پارلامەنت ءماجىلىسى توراعاسىنىڭ ورىنباسارى ۆلاديمير بوبروۆ ەليزابەت يەگگلە باستاپ كەلگەن ەۋروپارلامەنت دەلەگاتسياسى مۇشەلەرىمەن كەزدەستى, دەپ حابارلادى وسى پالاتانىڭ ءباسپاسوز قىزمەتى.
كەزدەسۋدە ۆ.بوبروۆ مەيماندارعا 3 ساۋىردە وتكەن پرەزيدەنت سايلاۋى تۋرالى ايتىپ بەردى. سايلاۋشىلاردىڭ 95,55 پايىزى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆقا داۋىس بەردى. بۇل سايلاۋداعى جەڭىس ەلدىڭ قارقىندى دامۋىنىڭ ايقىن كورىنىسى بولدى. سايلاۋ ۇدەرىسى تاۋەلسىز ەلدىڭ 20 جىلداعى اتقارعان ىسىنە باعا بەرگەندەي ناتيجەنى كورسەتتى, دەدى ول.
ال ەۋروپارلامەنت دەپۋتاتتارى قازاقستان پارلامەنتى ءماجىلىسىنىڭ دەپۋتاتتارىنا سۇراقتار قويىپ, سايلاۋ ماسەلەسىنە قاتىستى پىكىر الماستى. مەيمانداردىڭ سۇراقتارىنا جاۋاپ بەرە كەلىپ, ۆيتسە-سپيكەر ولاردى قازاقستانداعى دەموكراتيالىق جۇيەلەر مەن سايلاۋ زاڭدىلىقتارىنان حاباردار ەتتى.
«ەگەمەن-اقپارات».