فينالعا جولداما العان 20 بوكسشى 10 سالماق دارەجەسى بويىنشا ءوزارا جەڭىمپازداردى انىقتادى.
49 كيلو سالماقتا تارازدىق ەرمەك ماديەۆ اقتوبەلىك قاناعات مانات ۇلىنان باسىم تۇسسە, 52 كيلودا سىنعا تۇسكەن باققوجا يناياتۋللا (قىزىلوردا) سپورت شەبەرىنەن ۇمىتكەر دانيار سەرىككە (بقو) ەش مۇمكىندىك بەرمەدى.
بۇل تۋرنيردە ەرەكشە ايقاستىڭ ءبىرى 56 كيلودا ورىن الدى. اتالمىش سالماقتا باق سىناعان جەرگىلىكتى بوكسشى ولجاس قالاۋبەك پەن اوسك (تسسكا) اتىنان سىنعا تۇسكەن تاستەمىر بيبوسىنوۆتىڭ ايقاسى جانكۇيەرلەر كوڭىلىنەن شىقتى. الما-كەزەك سوققىلاردى اياماي جۇمساعان بۇل ايقاستا قالاۋبەكتىڭ باعى جاندى. ناق وسى سپورتشى «ءتۋرنيردىڭ ەڭ ۇزدىك بوكسشىسى» اتاعىنا يە بولدى.
فينالعا جولداما العان تاعى ءبىر اوسك-ءنىڭ وكىلى دارحان جۇمساقباەۆ (60 كگ) وسىنىڭ الدىندا ارىپتەسىنىڭ كەتكەن ەسەسىن قايتارىپ, اقتوبەلىك زامانبەك دانابەكوۆتەن باسىم ءتۇستى دە, تۋرنير جەڭىمپازى اتاندى.
64 جانە 69 كيلو سالماقتاردا جەرگىلىكتى بوكسشىلاردىڭ مەرەيى ۇستەم بولدى. تيىسىنشە, مەيىرجان پىرتاەۆ (64 كگ) ەرنۇر ولمەسبەكتەن (قىزىلوردا), بەكزات حالمەتوۆ (69 كگ) احمەت مومبەكوۆتەن (وقو) جەڭىستى ج ۇلىپ الدى.
ال بايانبەك سامەتوۆ (75 كگ, الماتى وبلىسى), ناۋرىز ساعىمباەۆ (81 كگ, اوسك), ادىلەت ورىنباساروۆ (استانا) جانە نۇرسۇلتان امانجولوۆ (91+ كگ, تاراز) سىندى بوكسشىلار تورەشىلەردىڭ ءبىر اۋىز شەشىمىمەن جەڭىسكە جەتتى.
ءبىر قىزىعى, حالىقارالىق دەگەن مارتەبەگە يە بۇل تۋرنيرگە كورشى وزبەكستان ەلىنەن 3 بوكسشى عانا كەلىپتى. قالعانىنىڭ بارلىعى ءوز جەرلەستەرىمىز. سەبەبىن ءبىلۋ ءۇشىن, وسى ءتۋرنيردى ۇيىمداستىرۋعا تىكەلەي جاۋاپتى, سيدنەي وليمپياداسىنىڭ كۇمىس جۇلدەگەرى, بۇگىندە وقو بوكستان وليمپيادا رەزەرۆىن دايارلايتىن بالالار مەن جاسوسپىرىمدەردىڭ مامانداندىرىلعان سپورت مەكتەبىنىڭ ديرەكتورى مۇحتارحان دىلدابەكوۆتەن سۇراعانىمىزدا, ول بىلاي دەپ جاۋاپ قاتتى: «تاجىكستان مەن تۇرىكمەنستان ەلىنىڭ بوكسشىلارى بىزگە كەلۋ ءۇشىن وزبەك جەرىنەن وتەدى. سوندىقتان, بوكسشىلارى ۆيزا اشۋ كەرەك بولاتىن. ۆيزاسى دەر كەزىندە دايىن بولماۋىنىڭ سالدارىنان ولار بۇل تۋرنيرگە كەلە المادى. ال قىرعىز ەلى بوكسشىلارىنىڭ ءتىزىمىن بەكىتىپ, بىزگە جىبەرگەن بولاتىن. الايدا, ولار بۇل تۋرنيردە توبە كورسەتپەدى. سەبەبىن كەيىن انىقتايمىز», دەدى وليمپيادا جۇلدەگەرى.
«كورگەن كوزدە جازىق جوق» دەمەكشى, ءتۋرنيردىڭ اشىلۋ جانە جابىلۋ سالتاناتىنا ءابدىسالان نۇرماحانوۆ شاكىرتتەرىنىڭ توبە كورسەتپەگەنى قىنجىلتتى. بوكستان قازاقستان قۇراماسىنىڭ باس باپكەرى رەتىندە 1994 جىلى جازعى ازيا ويىندارىنا, 1996 جىلى اتلانتا وليمپياداسىنا جول باستاپ بارعانىن, سول دودالاردا تالاي قازاقتىڭ بالاسى جەڭىس تۋىن جەلبىرەتكەنىن ءدۇيىم جۇرت بىلەدى ەمەس پە؟ ۆاسيلي جيروۆ اقش-تا ءجۇر دەمەسەڭىز, ەلىمىزدە جۇرگەن قالعان شاكىرتتەرى – ەرماحان ىبرايىموۆ, بولات ءجۇمادىلوۆ, نۇرجان سمانوۆ, قاناتبەك شاعاتاەۆتىڭ بۇل تۋرنيردە توبە كورسەتپەگەنى ىڭعايسىزداۋ بولدى.
سەبەبىن ءبىلۋ ءۇشىن سول باياعى مۇحتارحان دىلدابەكوۆكە جۇگىندىك.
«بارلىعىنا شاقىرتۋ جىبەردىك. قازىر ەشكىمگە وكپەلەۋگە بولمايدى. ارقايسىسىنىڭ ءوز جۇمىسى بار. مۇمكىن, كەلەسى جىلى قوناق رەتىندە كەلەتىن بولار. ال ءتۋرنيردىڭ دەڭگەيىنە كەلەر بولساق, 30 ساۋىردە تاشكەنتتە ازيا چەمپيوناتى باستالادى. وزگە ەلدىڭ بوكسشىلارىنىڭ كەلمەۋىنىڭ بىردەن-ءبىر سەبەبى وسى. قازاقستان قۇراما مۇشەلەرى دە سارى قۇرلىق دوداسىنا دايىندالىپ جاتىر. سوندىقتان, بيىلعى جارىس قازاقستان چەمپيوناتى سەكىلدى ءوتتى. بولاشاقتا تۋرنير دەڭگەيىن ايبا-نىڭ «ا» ساناتىنا دەيىن كوتەرۋ كەرەك. سوندا شىمكەنتكە جىل سايىن كەمىندە 15-20 ەلدىڭ بوكسشىلارى وزدەرى سۇرانىپ كەلەتىن بولادى», – دەدى مۇحتارحان قابىلانبەك ۇلى.
ۇيىمداستىرۋشىلاردىڭ ايتۋىنشا, كەلەر جىلدان باستاپ ءتۋرنيردى تەك 75, 81, 91 جانە 91 كيلودان جوعارى سالماقتا عانا وتەدى. سەبەبى, ناق وسى سالماقتاردا ءابدىسالان نۇرماحانوۆ جاس كەزىنەن باستاپ ەرەسەكتەر دوداسىنا دەيىن باق سىناعان.
الماس ماناپ,
«ەگەمەن قازاقستان»