«نۇر وتان» پارتياسىنىڭ «ەرتەڭىڭ ءۇشىن ايانبا!» باعدارلاماسى وتباسىلىق بيزنەستى اشۋ جانە دامىتۋ, سۇرانىسقا يە ماماندىقتى تاڭداۋ, سونداي-اق الەۋمەتتىك قىزمەتتەر مەن تولەمدەردى, مەديتسينالىق قىزمەتتەردى الۋ, تۇرعىن ۇيگە يە بولۋ سياقتى ءارتۇرلى ومىرلىك جاعدايلاردىڭ دۇرىس شەشىمىن تابۋعا كومەكتەسۋگە ارنالعان.
كەشە پاۆلوداردا «نۇر وتان» پارتياسىنىڭ «ەرتەڭىڭ ءۇشىن ايانبا!» باعدارلاماسىنىڭ ىسكە اسىرىلا باستاۋىنا ارنالعان فورۋم بولىپ ءوتتى.
باعدارلامانىڭ تيىمدىلىگىن باعالاۋ ايماعى رەتىندە پاۆلودار وبلىسىنىڭ تاڭدالعانى كەزدەيسوق ەمەس. قازىرگى تاڭدا وبلىس قازاقستاننىڭ ءىرى يندۋستريالدى ايماقتارىنىڭ ءبىرى بولىپ تابىلادى. سونىمەن قاتار ۇلكەن تابيعي-رەسۋرستىق الەۋەتى, وندىرىستىك جانە الەۋمەتتىك ينفراقۇرىلىمى, جوعارى عىلىمي-تەحنيكالىق قۋاتى, ورتالىق ازيا مەن ءسىبىر اراسىنداعى بايلانىستىرۋشى ءرولى ايماقتىڭ مەملەكەت ەكونوميكاسىنداعى ستراتەگيالىق ماڭىزىن ايقىندايدى.
ەڭبەكپەن قامتىلماعان جانە جۇمىسپەن ءوزىن-ءوزى قامتىعان ازاماتتار بارىنشا تارتىلعان شاعىن بيزنەستى ودان ءارى دامىتۋعا مۇمكىندىك بەرەتىن باستى فاكتورلاردىڭ ءبىرى – شاعىن بيزنەستىڭ ناقتى ءتۇرىن تاڭداۋ كەزىندە حالىققا باعدار بەرەتىن تۇتىنۋشى نارىقتىڭ ەگجەي-تەگجەيلى تالداۋى بولىپ تابىلادى. فورۋم قاتىسۋشىلارى الدىندا سويلەگەن سوزىندە «نۇر وتان» پارتياسى توراعاسىنىڭ ءبىرىنشى ورىنباسارى نۇرلان نىعماتۋلين: «ءوزىن-ءوزى جۇمىسپەن قامتىعان حالىق – ءار مەملەكەتتىڭ ەكونوميكاسىنىڭ نەگىزى جانە ۇلكەن كادرلىق رەزەرۆى بولىپ تابىلادى. سوندىقتان ەلباسىمىز, پارتيامىزدىڭ توراعاسى نۇرسۇلتان ءابىش ۇلى نازارباەۆتىڭ تاپسىرمالارىنىڭ ءبىرى – ول ەلىمىزدىڭ ءاربىر ازاماتىن جۇمىسپەن قامتاماسىز ەتۋ, جاڭا كاسىپتەردىڭ دامۋىنا جاعداي جاساۋ, قاجەت بولعان جاعدايدا جاڭا ماماندىقتارعا دا قايتا وقىتۋ. سونىڭ ناتيجەسىندە حالىقتىڭ الەۋمەتتىك جاعدايى ودان ءارى جاقساراتىن بولادى», – دەدى.
فورۋم جۇمىسىنىڭ ناتيجەسىندە شاعىن بيزنەستى دامىتۋ مەن قولداۋ بويىنشا مەملەكەتتىك ورگاندار, ازاماتتىق قوعام ينستيتۋتتارى مەن قارجىلىق قۇرىلىمدارعا ۇسىنىستار ازىرلەندى.
«ەگەمەن-اقپارات».