2013 جىلى 16 قىركۇيەك كۇنى قر پرەزيدەنتى نۇرسۇلتان نازارباەۆ پەن قحر توراعاسى سي تسزينپين ەكى ەل اراسىنداعى ستراتەگيالىق ارىپتەستىكتى دامىتۋ ماقساتىندا بىرىككەن دەكلاراتسياعا قول قويىپ, 2017 جىلدى قىتاي حالىق رەسپۋبليكاسىنىڭ قازاقستانداعى تۋريزم جىلى دەپ جاريالاعان بولاتىن.
«بۇل - ەكى ەلدىڭ تۋريزم سالاسىنداعى العاشقى اۋقىمدى شاراسى. قىتايدىڭ قازاقستانداعى تۋريزم جىلى وسى سالاداعى ەلىمىزدىڭ نارىعىنا ايتارلىقتاي سەرپىلىس بەرىپ, تۋريستىك كلاستەردىڭ دامۋىن كۇشەيتەدى دەپ ويلايمىن», - دەدى مادەنيەت جانە سپورت ءمينيسترى ارىستانبەك مۇحامەدي ۇلى.
كورمەنىڭ اشىلۋىنا جانە قازاقستانداعى قىتايدىڭ تۋريزم جىلىنىڭ باستالۋىنا ارنايى كەلگەن قحر-دىڭ تۋريزم ىستەرى بويىنشا مەملەكەتتىك باسقارما باسشىسى دۋ تسزيان بيىلعى جىل ەكى ەلدىڭ ىنتىماقتاستىعىن جاڭا دەڭگەيگە كوتەرەتىنىن ايتتى.
«قازاقستانداعى قىتايدىڭ تۋريزم جىلى ەكى ەل ىنتىماقتاستىعىنىڭ جاڭا دەڭگەيگە شىققانىن كورسەتەدى. تۋريزم سالاسى بويىنشا ەكى ەل تۇرعىندارىنىڭ بەلسەندى ءىس-شارالار بويىنشا قارىم-قاتىناسى, تۋريستىك كومپانيا قىزمەتكەرلەرىنىڭ جۇمىسى جەمىسىن بەرەتىن بولادى», - دەدى دۋ تسزيان.
ايتا كەتەيىك, قازاقستانداعى قىتايدىڭ تۋريزم جىلى اياسىندا ەلىمىزدە بىرقاتار اۋقىمدى ءىس-شارالار ۇيىمداستىرىلماق. ونىڭ ىشىندە, كورمەلەر, تانىستىرۋ جيىندارى, قازاقستانعا قوسىمشا تۋرلار ۇيىمداستىرۋ شارالارى كىرەدى.