پارلامەنت ءماجىلىسىنىڭ توراعاسى ورال مۇحامەدجانوۆتىڭ جەتەكشىلىگىمەن پالاتا بيۋروسىنىڭ كەزەكتى وتىرىسى ءوتتى. وندا الداعى اپتادا ءماجىلىستىڭ جالپى وتىرىسىنا شىعارىلاتىن ماسەلەلەر سارالاندى.
پالاتانىڭ حالىقارالىق ىستەر, قورعانىس جانە قاۋىپسىزدىك كوميتەتى بىرنەشە زاڭ جوباسى دەپۋتاتتاردىڭ تالقىسىنا شىعارىلاتىنىن حابارلادى. ولاردىڭ اراسىندا قازاقستان رەسپۋبليكاسى مەن فرانتسۋز رەسپۋبليكاسى, سونداي-اق قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى كەلىسىم مەن حاتتامانى بەكىتۋدى كوزدەيتىن زاڭ جوبالارى بار. «زياتكەرلىك مەنشىك قۇقىقتارىن قورعاۋ مەن ساقتاۋ سالاسىنداعى ءبىرىڭعاي رەتتەۋ قاعيداتتارى تۋرالى كەلىسىمدى راتيفيكاتسيالاۋ تۋرالى», «كەدەن وداعى شەڭبەرىندەگى داۋلار بويىنشا شارۋاشىلىق جۇرگىزۋشى سۋبەكتىلەردىڭ ەۋرازيا ەكونوميكالىق قوعامداستىعىنىڭ سوتىنا جۇگىنۋى جانە ولار بويىنشا سوت ءىسىن جۇرگىزۋ ەرەكشەلىكتەرى تۋرالى شارتتى راتيفيكاتسيالاۋ تۋرالى», «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (تەحنيكالىق جانە كاسىپتىك ءبىلىم بەرۋدى جاڭعىرتۋ جوباسى) راتيفيكاتسيالاۋ تۋرالى» زاڭ جوبالارى دا كۇن ءتارتىبىنە ەنگىزىلدى.
الەۋمەتتىك-مادەني دامۋ كوميتەتى «حالىقتىڭ كوشى-قونى تۋرالى» جانە كەيبىر زاڭنامالىق اكتىلەرگە حالىقتىڭ كوشى-قونى ماسەلەلەرى بويىنشا تۇزەتۋ ەنگىزۋدى كوزدەيتىن زاڭ جوبالارىن ەكىنشى وقىلىمدا كۇن تارتىبىنە ەنگىزۋگە دايىن ەكەنىن مالىمدەدى.
سونىمەن قاتار, زاڭناما جانە سوت-قۇقىقتىق رەفورما كوميتەتى قولدانىستاعى زاڭدارعا قىلمىستىق جانە قىلمىستىق ءىس جۇرگىزۋ زاڭناماسىن جەتىلدىرۋدى قاراستىراتىن زاڭ جوباسىن ەكىنشى وقىلىمدا تالقىعا سالۋدى ۇسىنىپ وتىر.
«ەگەمەن-اقپارات».