«قۇرمەتتى وڭتۇستىكقازاقستاندىقتار!
سىزدەردى 1 مامىر – قازاقستان حالقىنىڭ بىرلىگى كۇنى مەرەكەسىمەن شىن جۇرەكتەن قۇتتىقتايمىن!
مەملەكەت باسشىسى ن.ءا.نازارباەۆ وبلىسىمىزعا جاساعان جۇمىس ساپارى اياسىندا «قازاق ەلىنە مىڭ العىس!» مونۋمەنتى مەن «قازاقستان حالقى اسسامبلەياسى» عيماراتىنىڭ اشىلۋ سالتاناتىنا قاتىسىپ, بەرەكەلى بىرلىگىمىزدى باياندى ەتۋ باعىتىنداعى بايىپتى جۇمىستاردى ماقساتتى جالعاستىرۋدى تاپسىردى.
حالقىمىزدا «باق قايدا باراسىڭ − ىنتىماققا بارامىن» دەگەن دانا ءسوز بار. ءبارىمىزدىڭ باستى ارمانىمىز − بەرەكەلى-باياندى, تاتۋ-ءتاتتى ءومىر ءسۇرۋ. وسى ماقساتىمىزدىڭ ويداعىداي جۇزەگە اسۋى ەڭ الدىمەن ءاربىرىمىزدىڭ قاجىرلى ەڭبەگىمىز بەن ەلىمىزدەگى ىشكى ساياسي تۇراقتىلىققا, پايىمدى پاراساتىمىزعا بايلانىستى.
ەگەمەن ەلىمىز بۇگىندە بەرەكەلى بىرلىكتىڭ مەرەيلى مەكەنىنە اينالدى. قازاقستان حالقى اسسامبلەياسىنىڭ شاڭىراعىنا توپتاسقان ءتۇرلى ۇلت وكىلدەرى ەلدىگىمىزدى تانىتار يگى باستامالاردىڭ بارلىعىنا بەلسەندى اتسالىسۋدا. تاۋەلسىز قازاقستاننىڭ قوعامدىق كەلىسىمگە نەگىزدەلگەن ۇيلەسىمدى ساياساتىن الەمدىك قاۋىمداستىق جوعارى باعالاۋدا.
ەلباسى: «بىرلىگى بەرەكەلى, تىرلىگى مەرەكەلى, ىنتىماعى جاراسقان ەلدىڭ عانا ىرىسى مەن تابىسى مول بولماق», − دەدى. ءبىز باستى بايلىعىمىز – قوعامداعى كەلىسىم مەن تاتۋلىقتى ساقتاۋ ىسىنە اتسالىسۋعا مىندەتتىمىز. وڭتۇستىك ءوڭىرى بۇل ىستە دە وزگەلەرگە ونەگە بولۋى ءتيىس.
قۇرمەتتى جەرلەستەر!
كونە تاريح بەتتەرىنىڭ قايسىسىن پاراقتاساق تا حالقىمىزدىڭ اسىل ارماندارىنىڭ كوش باسىندا ەڭ الدىمەن بىرلىك پەن تاتۋلىق تۇرادى. ەندەشە, قازاقستان حالقىنىڭ بىرلىگى مەرەكەسى بارشا قازاقستاندىقتاردىڭ ىنتىماعىن جاراستىرىپ, ىرىسىن ارتتىرسىن. بارشاڭىزعا اماندىق, شاڭىراقتارىڭىزعا شاتتىق, وتباسىلارىڭىزعا باق-بەرەكە, اماندىق تىلەيمىن!», دەلىنگەن حابارلامادا.
فوتو: سامات مىرزاليەۆ