ومىربەك باقىتوۆ, مەدەت مەيىرحان جانە لەسبەك سادىقوۆ بيوگاز, كۇن جانە جەل ەنەرگياسىن وندىرەتىن ارنايى قوندىرعى ارقىلى جىلىجايدا دارىلىك وسىمدىكتەر مەن ءتۇرلى فيتوشايلەر وسىرمەك.
– جەل ەنەرگياسىنىڭ كەلەشەگى زور. ەكولوگيالىق تۇرعىدان تازا, قورى ەشۋاقىتتا سارقىلمايدى, ارزان ءارى ءتيىمدى. كۇن – ەنەرگيانىڭ اسا قۋاتتى كوزى. ونىڭ ساۋلەسى اسپان دەنەلەرىن قىزدىرىپ, تىرشىلىككە جارىق پەن جىلۋ بەرەدى. ماسەلەن, كۇن سەكۋندىنا جۇزدەگەن ميلليون يادرولىق بومبانىڭ جارىلىسىنا تەڭ ەنەرگيا ءبولىپ شىعارادى. ال, بيوگاز الەمدىك ەنەرگورەسۋرستاردىڭ وننان ءبىرىن قۇرايدى. قۋاتتىڭ بۇل ءتۇرىن ءوندىرۋ تەحنولوگياسى وتە قاراپايىم. بيوگازدى ءۇي رادياتورلارىن جىلىتۋعا, ءدان كەپتىرۋگە, كولىكتەردىڭ جانۋ وتىنى رەتىندە پايدالانۋعا بولادى. قۇرامى جاعىنان بيوگازدىڭ تابيعي گازدان ايىرماشىلىعى از, – دەيدى جوبا اۆتورلارى.
ايتۋلارىنشا, جىلىجاي وندىرىسىندە بالامالى قۋات كوزدەرىن پايدالانىپ, جاڭا تەحنولوگيالاردى قولدانۋ ونىمدىلىكتى ەداۋىر جوعارىلاتۋعا ىقپال ەتەدى.
بۇگىندە ادامزاتتىڭ ەنەرگياعا كاجەتتىلىگى جىل سايىن ارتۋدا. اقش, قىتاي, گەرمانيا, جاپونيا سياقتى ەلدەر وزدەرىنىڭ ەنەرگەتيكالىق قۋات قۇرىلىمدارىنا ءداستۇرلى ەمەس ەنەرگيا كوزدەرىن ەنگىزۋدە. بۇل تاراپتا ارنايى مەملەكەتتىك باعدارلامالار دا قابىلدانۋدا. قازاقستاننىڭ كليماتتىق جاعدايى كۇن قۋاتىن پايدالانۋعا قولايلى. ەلىمىزدە كۇن ەنەرگياسىن ءوندىرۋ مۇمكىندىگى جىلىنا 2,5 ميلليارد كيلوۆاتت-ساعاتتى قۇرايدى. بۇل تارازدىق جاس عالىمداردى جاڭا جوبالاردى ىسكە اسىرۋعا مول مۇمكىندىك بەرەدى.
– ەنەرگيا جەتىسپەۋشىلىگى ماسەلەسىن شەشۋدىڭ ءبىر امالى – ونى ۇنەمدەۋ. قازىرگى كۇندە الەم جۇرتشىلىعى ەلەكتر قۋاتىن جاپپاي ۇنەمدەۋ قاجەتتىلىگىنە ەرەكشە نازار اۋدارۋدا. تارمپي ستۋدەنتتەرى جاساعان قوندىرعى جەتكىلىكتى مولشەردە قۋات وندىرەتىندىكتەن, ەنەرگيانى ايتارلىقتاي ۇنەمدەيدى. ءبىز بۇنىڭ وتاندىق ەكونوميكا دامۋىنىڭ ماڭىزدى اسپەكتىسى رەتىندەگى تيىمدىلىگىن ايقىن كورىپ وتىرمىز, – دەپ اتاپ ءوتتى جوبا اۆتورلارىنىڭ عىلىمي جەتەكشىسى, حيميا-بيولوگيا فاكۋلتەتىنىڭ وقىتۋشىسى رۋستام ۇكىباەۆ.
بۇل جوبا ينستيتۋت زەرتحاناسىندا سىناقتان وتكىزىلىپ, ستۋدەنتتەر ەمدىك ءشوپ ءوسىرۋ جانە ونى وڭدەۋگە بولاتىندىعىن دالەلدەگەن.
جاندار اسان,
تاراز