الماتى قالاسىندا بۇگىن, ياعني 14 مامىر كۇنى قازاقستان رەسپۋبليكاسىنىڭ شانحاي ىنتىماقتاستىق ۇيىمىنا ءتوراعالىعى اياسىندا شىۇ-عا مۇشە مەملەكەتتەر سىرتقى ىستەر مينيسترلەرى كەڭەسىنىڭ وتىرىسى وتەدى. كەلىسسوزدەردە قازاقستاندىق دەلەگاتسيانى ەلىمىزدىڭ سىرتقى ىستەر ءمينيسترى ەرجان قازىحانوۆ باسقارادى. ال كەشە, 13 مامىر كۇنى قازاقستان سىرتقى ساياسات ۆەدومستۆوسى باسشىسىنىڭ رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆپەن كەزدەسۋى بولىپ ءوتتى.
قازاقستانعا كەزەكتى جۇمىس ساپارىمەن كەلگەن رف سىرتقى ىستەر ءمينيسترى سەرگەي لاۆروۆپەن قر سىرتقى ىستەر ءمينيسترى ەرجان قازىحانوۆ كەزدەسىپ, بىرقاتار كەلىسسوزدەر جۇرگىزدى. ەكى مەملەكەتتىڭ باس ديپلوماتتارى قازاقستان جانە رەسەي پرەزيدەنتتەرى بەرگەن تاپسىرمالاردىڭ, انىعىراق ايتقاندا, 2011-2012 جىلدارعا ارنالعان ءبىرلەسكەن ءىس-قيمىل جوسپارىنىڭ ورىندالۋ بارىسىن جان-جاقتى قاراستىردى. سونىمەن قاتار, ىرگەسى كەڭ, كورشىلەس ورنالاسقان ەكى مەملەكەت اراسىنداعى ساياسي, ساۋدا-ەكونوميكالىق, مادەني-گۋمانيتارلىق جانە وزگە دە سالالارداعى ەكى جاقتى ىنتىماقتاستىقتىڭ بۇگىنگى تاڭداعى احۋالى مەن كەلەشەكتەگى تالقىعا سالىندى. جۇرگىزىلگەن كەلىسسوزدەر قورىتىندىسى بويىنشا قازاقستان رەسپۋبليكاسى مەن رەسەي فەدەراتسياسى سىرتقى ىستەر مينيسترلەرى بىرلەسكەن كومميۋنيكەگە قول قويدى.
ەكى جاقتى كەزدەسۋدە قازاقستاننىڭ سىرتقى ساياسات ۆەدومستۆوسىنىڭ باسشىسى رەسەيلىك ارىپتەسىن بيىلعى 2011 جىلدىڭ 15 ماۋسىمىندا استانا قالاسىندا وتەتىن شانحاي ىنتىماقتاستىق ۇيىمىنىڭ مەرەيتويلىق سامميتىنە قاتىستى جۇرگىزىلىپ جاتقان دايىندىق جۇمىستارىمەن تانىستىرىپ ءوتتى. مينيستر, سونىمەن قاتار, ءوز ارىپتەسىنە يسلام كونفەرەنتسياسى ۇيىمى سىرتقى ىستەر مينيسترلەرى كەڭەسىنە ەلىمىزدىڭ الداعى توراعالىعىنا قاتىستى باستى باعىتتار توڭىرەگىندە ايتىپ بەردى.
كوپشىلىككە بەلگىلى, قازاقستان مەن رەسەي باسشىلارى – نۇرسۇلتان نازارباەۆ پەن دميتري مەدۆەدەۆتىڭ ساياسي كۇش-جىگەرى, يگى ىقپالدى باستامالارى مەن قاجىرلى ەڭبەكتەرى پوستكەڭەستىك كەڭىستىكتە كوپتەگەن ينتەگراتسيالىق ۇدەرىستەردىڭ العا باسۋىنا سەپتىگىن تيگىزۋدە. كەڭەيتىلگەن وسى كەزدەسۋدە ينتەگراتسيالىق ماسەلەلەرگە باستى نازار اۋدارىلۋى تۇسىنىكتى ءجايت. بۇل ورايدا كەدەن وداعىنىڭ جۇمىسىن باستاۋى, سونىمەن قاتار, قازاقستان, رەسەي جانە بەلارۋس مەملەكەتتەرى اراسىندا ءبىرتۇتاس ەكونوميكالىق كەڭىستىكتىڭ قۇقىقتىق-كەلىسىم-شارتتىق نەگىز قالىپتاستىرۋ باعىتىندا اتقارىلعان اۋقىمدى ءىس-شارالار بىرلەسكەن ءتيىمدى دە ساپالى جۇمىستاردىڭ ايقىن كەپىلى بولاتىندىعىنا داۋ جوق.
قازاقستان مەن رەسەي سىرتقى ساياسات ۆەدومستۆولارىنىڭ باسشىلارى ايماقارالىق ىنتىماقتاستىقتى ودان ءارى دامىتۋدى تىلگە تيەك ەتۋمەن قاتار, بۇگىنگى كۇن تارتىبىندە تۇرعان وزگە ماسەلەلەردى دە نازاردان تىس قالدىرمادى. ماسەلەن, مينيسترلەر بيىلعى جىلعى كۇزدە استراحان قالاسىندا وتكىزىلۋى جوسپارلانىپ وتىرعان ءۇىىى ايماقارالىق ىنتىماقتاستىق فورۋمىنا دايىندىق ماسەلەلەرىن تالقىلاپ, ءوز ويلارىن ورتاعا سالدى. كەزدەسۋ بارىسىندا سىرتقى ساياسات ۆەدومستۆولارى باسشىلارى بۇۇ جانە ونىڭ قۇرامداس بولىمدەرى شەڭبەرىندەگى ىنتىماقتاستىق ماسەلەلەرىن قاراستىرىپ, ورتالىق ازيا وڭىرلىك قاۋىپسىزدىگىنىڭ وزەكتى ماسەلەلەرى مەن اۋعانستان جايى تۋرالى دا وي قوزعادى. ەرجان قازىحانوۆتىڭ پىكىرىنشە, رەسەيلىك ءارىپتەسىمەن كەلىسسوزدەر ىسكەر دە سىندارلى جاعدايدا وتكەن.
– ءبىر قۇپتارلىعى, قازاقستان مەن رەسەي ماڭىزدى حالىقارالىق پروبلەمالار بويىنشا سالماقتى ۇستانىمىمەن ەرەكشەلەنۋدە. ەكى مەملەكەت تە سىرتقى ساياسات سالاسىندا ءوزارا ىقپالداستىقتى ارتتىرىپ, ودان ءارى جەتىلدىرۋدە ءبىرقاتار ءتيىمدى ءىس-شارالاردى جۇزەگە اسىرۋدا. قازىرگى كەزەڭدە كەدەن كودەكسى جانە كەدەن وداعىنىڭ ءبىرتۇتاس كەدەندىك اۋماعىن ىسكە ەنگىزۋ بويىنشا قارقىندى جۇمىس جۇرگىزىلۋدە. مەنىڭ ويىمشا, مۇنداي ماڭىزدى ءىس-شارادا ەڭ باستىسى الدىن الا كەلىسىلگەن مەرزىمدى ساقتاۋ, – دەدى قازاقستاندىق مينيستر ءوز ويىن ورتاعا سالىپ. ول, سونىمەن قاتار, بۇل كەزدەسۋدىڭ قازاقستان مەن رەسەي اراسىنداعى ىنتىماقتاستىقتى, ءوزارا سەنىمدىلىك پەن ارىپتەستىك قاتىناستاردى نىعايتا تۇسەتىندىگىنە سەنىم ءبىلدىردى.
ءباسپاسوز ءماسليحاتىندا ءسوز العان سەرگەي لاۆروۆ «رەسەي مەن قازاقستان اراسىنداعى ءوزارا تۇسىنىستىك پەن ىنتىماقتاستىق دەڭگەيىنىڭ جوعارى ەكەندىگىن» اتاپ ايتتى. وعان قازاقستان مەن رەسەي مەملەكەتتەرى باسشىلارىنىڭ اۋقىمدى ۇلەس قوسىپ وتىرعاندىعى دا نازاردان تىس قالمادى.
– ەكى مەملەكەتتىڭ, حالىقتارىنىڭ اراسىنداعى دوستىق, تاتۋ-ءتاتتى ءتىرشىلىك جانە بارلىق سالاداعى ستراتەگيالىق ارىپتەستىكتىڭ بۇگىنگى تاڭدا دا, كەلەشەكتە دە بەرەرى مول. مۇنىڭ ءوزى, سونداي-اق ەۋرازيالىق كەڭىستىكتەگى ىنتىماقتاستىقتى دا نىعايتىپ, تۇراقتىلىققا قول جەتكىزۋگە ىقپال ەتەدى, – دەدى سەرگەي لاۆروۆ.
سونىمەن, بىرلەسكەن كومميۋنيكەدە مەملەكەتتەر اراسىنداعى تاتۋ-ءتاتتى كورشىلىك, دوستىق, ىنتىماقتاستىق قارىم-قاتىناستار جانە ستراتەگيالىق ارىپتەستىك اتاپ كورسەتىلدى. ويتكەنى, مۇنىڭ ءوزى سىرتقى ساياسي ىقپالداستىقتى ودان ءارى جەتىلدىرىپ, ونىڭ اۋقىمىن كەڭەيتۋگە قولايلى جاعدايلار جاساماق.
باقىت بالعارينا.