ەلباسى: «قارۋلى كۇشتەرىمىز – تاۋەلسىزدىگىمىزدىڭ باستى تىرەگى»

«بيىل قارۋلى كۇشتەرىمىزدىڭ 25 جىلدىق مەرەكەسىن اتاپ وتۋدەمىز. مەن شيرەك عاسىر بۇرىن تاۋەلسىز ەلىمىزدىڭ ءتول ارمياسىن قۇرۋ تۋرالى ءدال بۇگىنگى كۇنى جارلىققا قول قويعان بولاتىنمىن. سودان بەرى از عانا ۋاقىت وتسە دە, قارۋلى كۇشتەرىمىز بەس قارۋى ساي زاماناۋي ۇلگىدەگى ايبىندى ارمياعا اينالدى. سايىپ قىران ساربازدارىمىز بۇگىندە ۇلى دالانىڭ سەنىمدى قورعانى, ازاماتتىعىمىزدىڭ الماس الداسپانى. ءبىز قازىرگى زامان تالاپتارىنا ساي كەلەتىن الەۋەتتى اسكەرىمىزدى جاساقتادىق. ەل قاۋىپسىزدىگىنىڭ باستى باعىتتارى ايقىندالدى. اسكەري دوكترينامىز قابىلداندى. ەكونوميكامىز قارقىندى دامىعان سايىن ەلىمىزدىڭ قارۋلى كۇشتەرى دە جەتىلىپ, نىعايا ءتۇستى. اسكەري قاۋىپسىزدىگىمىز «قازاقستان-2050» باعدارلاماسىنىڭ باستى باعىتتارىنىڭ ءبىرى بولىپ سانالادى. ءبىزدىڭ اسكەرىمىز تمد ەلدەرىنىڭ ىشىندە الدىڭعى قاتارلى اسكەر رەتىندە تانىلدى», – دەدى مەملەكەت باسشىسى.  سونىمەن قاتار, ەلباسى اسكەري قىزمەتشىلەردى باتىر بابالارىمىزدىڭ ەرلىك جولىن ودان ارى جالعاستىرۋعا شاقىرىپ, ۇلى وتان سوعىسىنىڭ ارداگەرلەرىنە ريزاشىلىعىن ءبىلدىردى.  «بولاشاق ۇرپاق ءۇشىن تاۋەلسىز, قۋاتتى قازاقستاندى قۇرۋعا مۇمكىنشىلىك جاساعاندارىڭىز ءۇشىن بارلىق ارداگەرلەرگە شىنايى ريزاشىلىعىمدى بىلدىرەمىن. ءبىزدىڭ ەلىمىزدىڭ قارۋلى كۇشتەرى سىزدەردىڭ جاۋىنگەرلىك داڭقتارىڭىزدى جالعاستىرۋشىلار. وتاندى قورعاۋ جانە ونىڭ قاۋىپسىزدىگىنە قامقورلىق تانىتۋ – ەلىمىزدىڭ ءاربىر ازاماتىنىڭ بورىشى ءارى مىندەتى, – دەدى قر قارۋلى كۇشتەرىنىڭ جوعارعى باس قولباسشىسى. – قارۋلى كۇشتەرىمىز ءار ۋاقىتتا دا تاۋەلسىزدىگىمىزدىڭ باستى تىرەگى بولىپ قالا بەرەدى. سىزدەر وزدەرىڭىزدىڭ قاسيەتتى بورىشتارىڭىزدى ادال اتقارىپ, تۋعان جەرىمىزدىڭ تىنىشتىعىن قورعاڭىزدار, وزدەرىڭىزدىڭ كاسىبي شەبەرلىكتەرىڭىزدى, جاۋىنگەرلىك داعدىلارىڭىزدى ارتتىرىپ, جاۋىنگەرلىك باۋىرلاستىق پەن بىرلىكتى نىعايتىڭىزدار. مەرەيتويلىق شەرۋدىڭ قازاقستاندىق ارميانىڭ اسكەري قۋاتىن, جوعارى رۋحىن كورسەتەتىندىگىنە سەنىمدىمىن».