ەلورداعا 22-30 مامىر ارالىعىندا گاسترولدىك ساپارمەن كەلگەن قازاق مەملەكەتتىك اكادەميالىق اباي اتىنداعى وپەرا جانە بالەت تەاترى ەل تاۋەلسىزدىگىنىڭ 20 جىلدىعىنا تارتۋ رەتىندە سەگىز تاڭداۋلى وپەرا جانە بالەت قويىلىمىن ۇسىنىپ وتىر. ال مەرەكەلىك شارا نەگىزگى پارتيالاردان ازىرلەنگەن گالا-كونتسەرتپەن قورىتىندىلانباق.
جەتپىس بەس جىلدان استام تاريحى بار ەلىمىزدىڭ باس تەاترى ءوزىنىڭ نەگىزگى سپەكتاكلدەرىن تورقالى تويعا شاشۋ رەتىندە ۇسىنۋدا. گاسترولدىك ساپاردىڭ شىمىلدىعى ا.جۇبانوۆ پەن ل.حاميديدىڭ «اباي» وپەراسىمەن اشىلىپ, ا.سەركەباەۆتىڭ «تىلەپ ءجانە سارىقىز» بالەتىمەن جالعاستى. رەپەرتۋارداعى مۇنان باسقا دا ساحنالىق تۋىندىلار الەم كلاسسيكاسىنىڭ كىل ءىنجۋ-مارجاندارى – دج.ۆەرديدىڭ «تراۆياتا», ر.ۆاگنەردىڭ «تانگەيزەر», گ.دونيتسەتتيدىڭ «ماحاببات سۋسىنى» وپەرالىق شىعارمالارى مەن ا.حاچاتۋرياننىڭ «سپارتاك», پ.چايكوۆسكيدىڭ «سەرەنادا», س.پروكوفەۆتىڭ «رومەو مەن دجۋلەتتا» بالەتتەرى. وتاندىق وپەرا مەن بالەت ونەرىن ورگە سۇيرەپ جۇرگەن قر حالىق ءارتىسى نۇرجامال ۇسەنباەۆا, قر ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى شاحيماردان ابىلەۆ, قر ەڭبەك سىڭىرگەن قايراتكەرى ءجاميلا باسپاقوۆا, بولات بوكەنوۆ, بەيىمبەت قوجاباەۆ, حالىقارالىق بايقاۋلاردىڭ لاۋرەاتتارى دينا حامزينا, دينا دۇتماعامبەتوۆا, جانەل تۇكەەۆا, نۇرلان قوناقباەۆ, ءامىر جەكسەنبەك, گۇلۆيرا قۇربانوۆا, فارحاد بوريەۆ سياقتى ت.ب. ساڭلاقتار ساحنادا توعىز كۇن توقتاۋسىز ونەر كورسەتكەندە, كوكىرەك كەرە ءمولدىر اۋامەن ءبىر تىنىستاعانداي اسەر الۋدىڭ ءوزى زور عانيبەت ەمەس پە؟
شىمىلدىقتىڭ ەجەلدەن قىرى مەن سىرى جۇرتقا ءمالىم, كوپ جىلدار ساحنا تورىنەن تۇسپەي كەلە جاتقان «اباي» وپەراسىمەن اشىلۋى بەكەر ەمەس. اباي – قاي ءداۋىردىڭ دە ساناسى مەن ساحناسىندا قاتار ءومىر سۇرەتىن الىپ تۇلعا. ول – جاسارىپ, جاڭعىرىپ, اقىل-ويدىڭ دارياسىنا جەتكەن جاسىندا قايتا دۇنيەگە كەلىپ, ءار ۇرپاق, ءار ءداۋىر ءوز پايىمىندا پاراقتاپ وقىپ وتىراتىن كىتاپ. ۇزىلمەي كەلە جاتقان ۇردىسكە ۇلبىرەپ جاستار كەلگەن سايىن ءوز تاراپتارىنان تىڭ تىنىس پەن ساف سارىن قوسىپ وتىراتىنى تاعى بار. اباي ارقىلى تەاتردىڭ تالاي بۋىنى ءوسىپ جەتىلۋدە. ءتول تامىردان ءنار العان جەردىڭ ءشوبى شۇيگىن, قىرانى تۇيعىن بولىپ كەلەتىنى سياقتى داستۇرگە بەرىك ۇجىمنىڭ ۇنەمى بيىكتەن كورىنۋ سەبەبىن الىستان ىزدەپ اۋرە بولۋدىڭ قاجەتى جوق. ونى مۇنىڭ رەپەرتۋار شىڭىنا قايدا بارسا دا ۇلتتىق وپەرانى قويۋ تيناقتىعىنان تانيسىز. «اباي» – تەاتردىڭ سونداي تولقۇجاتى, بەت-بەينەسى. كاسىبي دەڭگەيدى وسىنداعى باستى پارتيالاردى ورىنداۋدان اجىراتادى. بۇدان جوعارى باعا الىپ شىققان ادام الەمدىك كلاسسيكانىڭ قايسىبىر سىنىنان دا سۇرىنبەي وتەرىنە سەنىم مول. «اباي» – قازاق ۇلتتىق وپەرا ونەرىنىڭ مەكتەبى ىسپەتتى دەسەك, ەلورداداعى ساحنالىق كورىنىستەن سول باعا ايقىن اڭعارىلعان. ابايدى شاشاۋسىز بەينەلەگەن شاحيماردان ابىلەۆ, اجاردى سومداعان نۇرجامال ۇسەنباەۆا, سونداي-اق, ايدار, جيرەنشە پارتيالارىن ءمۇلتىكسىز ورىنداعان نۇرجان بوجاكەنوۆ, تالعات كۇزەنباەۆ ەڭبەكتەرىنە قانداي ماقتاۋ ءسوز ايتسا دا ارتىقتىق ەتپەيدى.
قاراشاش توقسانباي.