بيىلعى كوكتەمدە باتىس قازاقستان وبلىسى اۋماعىن جايپاپ وتكەن تاسقىن سۋ مۇنداعى ءبىلىم بەرۋ جۇيەسىنە دە ايتارلىقتاي سالقىنىن تيگىزدى. سونىڭ سالدارىنان ون بەس ءبىلىم بەرۋ نىسانى, مەكتەپتەر مەن بالاباقشالار سۋ استىندا قالدى. ءاسىرەسە تاسقالا مەن زەلەنوۆ اۋداندارىندا جانە ورال قالاسىندا ونىڭ تيگىزگەن زاردابى ايتارلىقتاي. بىرقاتار ءبىلىم بەرۋ نىساندارىن باسىپ قالعان تاسقىن سۋدىڭ دەڭگەيى مەتر جارىمعا دەيىن جەتتى. بۇگىندە ءبۇلىنگەن عيماراتتاردى تولىق قالپىنا كەلتىرۋ جۇمىستارى ءجۇرگىزىلۋدە. باتىس قازاقستان وبلىستىق ءبىلىم باسقارماسىنىڭ باستىعى مارات توقجانوۆپەن ءتىلشىمىزدىڭ اڭگىمەسى وسىنداي باعىتتا ءوربىدى.
– مارات لۇقپان ۇلى, اقيقاتىن ايتىڭىزشى, بيىلعى تاسقىن سۋدىڭ مول بولاتىنى, ونىڭ تۇرعىن ۇيلەر مەن الەۋمەتتىك نىسانداردى باسىپ قالاتىنى ءجونىندە سىزدەرگە الدىن-الا حابار ءتيدى مە؟
– تيمەدى دەسەم, اقيقاتتان اتتاپ كەتەرمىن. بىزگە توتەنشە جاعدايلار مينيسترلىگىنە قاراستى مامانداردىڭ تاسقىننان ساقتانۋ, وعان الدىن-الا قام جاساۋ ءجونىندەگى حابارلاماسى كۇنى بۇرىن ايتىلعانى راس. سول ءساتتەن باستاپ وبلىستاعى ءبىلىم بەرۋ مەكەمەلەرىنىڭ باسشىلارى مەن پەداگوگيكالىق ۇجىمدارى ءبىرىنشى كەزەكتە ادام ءومىرىنە قاۋىپ تيگىزبەۋ شارالارىنا ءمان بەردى. سۋ باسۋى ىقتيمال تۇستارداعى ءبىلىم بەرۋ عيماراتتارىن ەۆاكۋاتسيالاۋ ماسەلەلەرى دە الدىن-الا ويلاستىرىلدى.
– بۇگىندە سۋ تاسقىنىنان ءبۇلىنگەن مەكتەپ, بالاباقشا عيماراتتارىن قايتا قالپىنا كەلتىرۋ ءىسى قولعا الىنعان بولار.
– سۋ تاسقىنى زاردابىنان باسپاناسىز قالعاندارعا وبلىس ورتالىعىنان كوپ قاباتتى تۇرعىن ءۇيلەر سالىناتىنىن ەستىگەن بولارسىز. ەندەشە, بۇل ءۇيلەردىڭ اينالاسىنا مەكتەپ مەن بالاباقشالار تۇرعىزىلۋى زاڭدى عوي. مىنە, وسى تالاپقا ساي ب ۇلىنگەن مەكتەپتەر مەن بالاباقشالار بۇرىنعى ورنىنا ەمەس, ورال قالاسىنداعى بەسىنشى شاعىن اۋداندا بوي كوتەرۋدە. سونىمەن بىرگە, كۇردەلى ءجوندەۋلەر ءىسىنىڭ بارىسى دا ءتيىستى ورگانداردىڭ ۇدايى نازارىندا. ونىڭ ۋاقىتىندا ءارى ساپالى ءتۇردە ءازىر بولاتىنىنا سەنىمىمىز مول. ءبۇگىنگى كۇنى جاڭا قۇرىلىستار سالۋعا ءجانە كۇردەلى ءجوندەۋلەر ءجۇرگىزۋگە قاجەتتى العىشارتتاردىڭ بارلىعى اتقارىلدى. ءارى قۇرىلىس جۇمىستارى جەدەل قارقىنمەن باستالدى.
رەسپۋبليكا ۇكىمەتى تاراپىنان كورسەتىلگەن اۋقىمدى قارجىلىق قولداۋ وبلىستىڭ ءبىلىم بەرۋ سالاسىنا دا جاۋاپتى مىندەتتەر جۇكتەيدى. ءارى بۇل بىزگە كورسەتىلگەن شەكسىز سەنىم دە. ەندىگى ءماسەلە – الداعى ماقساتتار مەن مىندەتتەردى تياناقتى ورىنداۋ دەپ ءبىلەمىز. قايتكەندە دە بۇگىنگى كۇنى قولعا الىنعان اسا اۋقىمدى ءىس-شارالار رەسپۋبليكادا ءبىلىم بەرۋدى دامىتۋدىڭ 2011-2020 جىلدارعا ارنالعان مەملەكەتتىك باعدارلاماسىنا تولىق ءسايكەس كەلۋگە ءتيىس. سولاي بولاتىنىنا دا كۇمانىمىز جوق.
– تاسقىننىڭ ءبىلىم بەرۋ جۇيەسىنە قاتىستى تيگىزگەن زارداپتارىن جويۋ تەك قانا جاڭا نىساندار تۇرعىزۋ نەمەسە ولارعا كۇردەلى ءجوندەۋلەر جۇرگىزۋ ىسىمەن شەكتەلمەيدى. قىسقاسى, بۇل ءماسەلەگە جان-جاقتى, ءارى كەشەندى كوزقاراس قاجەت. ءماسەلەنىڭ وسىنداي ءمانىسى تۋرالى نە ايتۋعا بولادى؟
– ارينە, ءسوزىڭىزدىڭ جانى بار. ويتكەنى, ءبىلىم بەرۋ ءۇردىسى مەن ونىڭ سۋبەكتىلەرى تۇپتەي كەلگەندە الەۋمەتتىك جۇيەلەر قاتارىنا كىرەدى. بۇل پەداگوگتار, وقۋشىلار مەن اتا-انالار, قوعامدىق ۇيىمدار سەكىلدى ءبىر-بىرىمەن تىعىز بايلانىسى بار تۇتاس ينستيتۋت ىسپەتتەس. ولاي بولسا, سۋ تاسقىنىنىڭ ءوڭىردەگى ءبىلىم بەرۋ ءجۇيەسىنە اكەلگەن زارداپتارىن ءوزىڭىز ايتقانداي, تەك ءبىلىم بەرۋ نىساندارىن جوندەۋ جانە قايتا تۇرعىزۋ ىسىمەن شەكتەي سالۋعا بولمايدى. قولدا بار مالىمەتتەرگە قاراعاندا, سۋ تاسقىنىنان وبلىستىڭ ەلۋ مەكتەبىندەگى 1436 وقۋشى زارداپ شەگىپتى. وسى ورايدا, ولارعا دەر كەزىندە قاجەتتى ماتەريالدىق, مورالدىق جانە پسيحولوگيالىق كومەكتەر كورسەتىلگەنىن ايتا كەتۋدى ءبىلىم بەرۋ سالاسىنىڭ باسشىسى رەتىندەگى باستى پارىزىمنىڭ ءبىرى دەپ ەسەپتەيمىن.
تاعى ءبىر ءيىرىم ءتومەندەگىدەي. تاسقىن جولىنداعىنىڭ ءبارىن اپىرىپ-جاپىرىپ كەلىپ قالعان كەزدە, كوپتەگەن وتباسى مۇشەلەرى تەك قۇجاتتارىن عانا الىپ ۇلگەردى. مىنە, وسىنداي وتباسىنداعى وقۋشىلار وقۋلىقتار جانە وقۋ قۇرالدارىمەن دەر كەزىندە قامتاماسىز ەتىلدى.
– مەكتەپتەردە سوڭعى قوڭىراۋ سوعىلىپ, وقۋشىلاردىڭ جازعى دەمالىسى باستالاتىن كۇن دە تاياۋ. وسى ورايدا تاسقىننان زارداپ شەككەن وقۋشىلارعا بۇل كەزەڭدە قانداي قولداۋ مەن جەڭىلدىكتەر جاسالماق؟
– ولارعا نەگىزگى كومەك وبلىستىڭ ءوزىنىڭ ىشكى ءمۇمكىندىكتەرى مەن رەزەرۆتەرى ەسەبىنەن جاسالىپ وتىر. سوعان ساي تاسقىن سۋ زاردابىنا تاپ بولعان جەتكىنشەكتەر ايماقتاعى تىنىعۋ ورىندارى مەن لاگەرلەردە ارنايى جولدامالار بويىنشا دەمالماق. مۇنىڭ سىرتىندا رەسپۋبليكانىڭ وزگە ءوڭىرلەرىندەگى دەمالىس ورتالىقتارى مۇنداي توپتار قاتارىنا كىرەتىن وقۋشىلاردى قابىلداۋعا نيەت ءبىلدىردى. ولاردىڭ قاتارىندا «بالداۋرەن» رەسپۋبليكالىق وقۋ-ساۋىقتىرۋ ورتالىعى, ۇلتتىق «سۇڭقار» پارك بازاسى ءجانە «قازمۇنايگاز» جشس بار. بۇعان قوسا 150 بالانىڭ جازعى دەمالىسىن وزدەرىندە وتكىزۋگە شەشىم قابىلداعان ماڭعىستاۋ جانە اقتوبە وبلىستىق اكىمدىكتەرىنە دە ايتار العىسىمىز شەكسىز.
– وبلىس اۋماعىندا تابيعات اپاتى ورىن العان تۇستا شۇعىل وڭتايلى شەشىمدەر قابىلداندى. مۇنى دەر ۋاقىتىندا الىنعان تاكتيكا دەسەك, تاسقىن سۋ زارداپتارىن تولىق جويۋدىڭ ستراتەگياسى دا ىسكە اسىپ جاتقانى كامىل. بۇل ءماسەلەدە ءسىزدىڭ ويىڭىزشا ەسكەرىلەتىن باستى ماسەلەلەر قانداي؟
– وبلىس ورتالىعى ورالدىڭ رەسپۋبليكانىڭ وزگە قالالارىمەن سالىستىرا قاراعانداعى ەڭ باستى گەوگرافيالىق ەرەكشەلىگى – ونىڭ جايىق, شاعان جانە دەركول سەكىلدى ءۇش وزەننىڭ توعىسىندا ورنالاسقانى. ولاي بولسا مۇندا قاي جىلدا دا سۋ تاسقىنى بولۋ قاۋپى بار دەگەن ءسوز. وسى قاۋىپتىڭ ەڭ الدىڭعى شەبىندە ورال قالاسى ماڭىنداعى بىرقاتار ەلدى مەكەندەر مەن ساياجايلار تۇر. وبلىس ورتالىعىنداعى كەيبىر ءبىلىم بەرۋ نىساندارى دا وسى سىزىققا تاياۋ ورنالاسقانى جاسىرىن ەمەس.
سوندىقتان دا ءبىز جىل سايىن وقۋشىلار مەن پەداگوگتاردى شۇعىل ەۆاكۋاتسيا جاساۋعا بەيىمدەۋ ماقساتىندا ءتوتەنشە جاعدايلار كۇندەرىن وتكىزىپ تۇرامىز. مىنە, بۇل ءجايتتىڭ ءوزى بيىلعى تاسقىن سۋ كەزىندە ءوزىنىڭ ءتيىستى ناتيجەسىن بەردى دەپ ساناي الامىز. سونىڭ ءناتيجەسىندە ماتەريالدىق شىعىندار سالىستىرمالى ءتۇردە العاندا مەيلىنشە از بولدى دەپ وي تۇيۋگە تولىق نەگىز بار.
– اڭگىمەڭىزگە راحمەت.
اڭگىمەلەسكەن تەمىر قۇسايىن.