كەشە الماتى قالاسىندا بارشاقالالىق دابىل قاعىلىپ, وقۋ-تاجىريبەلىك سەيسموجاتتىعۋ شاراسى وتكىزىلدى. تاڭەرتەڭگى ساعات 10-دا باستالعان بۇل شارا اراعا مينۋتتاردى تاستاپ, ءبىرشاما ۋاقىتقا دەيىن سوزىلدى. قالانىڭ دۋمان, شاڭىراق سەكىلدى شالعاي اۋداندارىندا توتەنشە جاعدايلار دەپارتامەنتىنىڭ ماماندارى ەل ىشىندە بولىپ, دابىلدى داۋىس كۇشەيتكىشتەر ارقىلى تاراتتى. تەلەراديو ارنالارى دا بۇل شاراعا ءوز ۇلەستەرىن قوستى.
كۇنىلگەرى حاباردار بولعاندىقتان, اڭىراعان دابىل ءۇنىنەن شوشىماي, ەرىنسەك تە جوعارعى قاباتتان تومەن ءتۇسىپ, دالاعا بەتتەدىك. قانشا رەت دابىل قاعىلسا, سونشا رەت ءتۇسىپ-شىقتىق. نەگە؟ ءتارتىپ – بارشاعا ورتاق. راس, بۇل ەندى ازاماتتىق تالاپ بولار. دەگەنمەن, «مىنا دابىل مەنىڭ قامىم ءۇشىن سوعىلدى عوي», دەگەن ويدان كەيىن قانشا جەردەن قىزىلكوز پەندە بولساڭ دا, ءارىسى – ەل, بەرىسى – قالا باسشىلىعىنىڭ بۇل شاراسىن قىزۋ قۋاتتايسىڭ.
الماتىداعى مامىر ايىنىڭ باسىنداعى سىلكىنىستەن كەيىن قالا جۇرتشىلىعى دا, كوپتەگەن مەكەمەلەر مەن ۇيىمدار دا بار قاداري-قالىنشە ءزىلزالا كەزىندە جان ساقتاۋدىڭ امال-ءتاسىلىن مەڭگەرۋگە كوشكەن. تەلەارنالاردا دا ەلدى شوشىتىپ الماي تياناقتى ناسيحات ءجۇرگىزۋ جۇمىستارى جولعا قويىلدى. بايقاعانىمىز, قازىر قالا جۇرتى ءاۋ باستاعىداي رەتتى-رەتسىز ورە تۇرەگەلمەي, ءار نارسەگە بايىپپەن قاراپ, ءاربىر اقپاراتتىڭ انىعىن اڭدايتىن بولعان. سەبەبى, قالا بيلىگى ەلمەن قارىم-قاتىناس ورناتۋدىڭ بارشا اپاتتىڭ الدىن الۋعا سەپ ەكەنىن ەندى ءتۇيسىندى. ءاۋ باستا ابدىراپ قالعان باسشىلىق تا, حالىق تا ءبىراز سارساڭعا تۇسكەنىن كىمنەن جاسىرايىق؟
جاپون جەرىندە قۇدايدىڭ قۇتتى كۇنى 3-4 باللدىق سىلكىنىس بولىپ جاتاتىنىن تەلەديداردان كورىپ تە ۇلگەردىك. سوندا ءبىر جاپوننىڭ جانساۋعالاي قاشقانىن, ەلدى ەلىرتىپ ب ۇلىككە باستاعانىن بايقامادىق. سەبەبى, «سابىر بار جەردە – سالاۋات بار». وقۋ قونعان كۇنشىعىس ەلى ءزىلزالانىڭ سالقىنىن سەزگەننەن دابىلداتىپ ءوز حالقىن الاپاتتان اراشالاۋعا اسىعادى ەكەن. ءناتيجەسىندە – كىسى شىعىنى وتە از. ەل امان, جۇرت تىنىش بولسا قيراعان دۇنيەنى قالپىنا كەلتىرۋ ءاپ-ساتتە. مۇنداي جالپىحالىقتىق ساۋاتتىلىققا (قاۋىپسىزدىك شاراسىن مەڭزەپ وتىرمىز) جاپوندار ءبىر جىلدا نەمەسە بىرەر جەر سىلكىنىسىنەن كەيىن قول جەتكىزگەن جوق. «كەمەدەگىنىڭ جانى ءبىر», دەپ ەل مەن بيلىك بىرىگە قيمىلداۋدىڭ ارقاسىندا ناتيجە شىعارىپ وتىر.
اجال مەن قاتەر ايتىپ كەلمەيدى, تابيعاتتىڭ توسىن بۋىرقانىستارى ءبىزدىڭ پەشەنەمىزگە جازىلسا, ودان قاشىپ قۇتىلماق جوق. مەيلى سىنا, مەيلى عايباتتا, ءبارىبىر تابيعات – انا ادام بالاسىن الالاپ كەلىپ ارانداتپايدى. بۇرا تارتىپ, بۇزا شابۋدى ەرمەك قىلا بەرمەي ءوز وتباسىمىزدى, ءوز ورتامىزدى ءتارتىپكە, ساۋاتتىلىققا سۇيرەي بىلسەك جوعالتارىمىزدان تابارىمىز كوپ بولماق.
«بارشاڭىزدىڭ نازارىڭىزعا!!!» دەيتىن ۇرانمەن جۇرگىزىلەتىن بۇل شارا الماتى قالالىق اكىمدىگى ۆەدموستۆوارالىق كومميسسياسىنىڭ شەشىمىمەن توقسان سايىن ءبىر رەت, ال كەي مەكەمەلەر مەن كاسىپورىنداردا ىنتاسىنا قاراي دەمبىل-دەمبىل جالعاسىپ تۇراتىندىعىن ەسكە سالعىمىز كەلەدى.
قانات ەسكەندىر, جۋرناليست.
الماتى.