بىرنەشە اۆتوبۋسقا مىنگەن ۇلكەن-كىشى الاتاۋ باۋرايىنا الماتى اپورتىنىڭ جاڭا سۇرپىن وتىرعىزۋعا اسىقتى. يگى باستامانى الماتىلىق كاسىپكەرلەر قولعا العان. ينۆەستيتسيالىق جوبانىڭ جالپى قۇنى 400 ملن تەڭگە. ىلە الاتاۋى باۋرايىنداعى 17گا اۋماققا باستاپقى ۋاقىتتا 3 مىڭ, كەيىننەن 10 مىڭ جاسىل جەلەك وتىرعىزىلماق. 17گا اۋماقتى 49 جىلعا جالعا العان كاسىپكەرلەر, المانىڭ جاڭا سۇرپىن جانداندىرىپ, اتالعان باقتاعى بۇرىننان بار الما اعاشتارىن ەرەكشە كۇتىمگە الىپ, قايتا قالپىنا كەلتىرمەك.
«وتىرعىزىلعان كوشەتتەردى جەتىلدىرۋ ءۇشىن ەشقانداي حيميالىق قوسپا قولدانبايمىز. ياعني, اعاشتار تابيعي جولمەن وسىرىلەتىن بولادى. مال جايىلىمىنان ساقتاۋ ءۇشىن باق توڭىرەگىن شارباقپەن قورشايتىن بولامىز. ناعىز اپورت اعاشىنىڭ قالىپتاسۋىنا قۇنارلى توپىراق پەن ەرەكشە كۇتىم قاجەت» دەيدى اگرانوم سامير يسمايلحانوۆ.
ماماندار ەگىلگەن جاڭا سۇرىپتى كوشەتتەر تەك 9 جىلدان كەيىن جەمىس بەرە باستايتىنىن ايتادى. ءدامى ءتىل ۇيىرەتىن, كولەمى قاۋىنداي الماتىنىڭ الەمگە ايگىلى اسەم اپورتىمەن قايتا قاۋىشاتىن كۇندە الىس ەمەس دەپ ۇمىتتەنەيىك.
ارمان وكتيابر,
«ەگەمەن قازاقستان»
الماتى