«دانىككەننەن – قۇنىققان جامان». قۇلقىننىڭ ق ۇلى بولۋدان ساقتاندىراتىن وسى بابالار وسيەتىن ۇستانعاننىڭ اداسپاسى انىق. بىراق, ەكىنىڭ ءبىرى وسى جولدى ۇستانا ما, ماسەلە وسىندا. قوعامدى دەندەگەن كەسەلدىڭ الدىن الۋعا بەلسەنە كىرىسكەن «نۇر وتان» حالىقتىق-دەموكراتيالىق پارتياسىنىڭ «بولاشاققا – جەمقورلىقسىز!» شاراسى استانادان باستالسا, جەتىسۋ وڭىرىندە جالعاسىپ, كوپشىلىكتەن قولداۋ تاپتى.
مەملەكەت باسشىسىنىڭ سىندارلى ساياساتى مەن ەل تاۋەلسىزدىگىنىڭ 20 جىلدىعىن ەرەكشە بەلسەندىلىكپەن اتاپ ءوتۋدىڭ كەپىلى سانالعان ماڭىزدى شارا رەسپۋبليكالىق جەلىلىك كەستەگە سايكەس وبلىستىق پارتيا فيليالى جانىنداعى جەمقورلىقپەن كۇرەس جونىندەگى قوعامدىق كەڭەس, وبلىستىق پروكۋراتۋرا, سوت جانە قارجى پوليتسياسى, مەملەكەتتىك قىزمەت ىستەرى اگەنتتىگى وبلىستىق اۋماقتىق باسقارماسى-تارتىپتىك كەڭەسىنىڭ بىرلەسۋىمەن ءوتتى. وندا پارتيا فيليالى توراعاسىنىڭ ورىنباسارى س.ابدىقادىروۆ «نۇروتاندىقتار» قوعام دامۋىنا كەدەرگى بولاتىن سىبايلاس جەمقورلىقتىڭ جولىن كەسۋگە باتىل كىرىسكەندەر جەتكىزدى.
جۇمىس ناتيجەسىز ەمەس. بيىل وبلىستىق پارتيا فيليالى مەن اۋدان, قالالارداعى بولىمدەر, قوعامدىق كەڭەستەردە جەمقورلىققا بايلانىستى زاڭ تالابىنا سايكەس جۇمىس جۇرگىزىلگەن. سونداي-اق پارتيا بەدەلىن كوتەرۋ, ۇيىمدى ساياسي ساۋاتتى, ەلى مەن جەرى ءۇشىن ادال قىزمەت ەتەتىن قىزمەتكەرلەرمەن تولىقتىرۋعا ەرەكشە ءمان بەرىلگەنىن دە ايتىپ ءوتتى.
جيىندا وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىنىڭ جاۋاپتى قىزمەتكەرى ا.بەكبوسىنوۆا وتكەن جىلى جۇمىستى جوعارى تالاپ تۇرعىسىندا جالعاستىرۋ بارىسىندا سىبايلاس جەمقورلققا بوي الدىرعان 51 قىلمىس تىركەلگەنىن نازارعا ۇسىندى. سونداي-اق 35 قىلمىستىق ىسكە قاتىستى تەرگەۋ امالدارى اياقتالعان. ءوندىرىسى بىتكەن قىلمىستىق ىستەردەگى شىعىن كولەمى 2,7 ملن.تەڭگەنى قۇراسا, ونىڭ 1,3 ملن.تەڭگەسى مەملەكەت قورجىنىنا قايتارىلىپتى.
مەملەكەتتىك قىزمەتكەردىڭ ار-نامىس كودەكسىنە كىر كەلتىرىپ, پارا الۋ ءىسى بويىنشا 20 قىلمىس اشىلعان. وسىنداي قىزمەت بابىن جەكە باس قامى ءۇشىن پايدالانعاندار اراسىندا باسشى قىزمەتكەرلەردىڭ بولۋى وكىنىشتى ەكەنى دە اڭگىمە ارقاۋىنا اينالدى.
«نۇروتاندىقتار» مەن قارجى پوليتسياسى بىرلەسىپ, قوعامنىڭ جەگى قۇرتى جەمقورلىقتى بولدىرماۋ, قاراپايىم حالىقتىڭ سەنىمىن اقتاۋ جانە مەملەكەتتىك ساياساتقا ساي جۇمىستى جالعاستىرۋعا دەن قويىلىپ, بايىپتى ىستەر جۇرگىزىلۋدە.
قازىرگى كەزدە وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىندە «بولاشاققا –جەمقورلىقسىز» شاراسىنا وراي ازاماتتاردى قابىلداۋ, سەنىم تەلەفونىمەن حابارلاسۋىنا تولىق مۇمكىندىك جاسالعان.
وڭىردە شاراعا بايلانىستى وقۋ ورىندارىندا «تازا سەسسيا» شاراسى دا كەڭىنەن ەتەك العان. بۇل ماسەلە جونىندە ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ پرورەكتورى ە.ءدۇسىپوۆ اڭگىمەلەدى. ارناۋلى كوميسسيا جۇمىسى كوپ ماسەلەگە نازار اۋدارۋى بارىسىندا جەڭ ۇشىنان جالعاسقان دەرەكتەر كەزدەسپەپتى. كوبىنە جۇرتشىلىقتىڭ نازارىنداعى ىشكى ىستەر سالاسى قىزمەتكەرلەرىنىڭ دە وسى ءبىر جات ادەتتەن اۋلاق بولۋىنا نازار اۋدارعاندار ءسوزى دە ورىندى دەۋگە بولدى.
جامان ادەت – جابىسقاق. كوزدىڭ «قۇرتى» – دۇنيە-بايلىققا قول جەتكىزەمىن دەپ ارىنان ادا بولاتىن جەمقورلىقتى اۋىزدىقتاۋ, بولدىرماۋ جايى وسىلاي وتكىر اڭگىمەنىڭ وزەگىنە اينالدى. ول جاي عانا ۇرانمەن ەمەس, ناقتى جۇمىسپەن جالعاساتىنى قۋانتادى.
كۇمىسجان بايجان.
الماتى وبلىسى.