شەتەلدىك قوناقتار كوپ كەلەتىن بۇل دۇنيەجۇزىلىك ماڭىزى بار شارادا قىزمەت كورسەتۋ ءۇشىن بارۋدىڭ باستى شارتى – اعىلشىن ءتىلىن ءبىلۋى كەرەك. سوندىقتان پوليتسەيلەرگە وبلىستىق ءتىل ۇيرەتۋ ورتالىعىندا اعىلشىن ءتىلىنىڭ مامانى نازەركە تۇرعىنعوجينا ءتورت اي بويى ساباق بەردى. پوليتسەيلەر ءتىلدى تەز مەڭگەرۋى ءۇشىن جاڭا ادىستەمەلەردى, ىشكى ىستەر ورگاندارى جۇمىسىنا قاتىستى كۇندەلىكتى سوزدەردى مەڭگەرۋ ءادىسىن قولدانا وتىرىپ, جاقسى ناتيجەگە قول جەتكىزدى. − تىڭداۋشىلار قىسقا كۋرستى وقىعانىنا قاراماستان ءتىلدى اجەپتاۋىر مەڭگەردى, وزدەرىنىڭ بازالىق ءبىلىمى دە كومەكتەستى, − دەيدى نازەركە يسكاندەربەكقىزى. حالىقارالىق كورمە جۇمىسىنا تەك ۆولونتەرلەر عانا ەمەس, پوليتسيا قىزمەتكەرلەرى دە تارتىلاتىنى بەلگىلى. جۇمىس بارىسىندا ولارعا شەتەلدىك تۋريستەرمەن, قوناقتارمەن اعىلشىن تىلىندە تىلدەسۋگە تۋرا كەلەدى. وبلىستىق ىشكى ىستەر دەپارتامەنتىندەگى ارنايى جەدەل ارەكەت ەتۋ وتريادىنىڭ قىزمەتكەرى ىڭكار وتەتىلەۋوۆ قازاق, ورىس, اعىلشىن تىلدەرىندە ەركىن سويلەيدى. − مەنىڭ ءتىل ۇيرەنۋگە قابىلەتىم جوعارى بولسا كەرەك. اعىلشىن ءتىلى كۋرسىنا ءوز ىنتا-ىقىلاسىممەن باردىم. قازىر اعىلشىن ءتىلىن ەركىن تۇسىنەمىن, قينالماي جاۋاپ قايتارا الامىن, − دەيدى ىڭكار. ول اعىلشىن تىلىنەن تەستى دە جاقسى تاپسىردى. سونىمەن قاتار جول-پاترۋلدىك پوليتسيا باتالونىنىڭ قىزمەتكەرلەرى دە اعىلشىن تىلىنەن ۇزدىك ناتيجە كورسەتتى. − ەكسپو-عا كەلگەن شەت ەلدىك قوناقتار استانانىڭ كوركىنە تامسانىپ قانا قويمايدى, ءبىزدىڭ پوليتسەيلەردىڭ دەڭگەيىنە دە ريزاشىلىقپەن تاڭقالادى دەپ ويلايمىن, − دەيدى جول-پاترۋلدىك پوليتسيا باتالونىنىڭ كومانديرى ۆيتالي تسوي. وبلىستىق ءتىل ۇيرەنۋ ورتا-لىعىنىڭ ديرەكتورى گۇلنار تالاپوۆانىڭ ايتۋىنشا, پوليتسەيلەر اعىلشىن تىلىندە ءوزىن تانىستىرۋعا, شەتەلدىك قوناقتار سۇراعىنا جاۋاپ بەرۋگە جانە قالادا اداسىپ قالعاندار كەزدەسسە جول سىلتەۋگە دايىن بولۋى كەرەك. ولار ءتىل ۇيرەنۋ بارىسىندا وسى مىندەتتەرگە جاۋاپ بەرەتىندەي سوزدىك قورىن مەڭگەردى. اعىلشىن ءتىلىنىڭ وقىتۋشىسى پوليتسەيلەرگە سەرتيفيكاتتارمەن بىرگە اعىلشىن تىلىندە قاجەت بولۋى مۇمكىن سوزدەردەن تۇراتىن قالتا سوزدىگىن دە دايىنداپ, تابىس ەتتى. ايتا كەتەيىك, وبلىستىق ىشكى ىستەر دەپارتامەنتىنەن 60 تىڭداۋشى جىل سايىن ءتىل ۇيرەتۋ ورتالىعىندا قازاق ءتىلىن, 30 تىڭداۋشى اعىلشىن ءتىلىن ۇيرەنۋگە قاتىسادى.
ءنازيرا جارىمبەتوۆا, «ەگەمەن قازاقستان»
قوستاناي