ءۇش كۇنگە سوزىلعان قازاقستان رەسپۋبليكاسىنىڭ ەڭبەك سىڭىرگەن سپورت شەبەرى, بوكستان الەم چەمپيونى گاليب جافاروۆتىڭ جۇلدەسىنە ارنالعان جاسوسپىرىمدەر اراسىنداعى ەكىنشى حالىقارالىق تۋرنير مارەسىنە جەتتى. جارىستىڭ وتۋىنە مۇرىندىق بولعان وبلىستىق سپورت, دەنە تاربيەسى جانە تۋريزم باسقارماسى مەن وبلىستىق بوكس فەدەراتسياسى سپورتشىلارعا بارلىق جاعداي تۋعىزدى. تۋرنيرگە «ەمشان» جانە «ترانسموست گرۋپپ» سىندى بەلدى كومپانيالار دەمەۋشىلىك جاسادى. بۇل تۋرنيرگە قازاقستاننىڭ بوكستان جاسوسپىرىمدەر قۇراما كومانداسىنىڭ مۇشەلەرى, ەلىمىزدىڭ كوپتەگەن وبلىستارىنان, رەسەيدەن, وزبەكستاننان, قىرعىزستاننان كوماندالار قاتىستى. بارلىعى 115 ءجاسوسپىرىم بىلعارى قولعاپ شەبەرى اقتوبە رينگىنە شىعىپ, كۇش سىناستى. ون ءتورت سالماق دارەجەلەرى بويىنشا ايقاسقان بوكسشىلار الدىڭعى تولقىن اعالار كوشىنە ىلەسۋگە دەگەن تالاپتارى مەن قۇشتارلىقتارىن بارىنشا كورسەتىپ قالۋعا تىرىستى. فينالدىق كەزدەسۋلەردىڭ شىمىلدىعىن اشقان 44 كيلو سالماقتاعى اقتوبەلىك الىبەك ەسەنجول مەن استانالىق نۇرجان سۇلەيمەنوۆ اراسىنداعى جەكپە-جەكتە جەرلەسىمىزدىڭ شوقتىعى بيىك بولدى. 46 كيلو سالماق دارەجەسىندە قىزىلوردالىق نۇرسۇلتان جورعاباەۆتىڭ جاراقات الۋىنا بايلانىستى قازاقستان قۇراما كومانداسىنىڭ مۇشەسى مەيرامبەك قۇلتورە بايگەنى شاپپاي الدى. قالعان سالماق دارەجەلەرىندە اقتوبەلىك اسلان قويباعار (48 كگ), الماتىلىق كونستانتين برۋسەنسكي (50 كگ), قازاقستان قۇراما كومانداسىنىڭ مۇشەسى بەكنۇر وجانوۆ (52 كگ), ايدارحان نوقانوۆ (54 كگ), رەسەيلىك يۋري دوروحين (57 كگ), قازاقستان قۇراما كومانداسىنىڭ مۇشەسى ماقسات بازارباەۆ (60 كگ), دانيار بولاتجانوۆ (63 كگ), شقو, قازاقستان قۇراما كومانداسىنىڭ مۇشەلەرى ادىلبەك جاقانوۆ (66 كگ), اباي تولەش (70 كگ), اقتوبەلىك تەمىرلان بايمۇحامبەتوۆ (75 كگ), رۋسلان ساعات (80 كگ), بقو, ماڭعىستاۋلىق داۆيد پىرحيەۆ (8 0 كيلودان جوعارى) وسى حالىقارالىق ءتۋرنيردىڭ جەڭىمپازدارى بولدى. جارىس جەڭىمپازدارى مەن جۇلدەگەرلەرىنە ديپلومدار مەن باعالى سىيلىقتار تاپسىرىلدى. بۇل ءتۋرنيردىڭ ءبىر ەرەكشەلىگى – وعان سىيلى قوناق رەتىندە كەزىندە وليمپيادالىق ويىنداردا, الەم جانە ازيا بىرىنشىلىكتەرىمەن حالىقارالىق جارىستاردا قازاقستان قورجىنىنا ولجا سالعان ەسىمدەرى ەلىمىزگە بەلگىلى بىلعارى قولعاپ شەبەرلەرىنىڭ كوپتەپ قاتىسۋى دەر ەدىك. اتاق-داڭقىنان ات ۇركەتىن اعالارىنىڭ الدىندا نامىستى قولدان بەرمەۋگە تىرىسقان ءجاسوسپىرىم بوكسشىلار اراسىنداعى جەكپە-جەكتەردىڭ تارتىستى ءوتۋى دە سوندىقتان. فينالدىق كەزدەسۋلەر اياقتالعان بويدا ءتۋرنيردىڭ باس تورەشىسى, قازاقستان رەسپۋبليكاسىنا ەڭبەگى سىڭگەن جاتتىقتىرۋشى ەلەۋسىز دۇيسەكوۆتى سوزگە تارتقانبىز. ول ءتۋرنيردىڭ ۇيىمداستىرىلۋى وتە جوعارى دەڭگەيدە بولعانىن ايتا كەلىپ, بۇل جارىستا اقتوبەلىكتەر الىبەك ەسەنجول جانە اسلان قويباعاروۆ, قۇراما كوماندا مۇشەسى ادىلەت ورىنباساروۆ سىندى بولاشاعىنان ءۇمىت كۇتتىرەتىن ءجاسوسپىرىم بوكسشىلاردىڭ كوزگە تۇسكەنىن مالىمدەدى. وسى تۋرنيردە جەڭىمپاز بولعانداردان الدا وتەتىن بوكستان جاسوسپىرىمدەر اراسىنداعى الەم چەمپيوناتىنا قاتىساتىن ەلىمىزدىڭ قۇراما كومانداسىنىڭ مۇشەلەرى ىرىكتەلەتىنىن دە جاسىرمادى. – ءبىز وزبەكستاننىڭ شىرشىق قالاسىنان بەس بوكسشى اكەلگەنبىز, ەكەۋى ەكىنشى ورىن الدى. تۋرنيرگە قازىلىق ەتكەن تورەشى مەدەت شالاباەۆ تا, ءوزىم دە جارىستىڭ وسىنشالىقتى ادەمى ۇيىمداستىرىلعانىنا ءتانتى بولدىم دەيدى. جاتار ورىن, تاماق جانە مادەني شارالار جونىندە كەمدىگى جوق, – دەدى وزبەكستاندىق جاتتىقتىرۋشى سامات ءىلياسوۆ بىزبەن اڭگىمەسىندە ريزاشىلىعىن جاسىرا الماي. بوكستان الەم چەمپيونى گاليب جافاروۆتىڭ باپكەرى, قازاقستان رەسپۋبليكاسىنا ەڭبەگى سىڭگەن جاتتىقتىرۋشى الىمبەك بالماعامبەتوۆتىڭ ايتۋىنشا, بۇل تۋرنير ءداستۇرلى جارىسقا اينالادى. ساتىبالدى ءساۋىرباي, اقتوبە وبلىسى.