدەراتيۆتىك رەسپۋبليكاسى سىرتقى بايلانىستار ءمينيسترىنىڭ ورىنباسارى ماريا ەديلەۋزا فونتونەللو رەيسپەن ەكىجاقتى كەزدەسۋلەر وتكىزدى.
الدىمەن افريكادان كەلگەن ارىپتەسى ماحمۋد يۋسۋفپەن كەزدەسكەن قازاقستان سىرتقى ساياسات ۆەدومستۆوسىنىڭ باسشىسى اڭگىمە بارىسىندا ەلىمىز تاۋەلسىزدىگىنىڭ 20 جىلدىعىندا جانە قازاقستاننىڭ يكۇ ءسىم كەڭەسىندەگى ءتوراعالىعى قارساڭىندا «يسلامدىق داۆوستىڭ» ءوتۋىنىڭ وزەكتىلىگىنە توقتالىپ, وعان قاتىناسۋشىلاردىڭ قاتارىنا قاراپ, قازاقستانمەن ەكونوميكالىق ىنتىماقتاستىقتى دامىتۋعا دەگەن ىقىلاستىڭ قانشالىقتى جوعارى ەكەنىن اڭداۋعا بولاتىنىنا توقتالدى.
كەزدەسۋ بارىسىندا ەرجان قازىحانوۆ پەن ماحمۋد يۋسۋف قازاقستان مەن دجيبۋتي اراسىندا ءتيىمدى بايلانىستار جانە يسلام الەمى قاۋىمداستىعىنىڭ تولىققاندى ىسكەر مۇشەلەرى رەتىندە ءوزارا ءتيىمدى ىنتىماقتاستىق ورناتۋعا قىزىعۋشىلىقتارىن ءبىلدىردى. تاراپتار ىقپالداستىقتى دامىتۋدا, اتاپ ايتقاندا, اۋىلشارۋاشىلىق جانە كولىك-تاسىمال سالالارى بويىنشا قارىم-قاتىناستاردى جولعا قويۋدىڭ ماڭىزدىلىعىنا ءمان بەردى.
قازاقستانعا دجيبۋتي پرەزيدەنتى يسمايل ومار گەللە باستاعان دەلەگاتسيانىڭ ساپارى ەكى جاقتى بايلانىستاردىڭ كەڭەيۋىنە قاجەتتى سەرپىلىس بەرەتىنى انىق, دەپ اتاپ ءوتتى مينيسترلەر جانە ەكى ەل ءبىر-ءبىرىنىڭ ەكونوميكالىق الەۋەتىن باعالاۋ ماقساتىندا ىسكەر توپتارمەن الماسىپ, ءوزارا ساپارلار وتكىزۋىنىڭ قاجەتتىگىن اتادى.
سونداي-اق, سىرتقى ساياسات ۆەدومستۆولارىنىڭ باسشىلارى قازىرگى تاڭداعى حالىقارالىق جانە ايماقتىق وزەكتى ماسەلەلەر بويىنشا پىكىر الماستى. تاياۋ شىعىس پەن سولتۇستىك افريكاداعى جاعدايلارعا توقتالا وتىرىپ, ە.قازىحانوۆ قازاقستان يكۇ ءتوراعاسى رەتىندە اراب ەلدەرىنە ولاردىڭ حالىقارالىق جانە ايماقتىق قاۋىپسىزدىكتى تۇراقتاندىرۋ مەن نىعايتۋ جولىندا قولۇشىن بەرەتىنىن اتاپ ءوتتى.
افريكالىق ارىپتەسىمەن كەزدەسۋدەن كەيىن قازاقستان سىرتقى ساياسات ۆەدومستۆوسىنىڭ باسشىسى برازيليا فەدەراتيۆتىك رەسپۋبليكاسى سىرتقى بايلانىستار مينيسترىنىڭ ورىنباسارى ماريا ەديلەۋزا فونتونەللو رەيسپەن كەزدەستى. ونىڭ بارىسىندا اڭگىمەلەسۋشى تاراپتار استانا مەن برازيليا اراسىندا جوعارى دەڭگەيدە قول جەتكىزىلگەن كەلىسىمدەردىڭ جۇزەگە اسۋ بارىسىن تالقىعا سالدى.
قازاقستان مەن برازيليا اراسىنداعى تاۋار اينالىمىنىڭ ەلەۋلى قارقىنى بارلىعىنا توقتالعان ديپلوماتتار ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميتەتتىڭ قۇرىلۋى ەكى ەلدىڭ كاسىپكەرلەرىنە قاجەتتى ىسكەرلىك ءمۇمكىندىكتەر ءجونىندەگى اقپارات الىپ تۇرۋىنا ايتارلىقتاي ىقپال جاسايتىنىن ايتىپ ءوتتى.
ىنتىماقتاستىقتىڭ بولاشاعى زور باعىتتارىنا توقتالعان قازاقستاندىق مينيستر برازيليالىق كاپيتالدىڭ قازاقستان ەكونوميكاسىنىڭ شيكىزاتتىق ەمەس سەكتورىندا بەلسەندى ارالاسۋىنا قىزىعۋشىلىعىن ءبىلدىرىپ, اۋىلشارۋاشىلىق, اۆياتسيالىق قۇرىلىس جانە كوسموس سالالارىنداعى ءوزارا ءتيىمدى ىنتىماقتاستىق بولاشاعى زور ەكەنىن ەرەكشە اتاپ ءوتتى. سونداي-اق, ە.قازىحانوۆ قازاقستان مەن برازيليا الەمدەگى ءتۇرلى ەتنوستار مەن كونفەسسيالار اراسىنداعى تەڭ دارەجەلى قارىم-قاتىناستى ساقتاپ وتىرعان از ەلدىڭ قاتارىنا كىرەتىنىن اتاي وتىرىپ, وركەنيەتتەر اليانسىنىڭ جانە الەمدىك جانە ءداستۇرلى دىندەر كوشباسشىلارى سەزدەرىنىڭ ورتاق ماقساتتارىنا قول جەتكىزۋگە بارىنشا كۇش سالىناتىنىن ايتتى.
كەزدەسۋدە ەلىمىزدىڭ يكۇ ءسىم كەڭەسىنىڭ توراعاسى رەتىندە برازيليانىڭ يكۇ-عا باقىلاۋشى ءمارتەبەسىن الۋعا ۇسىنعان ءوتىنىشىن قولداۋعا دايىن ەكەندىگى دە ءمالىم ەتىلدى.
انار تولەۋحانقىزى.